अगमगोट आउर दुसर भासामन
14
मया चो लय ने राहा, आउर आत्मिक बरमन चो आउर जुगे करुन अगमगोट सांगतो आसा ने राहा।
2 कसनबलले जोन दुसर भासा ने गोटेयायसे, हुन मनुकमन ले नाई, मानतर महापरभु ले गोटेयायसे, एईकाजे हुनचो गोटमन के कोनी नी समजोत। कसनबलले हुन पवितर आत्मा चो सकत बाटले भेद चो गोटमन गोटेयायसे।
3 मानतर जोन अगमगोट सांगेसे, हुन, मनुकमन के आत्मिक बाड़ती गोट, भोरसा देतो गोट, आउर अस्तिर चो गोट सांगेसे।
4 जोन दुसर भासा ने गोटेयायसे हुन आपले चे बाड़ती करेसे, मानतर जोन अगमगोट सांगेसे, हुन मंडली चो बाड़ती करेसे।
5 मय मन करेंसे कि तुमी सपाय, दुसर भासा ले गोटेयाहा, मानतर एचोले आगर मन करेंसे कि तुमी अगमगोट सांगा, कसनबलले मंडली चो बाड़ती काजे दुसर भासा ने गोटेयातो चो अरथ कोनी नी समजायसे जाले, अगमगोट सांगतो बीता हुनचो ले बड़े आय।
6 एईकाजे ए भाईमन, तुमचो लगे एउन मय दुसर भासामन ने गोटेयाले, तुमके काय नफा होयदे? काई चे नाई, मानतर मय दरसन दखलो गोट, बुद चो गोट, अगमगोटमन नोहले सिखियामन सांगले, तुमके नफा होयदे।
7 असने चे बांवसी नोहले मोहरी बजातो पाड़ ने भेद नी रलोने, दुनो ने कोके बजायसे बलुन कसन ने चिताउक होयदे?
8 आउर तोड़ी चो लड़ई-पाड़ सरसरा नी होलोने कोन लड़ई काजे तियार होदे।
9 असने चे तुमी बले टोंड ले सरसरा गोटमन नी गोटेयालोने तुमी काय बलसास बलुन कसन ने समजदे? तेबे तुमचो गोट फोकाहा होयदे।
10 संवसार ने कितलेई बरन चो भासामन होलोने बले हुनमन ले कोनी भासा अरथ नोहलोर नीआय।
11 एईकाजे मय कोनी भासा चो अरथ नी समजले जाले, गोटेयातो बीता चो नंजर ने मय परदेसिया होयंदे, आउर गोटेयातो बीता मोचो नंजर ने परदेसिया होयदे।
12 एईकाजे जेबे तुमी आत्मिक बरदानमन चो लय ने आसास, तेबे असन मसागत करा कि तुमचो बरमन चो बाड़ती ले मंडली चो बाड़ती होओ।
13 जोन दुसर भासा गोटेयादे, हुन पारथना करो कि हुनचो अरथ बले सांगुक सको।
14 मय दुसर भासा ने पारथना करेंसे जाले, मोचो आत्मा पारथना करेसे, मानतर मय खुदे नी समजेसे कि मय काय बलेंसे।
15 असन ने काय करतोर आय? मय आत्मा ले पारथना करेंदे, आउर बुद ले बले पारथना करेंदे, आत्मा ले गायंदे आउर बुद ले बले गायंदे।
16 नोहले तुय आत्मा बाटले दुसर भासा ने धन-धन करले, हुन भासा नी जानतो बीता कसन ने तुचो पारथना ने, “आमीन” बलेदे, कसनबलले हुन नी जाने कि तुय काय बलसीस।
17 तुय तो नंगत ले महापरभु के धन-धन करसीस, मानतर एचोले दुसर चो बाड़ती नी होए।
18 मय, मोचो महापरभु के धन-धन करेंसे कि मय तुमीमन सपाय ले आगर दुसर भासामन ने गोटेयायंसे;
19 मानतर मंडली ने दस हजार गोटमन दुसर भासा ने गोटेयातो पलटा दुसर के सिखातो काजे बुद ले हुनीमन चो भासा ने पांचे ठन गोट बलतोर नंगत आय।
20 ए भाईमन, तुमी समजतो ने पिला असन नी राहा; मानतर सियान होआ आउर अडरा बुता करतोने पिला असन राहा।
21 नियम-कानुन ने लिखलीसे कि परभु बलेसे:
“मय, दुसर भासा गोटेयातो बीतामन बाटले
आउर परदेसियामन चो टोंड ले
एमन ले गोटेयायंदे,
तेबे बले एमन मोचो गोट नी धरदे।”
22 एईकाजे दुसर भासा ने गोटेयातोर, पतेयातो लोग काजे नोआय, मानतर नी पतेयातो लोगमन काजे चीना आय, आउर अगमगोट, नी पतेयातो लोगमन काजे नोआय, मानतर पतेयातो लोगमन काजे चीना आय।
23 मंडली चो लोग जुहा होउन सपाय दुसर-दुसर भासामन ने गोटेयातो बेरा, कोनी बाहर चो लोग नोहले नी पतेयातो लोग भीतरे ईलोने काय, तुमके बोयामन आत नी बलदे?
