जीसु आपनेके ‘सत अंगुर बुटा’ बललो
15
मय सत अंगुर बुटा आंय आउर मोचो बुआ अंगुर-बाड़ी चो खेतीयार आय।
2 जोन डीरामन मोचो ने आसोत आउर फर नी धरोत, हुनमन के हुन काटुन देउआय। जोन डीरामन फर धरुआय, हुनमन के, हुनमन के चोकाड़ुआय कि हुनमन खुबे फर धरोत।
3 तुमी तो मोचो सांगलो बचन किरता छुक-छुका आसास।
4 तुमी मोचो ने मिसुन राहा, तेबे मय तुमचो ने मिसुन रयंदे। जसन डीरा, अंगुर बुटा ने मिसुन नी रलोने फर धरुक नी सके, उसनेची तुमी बले मोचो ने मिसुन नी रलोने फर धरुक नी सकास।
5 मय अंगुर बुटा आंय आउर तुमी डीरामन आहास। जोन मोचो ने मिसुन रउआय, आउर मय हुनचोने मिसुन रलोने, खुबे फर धरुआय। कसनबलले मोचो नोहलो तुमी काईची नी करुक सकास।
6 कोनी मोचो ने मिसुन नी रलोने, हुन, हुन डीरा असन आय जेके निकराउन पकाउन देदे आउर सुकुन जायदे आउर लोग हुन डीरामन के कुड़ा करुन आईग ने पकाउन देउआत आउर हुन लाकड़ी उलटुन जाउआय।
7 तुमी मोचो ने मिसुन रलोने, मोचो बचन तुमचो ने रयदे। तेबे तुमी जोन बले मन करुन मांगासे, हुन तुमके मिरेदे।
8 मोचो बुआ चो मयमा एचोले होयदे कि तुमी खुबे फर धरा। तेबे तुमी मोचो चेलामन होआसे।
9 जसन बुआ मोके मया करलोसे, उसनेची मय तुमके मया करलेसे, तुमी मोचो मया ने बनुन राहा।
10 तुमी मोचो हुकुममन के मानुआहास जाले, मोचो मया ने बनुन राहासे, जसन मय आपलो बुआ चो हुकुममन के मानलेसे, आउर हुनचो मया ने बनुन रयंसे।
11 मय ए गोटमन के तुमके एईकाजे बलेंसे कि मोचो हरिक तुमचो ने बनुन रओ, आउर तुमचो हरिक भरपुर होओ।
12 मोचो हुकुम एई आय कि जसन मय तुमके मया करलेसे, उसनेची तुमी बले गोटोक-दुसर के मया करा।
13 कोनी आपलो संगवारीमन काजे, आपलो जीव के देतो ले आगर मया आउर कहांय नीआय।
14 जोन बले मय तुमके हुकुम देयंसे, हुनके करलोने, तुमी मोचो संगवारीमन आहास।
15 एबले मय तुमके कमेया नी बलें, कसनबलले कमेया नी जानेसे कि हुनचो मालिक काय करेसे; मानतर मय तुमके संगवारी बलले, कसनबलले जोन गोटमन मय आपलो बुआ ले सुनलेसे, हुन जमाय के तुमके सांगुन दिलेसे।
16 तुमी मोके नी बाछलास, मानतर मय तुमके बाछलेसे आउर छुनलेसे कि तुमी फर धरा, आउर तुमचो फर बनुन रओ। तेबे जोन बले तुमी मोचो नाव ने बुआ के मांगासे, हुन तुमके देयदे।
17 एईकाजे मय तुमके हुकुम देयंसे कि तुमी गोटोक-दुसर ले मया करा।
संवसार तुमके बईर करेदे
18 संवसार तुमके बईर करेसे, तेबे तुमी जाना कि हुनमन आगे मोके बले बईर करला।
19 तुमी संवसार चो होलोने संवसार तुमके आपलो असन मया करती। मानतर तुमी संवसार चो नोआहास आउर मय तुमके संवसार ले बाछलेसे। एईकाजे संवसार तुमके बईर करेसे।
20 मय तुमके बललो गोटमन के सूरता करा कि कमेया आपलो मालिक ले बड़े नोआय। लोगमन मोके असकट करला, तेबे तुमके बले असकट करदे। हुनमन मोचो गोट के मानले, तुमचो गोटमन के बले मानदे।
21 हुनमन तुमचो संगे असन बेबार करदे, जसन मोचो संगे करला। कसनबलले तुमी मोचो चेलामन आहास आउर हुनमन मोके पठाउ के नी जानोत।
22 मय एउन हुनमन संगे नी गोटेयालोने, हुनमन पापी नी होता; मानतर एबे हुनमन के आपलो पाप काजे काई खेमा नीआय।
23 जोन कोनी मोके बईर करेसे, हुन मोचो बुआ के बले बईर करेसे।
24 मय हुनमन चो मंजिगता ए बुतामन नी करले, जोन कोनी बले केबई नी करला, तेबे हुनमन पाप चो कसूरदार नी होता; मानतर एबे हुनमन ए महासंदे चो बुतामन के दखला, तेबले बले हुनमन मोके आउर मोचो बुआ के बईर करला।
25 मानतर असन एईकाजे होली कि हुनमन चो नियम-कानुन ने लिखलो गोट सत होओ, “हुनमन मोके फोकाहा बईर करला”।†
26 मानतर जिदलदांय हुन साहरा करु एयदे, बललोने, हुन सत आत्मा जेके मय बुआ बाटले पठायंदे, हुन मोचो गवई देयदे।
27 तेबे तुमी बले दुसर चो पुरे मोचो गवई होआसे, कसनबलले तुमी मूर ले मोचो संगे रलास।