जहूदा इसकरियोती चो उआट
22
पाग नोहलो रोटी चो तिहार, जेके फसह तिहार बले बलसोत लगे अमरुन रये,
2 आउर पुजारीमन चो मुखियामन आउर धरम-पंडितमन ए गोट चो घत ने रओत कि कसन ने जीसु के मोरते मारवां, कसनबलले हुनमन लोगमन के डरते रओत।
3 तेबे बारा चेलामन ने जेचो नाव जहूदा इसकरियोती आय, हुनके सयतान समाली।
4 हुन जाउन पुजारीमन चो मुखियामन आउर मंदिर चो पाहरा देउ लोगमन चो मुखियामन संगे गोट-बात करलो कि कसन ने जीसु के हुनमन चो हाथे धरावां।
5 हुनमन हरिक होला आउर हुनके चांदी चो सिक्का देतो बायदा करला।
6 जहूदा मानलो आउर मोहका डगराउक मुरियालो कि कसन ने गोहड़ा नी रलो बेरा जीसु के धोका ने हुनमन चो हाथे धराउन देउक होयदे।
चेलामन संगे आखरी हार फसह तिहार खातोर
7 तेबे पाग नोहलो रोटी खातो तिहार ईली, आउर ए तिहार ने फसह चो मेंडा के जतरा करतोर जरुर रये।
8 एईकाजे जीसु, पतरस आउर जूहन्ना के असन बलुन पठालो, “जाउन आमचो खातो काजे फसह तिहार चो रांदा-बाड़ा तियार करा।”
9 तेबे हुनमन जीसु के पूछला: “कहां तियार करतो काजे तुय मन करसीस?”
10 जीसु हुनमन के बललो, “जसने तुमी सहर ने अमरासे उसने गोटोक मनुक पानी चो हांडी बोउन तुमके मिरेदे; जोन घर ने हुन जायदे हुनचो पाट-पाट जाहा,
11 आउर हुन घर चो मालिक के बला, ‘गुरुजी तुके बलेसे कि हुन अटार खोली कहां आसे जोन थाने मय मोचो चेलामन संगे फसह तिहार चो भोज खायंदे?’
12 हुन, तुमके गोटोक बड़े ढाबा के दखायदे, जोन उपरे आसे, हुताय तियार करा।”
13 एमन जाउन जसन हुन बलुन रये उसने पावला आउर फसह तिहार चो रांदा-बाड़ा करला।
परभु-भोज
14 जिदलदांय बेरा अमरली जीसु पठालो-लोगमन संगे खाउक बसलो।
जीसु, चेलामन संगे परभु भोज खातोर (22:14)
15 आउर हुन हुनमन के बललो, “मोके खुबे मन रये कि डंड पावतो ले आगे तुमचो संगे फसह तिहार चो भोज खायें।
16 मय तुमके बलेंसे, एदांय ले मय एके केबई नी खायें जिदलदांय ले महापरभु चो राज पुरा नी होयदे।”
17 तेबे हुन बटका के धरलो आउर महापरभु के धन-धन करुन हुनमन के बललो: “एके धरा आउर तुमीमन बाटुन खाहा।
18 कसनबलले मय तुमके सांगेसे, एदांय महापरभु चो राज एओतले मय केबई अंगुर रस नी पीयंदे।”
19 तेबे हुन रोटी के धरलो आउर जुहार करुन गोंदा करलो आउर असन बललो: “ए मोचो देहें आय जोन तुमचो काजे दिलोर आसे। मोके सूरता करतो काजे असने करा।”
20 असने खादलो पाछे हुन बटका के धरलो आउर असन बललो: “ए बटका, महापरभु बाटले करलो बायदा आय, जोन तुमचो काजे बोहालोर मोचो लोउ आय।
21 मानतर दखा, मोके धराउन देतो बीता चो हाथ मोचो संगे टेबुल ने आसे।
22 कसनबलले मनुक चो बेटा काजे जसन तियार करलोर आसे उसनेची होयसे, मानतर हुन मनुक चो उपरे काय डंड होयदे, जोन हुनके धरायसे!”
23 तेबे हुनमन गोटोक-दुसर ले पूछुक-पचारुक मुरियाला कि आमचो मंजी ने असन कोन आसे जोन असन बुता करेदे।
लूका 22:7-23
बड़े कोन आय?
