किरिस्त चो जीव उठतोर
15
ए मोचो भाईमन, एदांय मय तुमके हुनी नंगत खबर के सूरता करायंसे, जेके मय आगे सुनाउन रले, हुनके तुमी मानते रलास, आउर हुनी गोट ने तुमी एबे बले चमकट आसास।
2 मोचो सुनालो नंगत खबर ने चमकट रलास जाले, तुमी मुक्ति पाहासे, नोहले तुमचो पतेयातोर फोकाहा आय।
3 एईकाजे मय, तुमके सबुले धियान देतो गोट के सांगले जसन मय सुनुन रले, पवितर सास्तर चो हिसाब ने जीसु किरिस्त आमचो पापमन काजे मोरलो,
4 पाछे हुनके करपन ने संगाला*, आउर पवितर सास्तर चो हिसाब ने तीसर दिने जीव उठलो,
5 आउर किरिस्त, कयफा (पतरस) के दखा दिलो पाछे, बाराझन चेलामन के दखा दिलो।
6 फेर पांच सव ले आगर भाईमन के गोटकी संगे दखा दिलो, हुनमन ले खुबे एबे बले जीव आसोत, मानतर आदो मोरला।
7 फेर हुन, जाकूब के दखा दिलो पाछे, सबु पठालो-लोगमन के दखा दिलो।
8 मय दिन नी पुरुन जनमलो पिला असन होले बले, सबुले पाछे मोके बले दखा दिलो।
9 मय सबु पठालो-लोगमन ले नानी आंय, बललोने पठालो-लोग बलाय होतो लाईक बले नोआंय, कसनबलले मय, महापरभु चो मंडली के डाटा-टेवा करुन रले।
10 मानतर मय जोन बले आंय, महापरभु चो दया ले आंय। मय सबु पठालो-लोगमन ले आगर मसागत करले, एई बले महापरभु चो दया ले होली, मोचो बाटले नाई। कसनबलले हुनचो दया मोचो उपरे फोकाहा नी होली।
11 एईकाजे नंगत गोट के मय सुनायें नोहले दुसर सुनाओत, आमी सबु गोटकी नंगत खबर के सुनाउंसे, आउर एईची नंगत खबर के तुमी पतेयालास।
आमचो जीव उठतोर
12 जेबे किरिस्त चो नंगत खबर सुनायसोत कि हुन मोरलो थान ले जीव उठलो, तेबे तुमीमन ले कोनी-कोनी कसन बलसास कि मोरलोमन जीव उठुची नोआत?
13 मोरलोमन जीव उठुची नोआत जाले, किरिस्त बले नी जीव उठलोसे।
14 आउर किरिस्त जीव नी उठलोसे जाले, आमचो नंगत खबर सुनातोर फोकाहा आय, आउर तुमचो बिसवास करतोर बले फोकाहा आय।
15 एईकाजे आमी महापरभु चो फंदी गवई होउंसे, कसनबलले आमी महापरभु चो बारे ने असन गवई दिलुसे कि हुन किरिस्त के जियालो। मोरलोमन जीव उठुची नोआत जाले, महापरभु बले किरिस्त के नी जियालो।
16 आउर मोरलोमन जीव नी उठोत जाले, किरिस्त बले जीव नी उठलोसे।
17 किरिस्त जीव नी उठलोसे जाले, तुमचो बिसवास फोकाहा आय, आउर तुमी एबे बले पापमन ने पड़लासास।
18 असन ने जोन किरिस्त ने मोरला, हुनमन बले नास होला।
19 आमी एई जीवना भर काजे किरिस्त ने आसा करुंसे जाले, आमी सपाय मनुकमन ले आगर ओभागी आंव।
20 मानतर सते किरिस्त, मोरलो थान ले जीव उठलोसे आउर मोरुन जीव उठतोमन ले हुन, पईलात होलो।
21 कसनबलले जसन गोटोक मनुक, बललोने आदम बाटले मोरना संवसार ने ईली, उसनेची एबे मोरलोमन चो जीव उठतोर बले दुसर गोटोक मनुक, बललोने जीसु किरिस्त बाटले होली
22 जसन आदम बाटले सपाय लोगमन मरसोत, उसनेची किरिस्त ने सपाय लोगमन जीव उठदे।
23 मानतर सपाय आपलाहान पारी ले: पईल फर किरिस्त, आउर पाछे, किरिस्त फेर एतोदांय हुनचो लोगमन।
24 हुदलदांय किरिस्त सपाय राजामन के, सपाय हक के आउर सपाय सकत के नास करुन, राज के आपलो बुआ महापरभु के सोपुन देयदे। एचो पाछे संवसार सरेदे।
25 महापरभु सपाय बयरीमन के किरिस्त चो हक ने करतले, किरिस्त राज करतोर जरुर आय।
26 आउर सबुले सरासरी ने आपलो बयरी मोरना के बले नास करेदे।
27 कसनबलले पवितर सास्तर बलेसे, “महापरभु सपाय के हुनचो पांय खाले करलोसे।” जेबे बलेसे कि “महापरभु सपाय के हुनचो पांय खाले करलोसे”, तेबे ए दखायसे कि महापरभु आपने के अलगे करुन “सपाय के” किरिस्त चो हक ने दिलोसे।
28 जेबे सपाय के जीसु चो हक ने करुन दिलोसे, तेबे बेटा बले महापरभु चो हक ने होयदे, जेचोले सपाय बाटे महापरभु चो राज होयदे।
29 एदांय मोरलोमन जीव नी उठोत जाले, फेर काय काजे मोरलोमन काजे बपतिस्मा धरसोत?
