लूका 23

रोम राज चो नानी राजा पिलातुस चो पुरे जीसु

(मत्‍ती 27:1-2, 11-14; मरकुस 15:1-5; जूहन्‍ना 18:28-38)

तेबे धरम-मंडली चो जमाय लोगमन जुहुन जीसु के पिलातुस लगे नीला।

2 आउर हुनमन असन बलुन हुनचो उपरे दोस लगाउक मुरियाला, “आमी एके लोगमन के बिडराते आउर कयसर राजा के पट्‍टी नी दिया बलते, आउर आपने के जहूदीमन चो किरिस्‍त आउर राजा आय बलते सुनलुसे।”

3 पिलातुस हुनके पूछलो: “काय, तुय जहूदीमन चो राजा आस?” जीसु हुनके बललो: “तुय आपने बलसीस।”

4 तेबे पिलातुस, पुजारीमन चो मुखियामन आउर लोगमन के बललो: “मय, ए मनुक ने काई दोस नी पायेंसे।”

5 मानतर हुनमन आउर बले जोर करुन बलुक धरला, “ए मनुक गलील ले धरुन एथा जमाय जहूदिया परघन ने, सिखिया देउन लोगमन के बिडरायसे।”

6 एके सुनुन पिलातुस पूछलो: काय, ए मनुक गलीलेया आय?

7 जीसु, हेरोद अंदिपास^* चो रियास चो आय जानुन, पिलातुस हुनके हेरोद अंदिपास लगे पठाउन दिलो, कसनबलले हुन दिनमन ने हेरोद अंदिपास, जरूसलेम ने रये।

लूका 23:1-7

हेरोद चो पुरे जीसु

8 हेरोद जीसु के दखुन खुबे हरिक होलो, कसनबलले हुन जीसु के खुबे दिन ले दखतो काजे मन करते रये, हुन जीसु चो बारे ने खुबे सुनुन रये आउर हुनचो ले काई चीना के दखुक मन करते रये।

9 हेरोद हुनके खुबे गोटमन के पूछलो, मानतर जीसु ओगाय रलो।

10 पुजारीमन चो मुखियामन आउर धरम-पंडितमन उबा होउन जीसु के बानी-बानी चो दोस लगाउक धरला।

11 तेबे हेरोद आपलो पाईकमन संगे हुनचो इजित धरलो आउर हांसी-खेली करलो आउर हुनके झकमक बिती फटई पींदाउन पिलातुस लगे बोहड़ाउन दिलो।

12 हुनी दिन ले पिलातुस आउर हेरोद मीत होउन गेला; एचोले आगे हुनमन गोटोक, दुसर चो बयरी रला।

लूका 23:8-12

मोरते मारतो चो हुकुम

(मत्‍ती 27:15-26; मरकुस 15:6-15; जूहन्‍ना 18:39–19:16)

13 पिलातुस, पुजारीमन चो मुखियामन, जहूदी मुखियामन आउर लोगमन के हागदेउन बललो:

14 “तुमी ए मनुक के, बिडरातो बीता आय बलुन मोचो लगे आनलासाहास, मानतर दखा, मय एके तुमचो पुरे परखुन दखले, आउर हुनचोने काई दोस नी पावलेसे, जसन तुमी दोस लगायसाहास;

15 आउर दखा, हेरोद बले हुनके मोरते मारतो चो काई दोस नी पावलोसे आउर आमचो लगे बोहड़ाउन दिलोसे।

16 एईकाजे मय एके कोड़ा मारुन छांडुन देयंसे।”

17 ^*(हुन तिहार बेरा, गोटोक कयदी के छांडतोर नीती रये।)

18 तेबे हुनमन सपाय मिसुन जोर ले चिचियाला: “हुनके मोरते मार, आमचो काजे बरअबा के छांडुन दियास!”

19 बरअबा के, जरूसलेम सहर ने कोनी झगड़ा-टंटा आउर कोकई मोरते मारलो किरता जयल-घरे ढाकुन रओत।

20 पिलातुस, जीसु के छांडतो बिचार ने लोगमन के फेर समजाउन दखलो,

21 मानतर हुनमन चिचियाउन बलला: “हुनके कुरूस ने चेगाव, कुरूस ने चेगाव!”