24 चेलामन चो मंजी ने कोन बड़े आय बलते बला-बली होते रओत।
25 एके दखुन, जीसु हुनमन के बललो: “बिजातीमन चो राजा हुनमन चो उपरे राज करसोत आउर हुनमन उपरे हक संगायसोत, हुनीमन के लोगमन भलई करतो बीतामन बलसोत।
26 मानतर तुमी असन नी होआ; तुमचो मंजी जोन सबुले बड़े आय, हुन आपने के नानी बनाओ आउर जोन मुखिया आय, हुन कमेया असन होओ।
27 कसनबलले बड़े कोन आय, हुन भात खाउक बसलो बीता कि हुन सेवा-बुता करतो बीता? काय, हुन नोआय जोन खातो काजे बसलोसे? मानतर मय तुमचो मंजी कमेया असन आंसे।
28 तुमी हुनमन आहास, मोके परखतो बेरा मोचो संगे सरलगा रलास;
29 आउर जसन मोचो बुआ मोचो काजे गोटोक राज तियार करलोसे, उसनेची मय बले तुमचो काजे तियार करेंसे
30 कि तुमी मोचो राज ने मोचो टेबुल ने खाहा-पीया आउर तुमी राजगादीमन ने बसुन इसराएल चो बारा बंस चो नियाव करा।”
पतरस, जीसु के “नी जाने” बलतोर
31 “ए समोन, ए समोन! दख सयतान तुमीमन के गउं चो असन फुनतो काजे मांगलोसे,
32 मानतर मय तुचो काजे पारथना करलेसे कि तुय बिसवास ने चमकट रा, आउर तुचो बोहड़लो पाछे, आपलो भाईमन के बिसवास ने बरसक कर।”
33 समोन हुनके बललो: “ए परभु, मय तुचो संगे जयल जातो आउर मोरतो काजे बले तियार आंसे।”
34 जीसु हुनके बललो, “ए पतरस, आजी कुकड़ा बासतो ले आगे तुय तीन हार मोके ‘नी जाने’ बलसे।”
35 फेर जीसु हुनमन के बललो: “जेबे मय तुमके थयली, झोरा आउर पनई नोहलो पठाले, तेबे काय, तुमके काई जाकमन चो उना होउन रली?” हुनमन जीसु के बलला: “काई जाक चो उना नी होली।”
36 हुन बललो, “मानतर जेचो लगे थयली आसे हुन धरुन रओ, आउर जेचो लगे खांडा नीआय हुन आपलो फटईमन के बिकुन गोटोक घेनो।
37 कसनबलले मय तुमके बलेंसे धरमसास्तर ने असन लिखलोर आसे,
‘हुन ओधरमीमन संगे गनती होलो।’†
हुन गोटमन मोचो उपरे पुरा होतोर ची आय, कसनबलले मोचो बारे ने लिखलोर गोटमन पुरा होयदेबे।”
38 हुनमन जीसु के बलला: “ए परभु, दख, एथा दुयठन खांडामन आसे।”
हुन हुनमन के बललो: “ओगाय राहा, होयदेबे।”
लूका 22:24-38
जयतून डोंगरी ने जीसु चो पारथना
39 तेबे हुन हुताले निकरुन आपलो रीती चो असन जयतून डोंगरी उपरे गेलो, आउर चेलामन बले हुनचो पाटे गेला।
40 हुता अमरुन हुन आपलो चेलामन के बललो: “पारथना करते राहा कि तुमी जचई ने नी पड़ा।”
41 आउर हुन खुद ढेला फिंगतो इतरो दूर ने जाउन मांडिखुटा देउन पारथना करुक मुरियालो:
42 “ए बुआ, तुय मन करसीस जाले ए दुख चो बटका के मोचो ले गुचाव, तेबले-बले मोचो मन असन नाई मानतर तुचेई मन-इछा असन होओ।”
43 तेबे गोटोक सरगदूत दखा दिलो जोन हुनके सकत देते रये।
44 जीसु जीव-धरा दुखा ले बाय-बिकाल होउन पारथना करलो आउर हुनचो पसना लोउ चो बड़े-बड़े टपका असन भुंय ने घसरते रये।
45 तेबे हुन पारथना ले उठुन आपलो चेलामन लगे एउन हुनमन के, मुरमुरा होउन सोवते पावलो।
46 आउर हुनमन के बललो: “काय काजे सोयसाहास? उठा! पारथना करा कि परखतोर ने नी पड़ा।”
जीसु के बांदुन नेतोर
47 जीसु हुनमन के असने बलते ची रये तेबे दखा, जहूदा जोन बारा चेलामन ले गोटोक रये, हुन गोटोक भीड़ चो पुरे-पुरे जीसु के पोटार-जुहार करुक लगे ईलो।
48 जीसु हुनके बललो: “ए जहूदा, काय, तुय मनुक चो बेटा के मया दखाउन पोटारुन धरायसीस?”
