पवितर भाईमन काजे सारी पाड़तोर
16
जरूसलेम चो पवितर भाईमन काजे सारी पाड़तो हुकुम गलाती चो मंडलीमन के जसन मय दिलेसे, उसनेची तुमी बले सारी पाड़ा।
2 हपता चो पईल दिने तुमी सबु, आपलो कमई ले खिंडिक बचाउन संगावा कि मोचो ईलोने सारी पाड़ुक नी पड़ो।
3 आउर मय ईलोने, तुमचो मन करतो लोगमन चो हाथे चिटी देउन, तुमचो दान के जरूसलेम ने पठायंदे।
4 मोके जाउक होली जाले हुनमन बले मोचो संगे एदे।
पउलुस चो जातो उआट
5 मय मकिदुनिया बाटले तुमचो लगे एयंदे कसनबलले मोके मकिदुनिया बाटले जातोर चे आय।
6 मानतर होली जाले तुमचो थाने ठेबेंदे आउर सीतकार सरतले रउक बले सकें, आउर जोन बाटे बले मोके जातोर होयदे मोके बाट-भाता देउन बिदा करुन दियासे।
7 कसनबलले एदांय मोके तुमचो थाने एउनचे जाउक नी भायसे, मानतर मोके आसा आसे कि परभु मन करलो जाले, दिना दुयक तुमचो संगे रयंदे।
8 मानतर मय पेंतिकुस तिहार सरतले इफिसुस ने रयंदे।
9 कसनबलले हुता मोके नंगत खबर सांगतो काजे पक्का मोहका मिरलीसे। मानतर बयरीमन बले खुबे आसोत।
10 दखा, तीमुथियुस ईलो जाले, हुनके काई तकलीस होउक नी दियास, कसनबलले हुन बले मोचो असन परभु चो बुता करुआय।
11 एईकाजे कोनी हुनके नानी नी समजा, मानतर हुनके अस्तिर ने मोचो लगे अमराउन दियास। कसनबलले मय हुनचो बाट दखेंसे कि हुन भाईमन संगे एओ।
12 एदांय आमचो भाई अपुलोस के मय खुबे गुहार करलेसे कि तुमके भेट-घाट होउक भाईमन संगे जाओ, मानतर हुन एबे जाउक मन नी करेसे, जेबे मोहका मिरेदे तेबे एयदे।
सरासरी हुकुम आउर जुहार
15 ए भाईमन, तुमी स्तिफनास चो कुटुम के जानसास, हुनमन अखाया परघन चो पईल किरिस्त लोग आत जोन पवितर लोगमन चो सेवा-सुस्तारा करतो काजे पुरे रयसोत।
16 एईकाजे तुमके गुहार करेंसे कि असन लोगमन चो हक ने राहा, आउर हुन लोगमन चो बले जोन ए सेवा-बुता के एक सोर ने मिलुन-मिसुन करसोत।
17 मय स्तिफनास आउर फुरतुनातुस आउर अखइकुस चो ईलोके हरिक होले, कसनबलले हुनमन तुमचो कमी-घटी के पुरा करला।
18 जसन हुनमन तुमके अस्तिर करला उसनेची मोके बले अस्तिर करलासे, एईकाजे असन लोगमन के मान करा।
19 आसिया चो मंडली बाटले तुमके जुहार, अकविला आउर पिरस्किला चो आउर हुनमन चो घर चो मंडली बाटले बले तुमके परभु ने खुबे-खुबे जुहार।
20 सपाय भाईमन बाटले तुमके जुहार, गोटोक दुसर के पवितर चूमा ले जुहार करा।