आत्मिक बरमन
12
ए भाईमन, मय मन करेंसे कि तुमी आत्मिक बरदानमन चो बारे ने पक्का ले जाना।
2 तुमी जानेसाहास, जेबे तुमी बिजाती रलास तेबे कोंदी मूरतमन चो नीती ले जसन करा बलले उसनेची तुमी बले करते रलास।
3 एईकाजे मय तुमके चेतायसे कि महापरभु चो आत्मा ने होउन कोनी, जीसु के सराप देउक नी सके, आउर पवितर आत्मा नोहलोर कोनी, “जीसु, परभु आय” बलुक नी सके।
4 बरदानमन तो बरन-बरन चो आसे, मानतर पवितर आत्मा गोटकी ची आय।
5 सेवा बले बरन-बरन चो आसे, मानतर परभु गोटकी चे आय।
6 आउर अचरित बुतामन बले बरन-बरन चो आसे, मानतर महापरभु गोटकी चे आय, जोन सपाय लोगमन के बरन-बरन चो बुता करतो सकत देयसे।
7 सपाय चो भलई काजे गोटोक-गोटोक के आत्मा चो बरमन दिलोसे।
8 जसन एकलो के पवितर आत्मा बाटले बुद ले बचन सांगतो आउर दुसर के हुनी आत्मा बाटले गियान चो गोटमन सांगतो बर देयसे।
9 उसनेची कोकई हुनी आत्मा बाटले बिसवास, आउर कोकई हुनी आत्मा बाटले उजरातो बरदान देयसे।
10 कोकई अचरित बुता करतो सकत, आउर कोकई अगमगोट सांगतो सकत आउर कोकई आत्मामन के परखतो सकत, आउर कोकई बरन-बरन चो भासा बलतो सकत, आउर कोकई भासा चो अरथ सांगतो बर देयसे।
11 ए सपाय सकत बुता हुनी गोटोक आत्मा करायसे, आउर आपलो मन-इछा ले गोटोक-गोटोक के बरमन बाटुन देयसे।
गोटोक देहें, खुबे अंगमन
12 देहें तो गोटोक आय मानतर हुनचो अंगमन खुबे आसोत। जसन गोटोक देहें ने खुबे अंग होलोने बले सबु मिलुन गोटकी देहें आय; उसनेची किरिस्त बले आय।
13 कसनबलले आमी जहूदी होओ, जूनानी होओ, कमेया होओ, छुटबीता होओ, सपाय गोटकी पवितर आत्मा बाटले गोटकी देहें होतो काजे बपतिस्मा धरलु, आउर आमी सपाय हुनी गोटकी पवितर आत्मा चो भागी होलुसे।
14 एईकाजे कि देहें गोटकी अंग ले नी बनलीसे, मानतर खुबे अंगमन ले बनलीसे।
15 पांय बलेदे कि, “मय हाथ नोआंय, एईकाजे मय देहें चो अंग नोआंय”, तेबे काय, हुन देहें चो अंग नोआय?
16 आउर कान बलेदे कि, “मय आंईक नोआंय, एईकाजे मय देहें चो अंग नोआंय”, तेबे काय, हुन देहें चो अंग नोआय?
17 सपाय देहें आंईक होलोने कहां ले सुनुक होती, आउर सपाय देहें कान होलोने कहां ले सुंगुक होती?
18 मानतर सते महापरभु सपाय अंगमन के आपलो मन-इछा ले गोटोक-गोटोक करुन देहें ने संगालोसे।
19 सपाय गोटकी अंग होलोने देहें कहां रती।
20 असने बरन ले अंग तो खुबे आसोत, मानतर देहें तो गोटकी चे आय।
21 आंईक, हाथ के बलुक चे नी सके, “मोके तुचो जरुरत नीआय”, आउर मुंड, पांयमन के बलुक चे नी सके “मोके तुचो जरुरत नीआय”।
22 मानतर देहें चो हुन अंग, जोन दुसर अंग ले निमल लागेसे, हुनचो बले खुबे जरुरत आय।
23 आउर देहें चो जोन अंग के आमी मान लाईक चो नी समजुंसे, हुनके आमी खुबे मान देउंसे, आउर आमचो सुंदर नी लागतो अंग के खुबे धियान देउंसे।
24 मानतर आमचो सुंदर दखा देतो अंगमन के काई धियान चो जरुरत नीआय। महापरभु देहें के असन बनालो जोन अंग चो मान नी रली, हुनके खुबे मान मिरो।
25 एईकाजे कि देहें चो अंगमन सोर ने रओत आउर गोटोक-दुसर चो धियान करोत।
26 उसनेची गोटोक अंग दुख पायसे जाले, हुनचो संगे सपाय अंग दुख पायसोत, आउर गोटोक अंग मान पायसे जाले, हुनचो संगे सपाय अंग हरिक होयसोत।
27 असने चे तुमी सपाय मिसुन किरिस्त चो देहें आहास, आउर हुनचो अलग-अलग अंग आहास।
28 आउर महापरभु, मंडली ने अलग-अलग लोग के बाछलोसे, पईल पठालो-बीतामन, दुसर अगमजानीमन, तीसर गुरुमन, फेर अचरित बुता करु बीतामन, आउर जेके उजरातो चो बर मिरलीसे, भलई करु बीतामन, दखा-राखा करु बीतामन आउर बरन-बरन चो भासा बलतो बीतामन।
29 काय, सपाय पठालो-लोगमन आत? काय, सपाय अगमजानीमन आत? काय, सपाय गुरुमन आत? काय, सपाय अचरित बुता करु बीतामन आत?
30 काय, सपाय के उजरातो बर मिरलीसे? काय, सपाय बरन-बरन चो भासा बलसोत? काय, सपाय दुसर भासा चो अरथ समजाउक सकोत?
31 नाई, तुमी बड़े ले बड़े बरमन चो लय ने राहा।
मानतर मय तुमके सबुले नंगत बाट दखायंसे।