महापरभु लगे अमरतो गोटकी ची बाट
14
तुमचो मन डाहाल-बिकाल नी होओ। तुमी महापरभु के पतेयाते राहा, आउर मोके बले पतेयाहा।
2 मोचो बुआ घरे रतो काजे खुबे ठान आसे, नी होलोने मय तुमके सांगुन देते। कसनबलले मय हुता तुमचो काजे जगा तियार करुक जायंसे,
3 आउर मय जाउन तुमचो काजे जगा तियार करेंदे, तेबे एउन तुमके मोचो थाने नेयंदे कि जोन थाने मय रउआंय हुता तुमी बले राहासे।
4 जोन थाने मय जायंसे, तुमी हुन बाट के जानास।
5 थोमा हुनके बललो: ए परभु, आमी नी जानुं, तुय कहां जायसीस; तेबे आमी हुन जातो बाट के कसन ने जानुंदे?
6 जीसु हुनके बललो: बाट, सत आउर जीव मय ची आंय। मोचो नोहलोर कोनी बुआ लगे अमरुक नी सके।
7 तुमी मोके जानते रले, मोचो बुआ के बले जानतास; आउर एदांय ले हुनके जानसास आउर दखसास बले।
8 फिलिपुस, जीसु के बललो: ए परभु, बुआ के आमके दखाउन देस, एई आमचो काजे खुबे आय।
9 जीसु हुनके पूछलो: ए फिलिपुस, मय इतरो दिन ले तुचो संगे आंसे, आउर तुय मोके नी जानीस? जोन मोके दखलोसे हुन मोचो बुआ के दखलोसे। तुय काय काजे बलसीस कि बुआ के आमके दखाव।
10 काय, तुय नी पतेयायसीस, मय बुआ ने आउर बुआ मोचो ने आसे? ए गोटमन के जोन मय तुमके सांगेंसे, हुन मोचो बाटले नी बलें; मानतर बुआ मोचो भीतरे रउन आपलो बुतामन के करेसे।
11 मोकेई ची पतेयावा, मय बुआ ने आउर बुआ मोचो ने आसे, नोहले मोचो करतो बुतामन के दखुन पतेयावा।
12 मय तुमके सते सांगेंसे, जोन मोचो उपरे पतेयायसे हुन, जोन बले बुतामन मय करेंसे हुन सपाय के करेदे; आउर मय करलो बुतामन ले बले बड़े बुता करेदे। कसनबलले मय बुआ लगे जायंसे।
13 आउर जोन बले तुमी मोचो नाव ले मांगासे हुनी मय करेंदे, एईकाजे कि बुआ चो मयमा बेटा बाटले होओ।
14 तुमी मोचो नाव ने काई बले मांगलास जाले, मय तुमके देयंदे।
पवितर आत्मा चो बायदा
15 तुमी मोके मया करसास जाले, मोचो हुकुममन के मानासे।
16 आउर मय बुआ के गुहारेंदे, हुन तुमके साहरा करतो काजे आउर एक झन के देओ कि हुन तुमचो संगे अमदेया काजे रओ
17 बललोने, सत चो आत्मा, जेके संवसार नी माने, कसनबलले संवसार हुनके जानुक नी सके नोहले नी दखुक सके। मानतर तुमी हुनके जानास, कसनबलले हुन तुमचो संगे रहेसे, आउर हुन तुमचो ने आसे।
18 मय तुमके केबई एकला नी छांडें, मय तुमचो लगे फेर एयंदे।
19 फेर संवसार चो लोग मोके डंडिक ले नी दखदे, मानतर तुमी मोके दखासे। एईकाजे कि मय जीव आंसे, तुमी बले जीव राहासे।
20 हुन दिने तुमी जानासे कि मय मोचो बुआ ने आंसे, आउर तुमी मोचो ने आउर मय तुमचो ने आंसे।
21 जेचो लगे मोचो हुकुम आसे आउर हुनके मानेसे, हुनी मोके मया करेसे; आउर जोन मोके मया करेसे, हुनके मोचो बुआ मया करेसे, आउर मय हुनके मया करेंसे, आउर मय खुद के हुनके दखायंदे।
22 जहूदा (जहूदा इसकरियोती नोआय) जीसु के बललो: “ए परभु, कसन होली गुने तुय खुद के आमके दखाउक मन करसीस, आउर संवसार के नाई?”
23 जीसु हुनके बललो: जोन बले मोके मया करेसे, हुन मोचो गोट के मानेदे, आउर मोचो बुआ हुनके मया करेदे। आमी हुनचो लगे जाउंदे आउर हुन आमचो संगे रयदे।
24 जोन मोके मया नी करे, हुन मोचो गोट के नी माने। आउर जोन गोट के तुमी सुनसाहास, हुन मोचो नोआय, मानतर मोचो बुआ चो आय, जोन मोके पठालोसे।
25 ए गोटमन मय तुमचो संगे रतो बेरा तुमके सांगुन रले।
26 मानतर साहरा करु बललोने, पवितर आत्मा के बुआ मोचो नाव ने पठायदे, हुन तुमके जमाय गोटमन के सिखायदे, आउर जोन बले मय तुमके सांगलेसे, हुन जमाय तुमके सूरता करायदे।
27 मय तुमीमन के अस्तिर देयंसे, मोचो अस्तिर तुमके देयंसे। जोन अस्तिर मय तुमके देयंसे, हुन संवसार देतो अस्तिर असन नोआय। तुमी नी खिसियाहा आउर नी डरा।
28 तुमी सुनलास, मय तुमके बलले, “मय जायंसे।” मानतर तुमचो लगे फेर एयंदे। तुमी मोके मया करतास, तेबे ए गोट ले हरिक होतास कि मय बुआ लगे जायंसे। कसनबलले बुआ मोचो ले बड़े आय।
29 मय ए जमाय गोटमन होतो ले आगे तुमके सांगलेसे कि जिदलदांय असन होयदे, तेबे तुमी पतेयाहासे।
30 मय एदांय तुमचो संगे जुगेदांय ले नी गोटेयायें, कसनबलले ए संवसार चो मुखिया एयसे, आउर मोचो उपरे हुनचो काई हक नीआय।
31 मानतर एईकाजे असन होयसे, ए संवसार जानो कि मय बुआ के मया करुआंय आउर जसन बुआ मोके हुकुम दिलोसे, मय उसनेची करेंसे। उठा, एथाले जो।