मया, सबुले नंगत आय
13
मय, मनुकमन आउर सरगदूतमन चो भासामन गोटेयायंदे, आउर मया नी करे जाले, मय ठन-ठन बाजतो पीतल आउर झन-झन बाजतो झांझ आंय।
2 आउर मय, अगमगोट सांगुक सकें आउर सपाय भेदमन आउर बुद चो गोटमन के जानेंसे, मोके इतलो बिसवास आसे कि डोंगरीमन के सरकाउक सकें, मानतर मया नी करे जाले मय काई चे नोआंय।
3 मय मोचो सपाय धन-माल के गरीबमन के दान देयंदे, नोहले मोचो देहें के जरातो काजे देयंदे, आउर मया नी करें तेबे मोके काई नफा नी होए।
4 मया ने धीरजा आउर दया आसे। मया, ईरका-कुचर नी करे; मया, आपलो बड़ाई नी करे, आउर गुमान नी करे।
5 हुन अडरा नीती ने नी चले, हुन आपलो भलई नी डगराये, चिड़चिड़ाय नी होए, अडरा नी बिचारे।
6 ओनियाव ले हरिक नी होए, मानतर सत ले हरिक होयसे।
7 मया सपाय गोटमन के सहेसे, सपाय गोटमन के पतेयायसे, सपाय गोटमन चो आसा करेसे आउर सपाय गोटमन ने धीरजा धरेसे।
8 मया जुग-जुग रउआय, अगमगोट मेटुन जायदे, भासामन बले सरेदे, बुद बले मेटुन जायदे।
9 कसनबलले आमचो बुद अदगंडी आय, आउर आमचो अगमगोट बले अदगंडी आय।
10 मानतर जेबे सपाय सिद होदे, तेबे अदगंडी मेटेदे।
11 जेबे मय पिला रले, तेबे मय पिलामन असन गोटेयाते रले, पिलामन असन मन रली, पिलामन असन समज रली; मानतर जेबे मय सियान होले, तेबे पिला-बुद के छांडले।
12 एदांय आमके दरपन ने झांवरी-झांवरी असन दखा देयसे। मानतर हुदलदांय पुरे छमा-छम दखेंदे, एबे मोचो बुद अदगंडी आसे, मानतर हुदलदांय नंगत ले चितायंदे, जसन मोके चितालासे।
13 एदांय बिसवास, आसा, मया, अमदेया रयदे, मानतर ए सबुले बड़े मया आय।