धोरई आउर मेंडामन चो कटाव
10
मय तुमके सते सांगेंसे, जोन बले कोटासार ने कपाट बाटले नी ओलेसे, मानतर कोनी दुसर बाट ले ओलेसे, हुन चोर आउर खंगार आय।
2 मानतर जोन कपाट बाटले भीतरे ओलेसे, हुन मेंडामन चो धोरई आय।
3 हुनचो काजे राखा बीता कपाट उगाड़ुन देयसे, आउर मेंडामन हुनचो राग सुनुआत, आउर हुन आपलो मेंडामन के नाव धरुन हागदेउआय आउर बाहरे नेउआय।
4 आउर हुन आपलो जमाय मेंडामन के बाहरे आनलोने, हुनमन चो पुरे-पुरे आपन जायसे, आउर मेंडामन हुनचो पाट-पाट जायसोत: कसनबलले हुनमन हुनचो राग के चितायसोत।
5 हुनमन दुसर बीता चो पाट-पाट नी जाओत मानतर हुनचो लग ले परादे; कसनबलले हुनमन दुसर बीता चो राग के नी चिताओत।
6 जीसु हुनमन के ए कटाव सांगलो, मानतर हुनमन नी समजला कि ए काय गोटमन आय, जोन हुन आमके सांगेसे।
जीसु, नंगत धोरई
7 तेबे जीसु, हुनमन के फेर बललो, मय तुमके सते सांगेंसे, मेंडा गोहड़ा चो कपाट मय आंय।
8 जितरो बले मोचो ले आगे ईला; हुनमन जमाय चोर आउर खंगारमन आत, मानतर मेंडामन हुनमन चो नी सुनला।
9 कपाट मय आंय: कोनी मोचो बाटले भीतरे ओललोने, मुक्ति पायदे, आउर भीतरे बाहरे इहार-जाहार होयदे आउर हुनके चारा मिरेदे।
10 चोर, सोजे चोरतो काजे आउर मोरते मारतो काजे आउर नसातो काजे एउआय। मय एईकाजे ईलेसे कि हुनमन जीव पावोत; आउर खुबे ले पावोत।
11 नंगत धोरई मय आंय; नंगत धोरई मेंडामन काजे आपलो जीव देउआय।
12 भूतियार, जोन धोरई नोआंय, आउर मेंडामन चो मालिक नोआंय, हुन, डुरकी एतोके दखुन मेंडामन के छांडुन पराउ आय, आउर डुरकी मेंडामन के धरुआय आउर जत-खत करुन देउआय।
13 हुन एईकाजे परायसे, कसनबलले हुन भूतियार आय, आउर हुनके मेंडामन चो फिकिर नीआय।
14 नंगत धोरई मय आंय। जोन बरन ले बुआ मोके जाने, आउर मय बले बुआ के जानेंसे,
15 उसनेची मय आपलो मेंडामन के जानेंसे, आउर मोचो मेंडामन मोके जानोत; आउर मय मेंडामन काजे आपलो जीव के देउआंय।
16 मोचो आउर बले मेंडामन आसोत, जोन ए गोहड़ा चो नोआत, मोके हुनमन के बले आनतोर ची आय। हुनमन मोचो राग के सुनदे, तेबे गोटकी ची गोहड़ा आउर गोटकी ची धोरई होयदे।
17 बुआ मोके एईकाजे मया करेसे, कसनबलले मय आपलो जीव के देउआंय आउर हुनके फेर ले धरुआंय।
18 कोनी मोचो जीव के मोचो ले झीकुक नी सके, मानतर मय हुनके मोचो मन ले देयंसे। मोके हुनके देतोर हक बले आसे, आउर हुनके फेर ले धरतोर हक बले आसे। ए हक मोके मोचो बुआ ले मिरलीसे।
19 ए गोटमन काजे जहूदीमन चो मंजिगते फेर बला-बली होली।
20 हुनमन ले खुबे लोग बलुक मुरियाला कि हुनचोने देव-भूत आसे, आउर हुन बोया आय। काय काजे हुनचो गोट सुनसास।
21 आउर दुसरमन बलला, जोन मनुक ने देव-भूत आसे, हुन असन गोटमन सांगुक नी सके! काय, देव-भूत कानामन चो आंईकमन के उगाड़ुक सके।
जीसु के जहूदीमन नी पतेयातोर
22 सीतकार बेरा, जरूसलेम ने सोपतो तिहार मनाते रओत।
23 आउर जीसु मंदिर ने सुलेमान चो परची ने बुलते रलो।
24 तेबे जहूदीमन हुनके भोंवरक ले छेकला आउर पूछला, तुय आमके किदलदांय ले गुपाउन संगासे? तुय किरिस्त आस जाले आमके सते सांग।
25 जीसु हुनमन के बललो, मय तुमके सांगलेसे, आउर तुमी नी पतेयायसास, जोन बुतामन मय मोचो बुआ चो नाव ने करेंसे, हुनी मोचो गवई आय।
26 मानतर तुमी एईकाजे नी पतेयायसास कसनबलले तुमी मोचो मेंडामन नोआहास।
27 मोचो मेंडामन मोचो राग के सुनुआत; आउर मय हुनमन के जानें, आउर हुनमन मोचो पाट-पाट एउआत,
28 मय हुनमन के जुग-जुग चो जीव देउआंय, आउर हुनमन केबई नी मोरोत; आउर कोनी हुनमन के मोचो हाथ ले झीकुन नी नेदे।
29 मोचो बुआ हुनमन के मोके दिलो, जोन सपाय ले बड़े आय, आउर कोनी हुनमन के बुआ चो हाथ ले झीकुन नेउक नी सकोत।
30 मय आउर मोचो बुआ गोटकी आंव।
31 जहूदीमन हुनके मारतो काजे फेर पकनामन धरला।
32 तेबे जीसु हुनमन के पूछलो, मय तुमके मोचो बुआ बाटले खुबे नंगत-नंगत बुतामन दखाले, आउर हुन बुतामन ले, कोन बुता काजे तुमी मोके पकना ने मारतो काजे होयसास?
33 जहूदीमन हुनके बलला: नंगत बुता काजे आमी तुके पकना संगे नी मारुं। मानतर एईकाजे कि तुय महापरभु के निंदरसीस आउर मनुक होउन बले आपने के महापरभु बलसीस!
34 जीसु हुनमन के बललो, “काय, तुमचो नियम-कानुनमन ने नी लिखलोर आसे, ‘मय बलले तुमी सपाय परभुमन आहास?’†
35 महापरभु हुनमन के परभु बललो, जोनमन लगे महापरभु चो बचन अमरली (आउर पवितर सास्तर चो गोट अमदेया सत रयसे)।
36 जेके बुआ पवितर मानुन संवसार ने पठालोसे, हुनके तुमी काय काजे, तुय महापरभु के निंदरसीस बलसास? काय एईकाजे कि आपने के, ‘मय महापरभु चो बेटा आंय’ बलले?
37 मय आपलो बुआ चो बुता नी करेंसे जाले, मोके नी पतेयाहा।
38 मानतर मय करेंसे जाले, मोके नी पतेयालोने बले, हुन बुतामन के तो पतेयाहा। तेबे तुमी जानासे आउर समजासे कि बुआ मोचो ने आसे, आउर मय बुआ ने आंसे।”
39 तेबे हुनमन फेर जीसु के धरतो काजे होला, मानतर हुन, हुनमन के धरा नी पड़लो।