24 मानतर सपाय, अगमगोट गोटेयातो बेरा कोनी नी पतेयातो लोग नोहले बाहर चो लोग ईलोने, सपाय हुनके परखुन दोसी बलदे आउर हुन आपलो पाप ले पसतायदे,
25 हुन आपलो मन चो भेद के सांगेदे आउर हुन महापरभु के डंडासरन करुन बलेदे कि सते महापरभु तुमचो संगे आसे।
मंडली चो नीती
26 एईकाजे ए भाईमन, तुमी जुहा होलोने काय करतोर आय? सपाय चो आत्मिक बाड़ती काजे कोनी गीत गाहा, कोनी सिखिया गोट सांगा, कोनी दरसन दखलो गोट के सांगा, कोनी दुसर भासा ने गोटेयाहा आउर कोनी दुसर भासा चो अरथ सांगा।
27 दुसर भासा ने गोटेयातो लोगमन खुबे रलोने, दुय नोहले तीन झन पारी-पारी ले गोटेयाहा आउर कोनी बले गोटोक झन हुनचो अरथ सांगो।
28 मानतर अरथ सांगतो बीता नीआय जाले, दुसर भासा गोटेयातो बीता मंडली ने ओगाय रओ। आउर मने-मने सुमरो आउर महापरभु ले गोटेयाओ।
29 अगमजानीमन ले दुय नोहले तीनझन सांगोत आउर आदो लोग हुनमन चो बचन के परखोत।
30 मानतर दुसर मनुक के महापरभु चो दरसन दखा दिलोने पईल बीता ओगाय रओ।
31 कसनबलले तुमी सपाय पारी-पारी ले अगमगोट सांगुक सकास, तेबे सपाय सीखदे आउर अस्तिर पावदे।
32 आउर अगमजानीमन चो आत्मा, अगमजानीमन चो हक ने आसे।
33 कसनबलले महापरभु नसाउ नोआय, मानतर अस्तिर देतो महापरभु आय।
जसन पवितर लोगमन चो सपाय मंडलीमन ने अस्तिर देयसे।
34 नियम-कानुन ने लिखलीसे, बायलेमन मंडली ने ओगाय रओत। कसनबलले हुनमन के मंडली ने गोटेयातोर नी बने।
35 हुनमन के काई सीखुक भायसे जाले घरे आपलो मनुक के पूछोत, कसनबलले मंडली ने बायले चो गोटेयातोर लाज चो गोट आय।
36 काय महापरभु चो बचन तुमचो ले निकरलीसे? नोहले काय तुमचेई लगे अमरलीसे?
37 कोनी मनुक आपने के अगमजानी नोहले आत्मिक लोग समजेसे जाले, ए जानो कि मोचो लिखलो गोटमन परभु चो हुकुम आय।
38 मानतर कोनी ए हुकुममन के नी माने जाले, हुनके तुमी बले नी माना।