लाजर चो मोरना
11
लाजर नाव चो गोटोक मनुक बेमार रलो। हुन बेतनिया गांव चो रये, जोन थाने मरियम आउर हुनचो बईन मारथा बले रओत।
2 ए हुनी मरियम आय, जोन परभु चो पांयमन ने बासतेल घसुन आपलो चूंदी संगे पोछु रये, हुनचो भाई लाजर बेमार रये।
3 लाजर चो बईनमन, जीसु लगे, लोग चो हाथे खबर पठाला, ए परभु, दख, जेके तुय मया करसीस हुन बेमार पड़लोसे।
4 एके सुनुन जीसु बललो, ए बेमार जीव नी धरे, मानतर ए बेमार महापरभु चो मयमा काजे आय कि हुनचो ले महापरभु चो बेटा चो मयमा होओ।
5 जीसु, मारथा आउर हुनचो बईन मरियम के आउर लाजर के मया करते रये।
6 मानतर जिदलदांय जीसु सुनलो कि लाजर बेमार आसे, तेबले बले जोन थाने हुन रलो, हुताय दुय दिन आउर ठेबलो।
7 तेबे हुन आपलो चेलामन के बललो, इआ, आमी फेर जहूदिया राज ने जो।
8 चेलामन हुनके बलला: ए गुरुजी, एबे तो जहूदीमन तुके पकना संगे मारतो काजे होते रओत, तेबे फेर, तुय काय काजे हुताय जायसीस।
9 जीसु हुनमन के बललो, काय, दिनभर ने बारा घंटा चो उजर नी होयसे? कोनी मंजन ने हिंडेसे, हुन नी हकने, कसनबलले हुन ए संवसार चो उजर के दखेसे।
10 मानतर जोन राती हिंडेसे, हुन हकनुआय, कसनबलले हुनचो लगे उजर नी रये।
11 जीसु ए गोटमन के बललो, आउर एचो पाछे हुनमन के बललो: आमचो संगवारी लाजर सोवलोसे, मानतर मय हुनके उठाउक जायंदे।
12 तेबे चेलामन हुनके बलला, ए परभु, हुन सोयसे जाले नंगत होयदे।
13 जीसु हुनमन के लाजर चो मोरना चो गोट सांगु रये, मानतर हुनमन समजला कि हुन झूमरा ने सोवलो गोट के सांगलो।
14 तेबे जीसु हुनमन के सरसरा सांगलो कि लाजर मोरलोसे।
15 मय तुमचो किरता हरिक ने आंसे कि मय हुता नी रयें, कसनबलले तुमी पतेयाहासे। एदांय इआ, आमी हुनचो लगे जो।
16 तेबे थोमा जेके दिदुमुस* बलते रओत, आपलो संग चो चेलामन के बललो: इआ, आमी बले हुनचो संगे मोरुक जो।
जीसु बेतनिया गांव ने
17 जिदलदांय जीसु बेतनिया गांव ने ईलो, तेबे हुनके जान पड़ली कि लाजर के मोठेयालोर चार दिन होउ रये।
18 बेतनिया जरूसलेम सहर ले दुय मील असन लापी रये।
19 खुबे जहूदीमन, मारथा आउर मरियम लगे, आपलो भाई लाजर चो मोरना लागुन समजाउक एउ रओत।
20 मारथा, जीसु चो ईलो गोट के सुनुन हुनके भेट होउक गेली, मानतर मरियम घरे रली।
21 मारथा, जीसु के बलली: ए परभु, तुय एथा रलोने मोचो भाई नी मोरतो।
22 आउर एबे बले मय जानेंसे कि जोन बले तुय महापरभु के मांगसे, महापरभु तुके देयदे।
23 जीसु हुनके बललो: तुचो भाई फेर ले जीयेदे।
24 मारथा हुनके बलली: मय जानेंसे कि फेर जीव उठतो दिने, हुन बले जीव उठेदे।
25 जीसु हुनके बललो: फेर जीव उठतोर आउर जीव, मय ची आंय। जोन बले मोचो उपरे पतेयायसे, हुन मोरुन गेले बले फेर जीयेदे।
26 आउर जोन कोनी बले जीव आसे, आउर मोचो उपरे पतेयायसे, हुन केबई नी मोरे। काय, तुय ए गोट के पतेयायसीस?
27 मारथा, जीसु के बलली: हव, ए परभु, मय तुचो उपरे पतेयायंसे, तुय महापरभु चो बेटा किरिस्त आस, जोन संवसार ने एतोर रये।
28 असन बलुन हुन घरे गेली आउर आपलो बईन मरियम के खुसुकनाय हागदेउन बलली: गुरुजी ईलोसे आउर तुके हागदेयसे।
29 एके सुनते खन मरियम उठुन तूरते जीसु लगे गेली।
जीसु गागलो
30 जीसु एबे गांव ने नी अमरु रये, मानतर हुनी जगा ने रये, जोन थाने मारथा हुनके भेट होउ रली।
31 तेबे जोन जहूदीमन, मरियम संगे घरे रला, आउर हुनके समजाते रओत, हुनमन हुनके तूरते उठुन बाहरे जातो के दखुन असन समजला कि हुन मोड़ा-भाटा ने गागुक जायसे, आउर हुनचो पाट-पाट गेला।
32 जिदलदांय मरियम हुता अमरली, जोन थाने जीसु रये, तेबे हुनके दखुन पांय पड़ली आउर बलली, ए परभु, तुय एथा रलोने मोचो भाई नी मोरतो।
33 जिदलदांय जीसु, मरियम के आउर हुनचो संगे ईलो जहूदीमन के गागतो के दखलो, तेबे हुन आपलो जीव ने कलपुन बललो।
34 तुमी हुनके कहां संगालासाहास? हुनमन हुनके बलला, ए परभु, जाउन दखुं।
35 जीसु गागलो।
36 तेबे जहूदीमन बलला, दखा, हुन लाजर के कितरो मया करते रलो।
37 मानतर हुनमन ले आदो लोग बलला, काय, जोन कानामन चो आंईकमन के उगड़ालो, हुन असन बले नी करुक सकलो कि ए मनुक नी मोरो?