49 जेबे हुनचो संगे रलो लोगमन दखला कि काई तो होतो बिती आय, तेबे हुनमन बलला; “ए परभु, काय आमी खांडा किंदराउ आंव?”
50 तेबे हुनमन ले गोटोक, बड़े पुजारी चो कमेया चो उजा कान के खांडा ले काटुन दिलो।
51 एके दखुन, जीसु बललो: “एदांय ठेब! ओगाय राहा।” आउर हुन कमेया चो कान के छिंउन हुनके नंगत करुन दिलो।
52 तेबे जीसु, पुजारीमन चो मुखियामन, मंदिर राखा करु बीतामन चो मुखियामन आउर धरम-सियानमन के, जोन हुनके धरुकलाय एउ रओत, बललो: “काय, तुमी मोके खंगार आय बलते खांडा आउर बड़गामन धरुन ईलासाहास?
53 जिदलदांय मय मंदिर ने रोजे दिने तुमचो संगे रले तेबे तुमी मोचो उपरे हाथ नी उठालास, मानतर ए बेरा तुमचो आय, आउर अंधार चो सकत बललोने, सयतान चो सकत चो बेरा आय।”
लूका 22:39-53
पतरस, जीसु के ‘नी जाने’ बलतोर
54 फेर हुनमन जीसु के धरुन नीला आउर बड़े पुजारी चो घरे आनला आउर पतरस फयले ले हुनमन चो पाट-पाट रेंगते रये।
पुजारी मुखिया चो पींदा-वाड़ा (22:54)
55 आउर जेबे हुनमन दुआरे आईग बारुन जुहुन बसुन रला, तेबे पतरस बले हुनमन चो मंजारे बसलो।
56 तेबे गोटोक कमेयीन लेकी आईग चो उजर ने पतरस के नंगत दखुन बलली: “ए बले तो जीसु चो संगे रये।”
57 मानतर पतरस हुनके असन बलुन दोदलो: “ए बायले, मय हुनके नी जाने।”
58 डंडिक रउन आउर गोटोक बले पतरस के दखुन बललो: “तुय बले तो हुनमन संगे चो आस।” पतरस बललो: “ए मनुक, मय नोआंय।”
59 गोटोक घंटा अमरा-अमरी होलो पाछे गोटोक मनुक जिद करुन बलुक मुरियालो: “सते, ए बले तो हुनचो संगे रये, कसनबलले ए बले तो गलीलेया आय।”
60 मानतर पतरस बललो: “ए मनुक, मय नी जाने कि तुय काय बलसीस!” हुन असन बलते ची रये आउर तूरते कुकड़ा बासली।
61 तेबे परभु किंदरुन पतरस बाटे दखलो, आउर पतरस के परभु चो हुन गोट सूरता ईली, “आजी कुकड़ा बासतो ले आगे, तुय तीन हार मोके ‘नी जाने’ बलसे।”
62 आउर पतरस बाहरे निकरुन खुबे कलपुन-कलपुन गागलो।
लूका 22:54-62
63 जोन मनुकमन जीसु के धरुन रला हुनमन जीसु के हांसी करुन पेटुक मुरियाला,
64 आउर हुनचो आंईक के ढाकुन हुनके पूछला, “आमके अगमगोट सांगुन-दख, तुके कोन मारलो!”
65 आउर हुनमन खुबे निंदरुन हुनचो उलटा गोटमन के बलला।
धरम-मंडली चो पुरे जीसु
66 जिदलदांय बियान पावली, धरम-सियानमन संगे लोगमन चो मुखियामन आउर पुजारीमन चो मुखियामन आउर धरम-पंडितमन जुहा होला, आउर हुनमन चो धरम पंच ने जीसु के आनुन पूछला,
67 “अले, तुय किरिस्त आस जाले आमके सांगुन देस।” मानतर जीसु हुनमन के बललो: “मय तुमके बलले जाले तुमी नी पतेयाहासे।
68 आउर मय पूछलोने तुमी नी सांगासे।
69 मानतर एदांय ले मनुक चो बेटा, सबुले सकत महापरभु चो उजा हाथ बाटे बसुन रयदे।”
70 एके सुनुन सपाय जोर ले बलला: “असन आय जाले काय तुय महापरभु चो बेटा आस?” जीसु हुनमन के बललो: “तुमी आपने बलासाहास कि मय आंय।”
71 तेबे हुनमन बलला, “एबे आमके गवई नी लागे, आमी हुनचो टोंड ले खुदे सुनलुसे।”
लूका 22:63-71