30 आउर आमी बले काय काजे अमदेया गराहां ने पड़ुन रउंसे?
31 ए मोचो भाईमन, तुमचो काजे मोचो गुमान, आमचो परभु जीसु किरिस्त ने आसे; हुनचो किरिया खाउन बलेंसे: “मय रोजे दिना मोरना ले जुजेंसे।”
32 मनुकमन चो नीती ले, मय इफिसुस ने रान जियादमन संगे लड़लो असन मनुकमन संगे लड़ले, तेबे मोके काय नफा होली? मानतर मोरलोमन के जीव नी उठाय जाले, इआ आमी खाउं-पीउं। कसनबलले “आजी नोहले काली के तो मोरतोर चे आय।”
33 धोका नी खाहा, “अडरा संगत, नंगत चलनी-बुलनी के नसायसे।”
34 चेत ने राहा, पाप नी करा। कसनबलले मय तुमके लाज पड़ातो काजे बलेंसे, तुमीमन ले कोनी-कोनी महापरभु के मुरे नी जानोत।
मोरुन जीव-उठलो देहें
35 एदांय कोनी असन पुछदे, “मोरलोमन कसन ने जीव-उठदे? आउर हुनमन चो देहें कसन बरन चो होयदे?”
36 ए भकवा, तुय जोन बले बुनसीस, हुन मोरलोर नोहलोर नी अखरे।
37 तुय बुटा के नाई, मानतर सोजे बीच के बुनसीस - गउं चो नोहले काई दुसर अरन चो।
38 मानतर महापरभु आपलो मन-इछा ले हुन बीचा के फोबतो असन देहें के देयसे।
39 सपाय चो मास गोटकी असन नोआय। मनुकमन चो मास, जनावरमन चो मास, चड़ईमन चो मास आउर मछरीमन चो मास भिने-भिने आय।
40 सरगपुर चो देहें आसोत, आउर मंजपुर चो देहें बले आसोत, मानतर सरगपुर चो देहेंमन चो आउर मंजपुर चो देहेंमन चो मयमा भिने-भिने आय।
41 बेर चो उजर, जोन चो उजर आउर तारामन चो उजर भिने-भिने आय। गोटोक तारा ले, दुसर तारा चो उजर बले भिने-भिने आय।
42 मोरलोमन चो जीव उठतोर बले असने ची होयदे, मोड़ीमन के माटी देयसोत बललोने बुनसोत, आउर केबई नी मोरतो काजे जीव उठसोत।
43 आमचो मोड़ीमन के हिनस्ता ने माटी देयसोत, मयमा ले जीव उठसोत; निमल ने माटी देयसोत, सकत ले जीव उठसोत।
44 संवसारी देहें के माटी देयसोत, आत्मिक देहें जीव उठसोत। संवसारी देहें आसे जाले, आत्मिक देहें बले आसे।
45 धरमसास्तर ने लिखलीसे, पईल आदम जीवता मनुक होलो, आउर आखरी आदम बललोने, जीसु जीव देतो आत्मा होलो।
46 आगे आत्मिक नी रला, सोजे संवसारी रला, मानतर पाछे आत्मिक होला।
47 पईल मनुक आदम, मंजपुर चो बललोने माटी चो रलो, दुसर मनुक जीसु, सरग चो आय।
48 जसन हुन आदम माटी चो रलो, उसनेचे हुनमन बले आत, जोन माटी चो आत; जसन हुन जीसु, सरगपुर चो आय, उसनेचे हुनमन बले आत जोन सरगपुर चो आत।
49 जसन आमी, माटी चो रलो मनुक आदम चो रूप धरलु, उसनेची आमी, सरगपुर चो मनुक जीसु चो बले रूप धरुंदे।
50 ए मोचो भाईमन, मय तुमके सांगेसे, मास आउर लोउ महापरभु चो राज चो हकदार नी होउक सकोत, आउर आमचो कुउतो देहें, केबई नी कुउतो देहें चो हकदार होउक नी सके।
51 दखा, मय तुमके भेद चो गोट सांगेंसे, आमीमन ले आदो नी मरु, मानतर आमी सपाय चो रूप बदलेदे।
52 कसनबलले डंडिक ने बललोने टिपरी मारते खन, सरासरी तोड़ी फूकते खन चे मोरलोमन के जुग-जुग जीव रतो काजे जीव उठायदे, आउर आमी जीव रलो लोगमन चो रूप बदलेदे।
53 कसनबलले आमचो कुउतो देहें, नी कुउतो देहें ने बदलेदे, आउर मोरतो देहें, अमर होतो देहें ने बदलेदे।
54 आउर जेबे आमचो कुउतो देहें, केबई नी कुउतो देहें ने बदलेदे; आउर मोरतो देहें, अमर होतो देहें ने बदलेदे; तेबे धरमसास्तर ने लिखलो बचन पुरा होयदे,
“जीत, मोरना के गिरलो।”†
55 “ए मोरना, तुचो जीत कहां आसे?
ए मोरना, तुचो बिस-काटा कहां आसे?”†