जीसु, लाजर के जीव पड़ातोर
38 जीसु, फेर कलपुन मोठ लगे ईलो, हुन मोठ गोटोक करपन रली, आउर हुन करपन चो मुं ने गोटोक पकना के आड़ करुन रओत।
39 जीसु बललो, पकना के गुचाहा। मोरलो बीता चो बईन मारथा, जीसु के बलली: ए परभु, हुन तो गंधेसे बे, कसनबलले हुनके मोठ ने संगालोर चार दिन होलीसे।
40 जीसु हुनके बललो, काय, मय तुके नी बलु रयें, तुय पतेयालीस जाले, महापरभु चो मयमा के दखसे।
41 तेबे हुनमन हुन पकना के गुचाला। तेबे जीसु उपरे दखुन बललो: ए बुआ, मय तुके धन-धन करेंसे, कसनबलले तुय मोचो सुनुआस।
42 मय जानते रयें कि तुय अमदेया मोचो सुनुआस। मानतर जोन भीड़ मोचो लगे उबा आसोत, हुनमन चो किरता मय असन बलले। एईकाजे कि ए लोगमन पतेयाओत तुय मोके पठालीसीस।
43 असन बलुन जीसु चिचियाउन हागदिलो: ए लाजर, निकरुन आव!
44 जोन मोरु रलो, हुन आपन के गुंडियालोर मोड़ा-फटई संगे बाहरे निकरुन ईलो, हुनचो थमना के बले ओंगछा ने गुंडियाउन रला। जीसु हुनमन के बललो: एके ढीला आउर जाउक दियास।
जहूदी मुखियामन, जीसु के मोरते मारतो उआट करतोर
45 तेबे जोन जहूदीमन, मरियम लगे एउ रओत आउर जीसु चो ए बुता के दखु रओत, हुनमन ले खुबे लोग हुनचो उपरे पतेयाला।
46 मानतर हुनमन ले आदो लोग फरीसीमन लगे जाउन, जीसु चो बुता चो खबर के सांगुन दिला।
47 एईकाजे पुजारीमन चो मुखियामन आउर फरीसीमन, लोग बसाला आउर जुहा होलो लोगमन के बलला: आमी काय करतोर आय? ए मनुक खुबे महासंदे चो चीनामन दखायसे।
48 आमी हुनके असनी छांडुन दिलु जाले, सपाय हुनचो उपरे पतेयादे आउर रोमीमन एउन आमचो मंदिर आउर राज, दुनो के नास करदे।
49 तेबे हुनमन ले काइफा नाव चो गोटोक मनुक, जोन हुन बरक चो बड़े पुजारी रलो, हुनमन के बललो: तुमी काई नी जानास।
50 तुमी ए बले नी बिचारास, तुमचो काजे ए नंगत आय कि आपलो लोग काजे गोटोक मनुक मोरो आउर असन नी होओ, आमचो जमाय जात नास होओ।
51 ए गोट के हुन आपलो खुद चो बाटले नी बललो, मानतर हुनी बरक चो बड़े पुजारी होउन अगमगोट सांगलो कि जीसु जहूदी जात काजे मोरेदे।
52 आउर ए सोजे आमचेई जात भाईमन काजे नोआय, एईकाजे बले आय कि महापरभु चो ए बाटे हुन बाटे होलो लोगमन रूंडुन भाति गोटोक होओत।
53 एईकाजे हुनमन हुनी दिन ले जीसु के मोरते मारतो काजे सला होउक मुरियाला।
54 हुदलदांय ले जीसु, जहूदीमन चो मंजिगते दखा नी दिलो, मानतर हुताले रान रेटे चो इफराईम नाव चो सहर ने जाउन आपलो चेलामन संगे रलो।
55 जहूदीमन चो फसह तिहार अमरु रये, आउर खुबे लोगमन तिहार मुरियालो ले आगे गांवमन ले जरूसलेम सहर गेला कि नीती चो असन आपने के सुद करोत।
56 पुजारीमन चो मुखियामन आउर फरीसीमन, जीसु के डगराते रला आउर मंदिर ने जुहा होउन गोटोक-दुसर संगे गोटेयाला, तुमी काय बिचारसाहास? काय, हुन तिहार ने नी एयदे।
57 पुजारीमन चो मुखियामन आउर फरीसीमन हुकुम देउ रओत, कोनी बले जानलोने, जीसु कहां आसे सांगोत कि हुनमन, हुनके धरुक सकोत।