11
तुमी मोचो असन चला, जसन मय किरिस्त ने चलेंसे।
सेवा बेरा बायलेमन मुंड-ढेकी देतोर
2 ए भाईमन, मय तुमके एईकाजे सहरायंसे कि सपाय गोट ने तुमी मोके सूरता करसास, आउर मोचो दिलो सिखियामन के मानसास।
3 मानतर मय मन करेंसे कि तुमी ए गोट के जाना, सपाय मनुकमन चो मुंडी किरिस्त आय, आउर बायले चो मुंडी मनुक आय, आउर किरिस्त चो मुंडी महापरभु आय।
4 जोन मनुक मुंड-ढेकी देउन पारथना नोहले अगमगोट सांगेसे, हुन आपलो मुंडी बललोने किरिस्त चो इजित धरेसे।
5 मानतर जोन बायले मुंड-ढेकी नी देउन पारथना नोहले अगमगोट सांगेसे, हुन आपलो मनुक चो इजित धरेसे। कसनबलले हुन मुंडरी होलो असन आय।
6 बायले मुंड ढेकी नी देये जाले, चूंदी के बले कतराओ। बायले के चूंदी कतरातोर नोहले खुरातोर लाज चो गोट आय जाले, हुन मुंड ढेकी देओ।
7 हव, मनुक के आपलो मुंड-ढेकी देतोर नी बने कसनबलले हुन, महापरभु चो घटन आउर मयमा आय, मानतर बायले, मनुक चो मयमा आय।
8 कसनबलले मनुक के बायले ले नी बनालोसे, मानतर बायले के मनुक ले बनालोसे।
9 मनुक के बायले काजे नी बनालोसे, मानतर बायले के मनुक काजे बनालोसे।
10 एईकाजे बायले के मुंड-ढेकी देतोर, आपलो मनुक चो हक ने रतो चीना आय, जेके सरगदूतमन बले धियान देयसोत।
11 तेबले बले परभु ने, बायले नोहलोर मनुक आउर मनुक नोहलोर बायले नी रयसोत।
12 कसनबलले बायले, मनुक ले बनलीसे; उसनेचे मनुक, बायले ले जनमलोसे। मानतर सपाय महापरभु बाटले आय।
13 तुमी बिचार करुन दखा, काय, बायले मुंड-ढेकी नी देउन महापरभु के पारथना करतोर नंगत आय?
14 काय, तुमी नी जानास संवसारी नीती ने बले मनुक चो लाम चूंदी बड़ातोर लाज चो गोट आय?
15 मानतर बायले लाम चूंदी बड़ालोने हुनके फोबेसे, कसनबलले चूंदी हुनके मुंड-ढेकी असन दिलोर आसे।
16 मानतर कोनी गोट उलटायसे जाले, ए जानो कि आमचो आउर महापरभु चो मंडलीमन चो असनी नीती आय।
परभु-भोज
17 मय एदांय हुकुम देतो बेरा तुमके नी सहरायंसे, एईकाजे कि तुमचो जुहलोने बले भलई नी होयसे, मानतर बदी होयसे।
18 कसनबलले पईल गोट एई आय कि तुमी मंडली ने गोटकी सोर ने नीआहास बलुन मय सुनलेसे, आउर ए गोट के मय खिंडिक-आदक पतेयायंसे।
19 तुमीमन मंडली ने भिने-भिने होआसे चे, एचोले जानुक होयदे, तुमीमन ले कोन महापरभु ने चोखा आसे।
20 जेबे बले तुमी जुहा होउन खायसास, हुन परभु-भोज नोआय।
21 कसनबलले खातो बेरा तुमी गोटोक-दुसर ले आगे भात खायसास, असन ने कोनी भूके रयसास आउर कोनी मुहड़ा भागतले खाउन-पीउन आसास।
22 खातो पीवतो काजे काय तुमचो घर नीआय? काय महापरभु चो मंडली के हिनस्ता समजसास आउर जेचो लगे भात नीआय हुनके लाज पड़ायसास? मय, तुमके काय बलेंदे? काय, ए गोटमन ने तुमके सहरायंदे? नाई, मय केबई नी सहरायें।
23 कसनबलले परभु-भोज चो सिखिया मोके परभु ले मिरली, आउर मय तुमके बले दिले; परभु जीसु के धरा पड़ालो ले आगे,
24 हुनी राती जीसु रोटी धरलो, आउर महापरभु के धन-धन करुन रोटी के गोंदा करलो आउर बललो: “ए रोटी मोचो देहें आय, जोन तुमचो काजे आय, मोके सूरता करतो काजे तुमी असने करा।”
25 एई नीती ले जीसु रोटी खादलो पाछे बटका* धरुन बललो, “ए मोचो लोउ चो बटका महापरभु चो नवा बायदा चो चीना आय, जेबे बले तुमी एचोले पीयासे, मोके सूरता करतो काजे पीया”।
26 कसनबलले जेबे बले तुमी ए रोटी ले खायसास, आउर ए बटका ले पीवसास, परभु एओतले तुमी हुनचो मोरना चो खबर सांगते राहा।
27 एईकाजे जोन कोनी अडरा नीती ले ए रोटी खायसे आउर ए बटका ले पीयेसे, हुन, परभु चो देहें आउर लोउ चो दोसी होयसे।
28 एईकाजे तुमी ए रोटी ले खादलो ले आउर बटका ले पीवलो ले आगे आपने के परखा।
29 कसनबलले जोन कोनी अडरा नीती ले ए रोटी ले खायसे आउर बटका ले पीयेसे हुन, ए खातो-पीवतो बाटले आपलो ची उपरे डंड आनेसे।।
30 एईकाजे तुमीमन ले खुबे लोग निमल आउर बेमार आसास आउर खुबे लोग मोरला बले।
31 आमी, आगे खुद के परखतु जाले, महापरभु ले डंड नी पावतु।
32 मानतर परभु आमके डंड देउन परखेसे कि आमी संवसार चो लोगमन संगे दोसी नी होउ।