22 हुन तीसर हार हुनमन के पूछलो: “हुन काय फंद बुता करलोसे? मय एके मोरते मारतो चो काई दोस नी पायंसे। एईकाजे मय एके कोड़ा मारुन छांडुन देयंसे।”

23 मानतर हुनमन आउर रोस ले चिचियाउन-चिचियाउन बलुक धरला कि हुनके कुरूस ने चेगाव, आउर हुनमन चो चिचियातोर जीतली।

24 एईकाजे पिलातुस हुनमन चो गुहारलोर असन करुकलाय हुकुम दिलो।

25 पिलातुस हुन मनुक के, जोन मोरते मारतो आउर उड़गाड़ी बुता चो डंड पावतो काजे जयल ने रये, हुनके लोगमन मांगतो किरता छांडुन दिलो आउर जीसु के जसन हुनमन मन करला असने ची कुरूस ने चेगातो काजे सोपुन दिलो।

लूका 23:13-25

जीसु के कुरूस ने चेगातोर

(मत्‍ती 27:32-44; मरकुस 15:21-32; जूहन्‍ना 19:17-19)

26 जिदलदांय पाईकमन, जीसु के कुरूस ने चेगातो काजे नेते रओत, तेबे बाटे हुनमन समोन नाव चो गोटोक कुरेनेया के आपलो गांव ले एतोके भेटला, हुनचो उपरे जीसु चो कुरूस के लतुन दिला कि हुनके बोउन जीसु चो पाट-पाट रेंगो।

27 कुड़ायक लोगमन जीसु चो पाट-पाट एते रला। हुन गोहड़ा ने खुबे बायलेमन जीसु काजे छाती पेटुन-पेटुन गागते रओत।

28 जीसु हुनमन चो बाटे उलटुन बललो: “ए जरूसलेम चो बेटीमन, मोचो काजे नी गागा, मानतर आपलो आउर आपलो पिलामन काजे गागा।

29 कसनबलले दखा, हुन दिन बले एयदे जेबे लोगमन बलदे, ‘भाइगमानी आय हुन बायले जोन बांझीन आय, भाइगमानी आय हुन पेट जोन पिलामन के नी जनमाली, भाइगमानी आत हुन छातीमन जोन गोरस नी पीयाली’।^*

30 हुन बेरा ने हुनमन डोंगरी के बलदे, ‘आमचो उपरे घसर’ आउर ढिपकामन के बलदे, ‘आमके ढाकी होआ’।

31 कसनबलले एमन काचा रूक संगे असन करसोत जाले, सुकलो रूक संगे काय नी करदे?”^*

लूका 23:26-31

32 आउर हुन दुयझन खंगारमन के बले, जोन अडरा बुता करुन रला, जीसु संगे मोरते मारतो काजे नीला।

33 जिदलदांय हुनमन खोपड़ी नाव चो जगा ने अमरला, तेबे जीसु के आउर हुनचो संगे दुयझन मनुकमन के कुरूसमन ने चेगाला, गोटोक के उजा हाथ बाटे आउर दुसर के डेबरी हाथ बाटे।

34 मानतर जीसु बललो: “ए बुआ, एमन के खेमा कर, कसनबलले एमन नी जानोत कि काय करसोत।” हुनमन चिटी पकाउन जीसु चो फटईमन के बाटा करला।

लूका 23:32-34

लूका 23:34

35 लोगमन उबा होउन जमाय के दखते रओत।

जहूदी मुखियामन बले, जीसु चो हांसी करुन बलते रला, “ए दुसर लोगमन के बचालो; ए, महापरभु चो किरिस्‍त आउर हुनचो बाछलोर आय जाले, एदांय आपने के बचाओ।”

36 पाईकमन बले जीसु चो कुरूस लगे एउन हुनचो हांसी करला, हुनमन जीसु के अमटालो अंगुर-रस दिला आउर बलला:

37 “तुय जहूदीमन चो राजा आस जाले, खुद के बचाव!”

38 जीसु चो कुरूस उपरे गोटोक फारा-गोंदा ने लिखुन लटकाउन दिला, “ए जहूदीमन चो राजा आय।”

लूका 23:35-38

39 दुयझन फंद बुता करुमन के कुरूस ने चेगाउन रला, हुनमन ले गोटोक जीसु के निंदरुन बललो: “काय, तुय किरिस्‍त नोआस? आस जाले, खुद के आउर आमके बले बचाव!”

40 मानतर दुसर, हुनके दागा देउन बललो: “काय, तुय डंड पावसीस बले महापरभु के नी डरीस?

41 आमी तो नियाव चो हिसाब ले डंड के पाउंसे, कसनबलले आमी आमचो करलो ची असन भुगतुंसे, मानतर ए असन डंड पावतो चो काई बुता नी करलोसे।”

42 तेबे हुन जीसु के बललो: “ए जीसु, जेबे तुय आपलो राज ने एसे, तेबे मोके सूरता कर।”

43 जीसु हुनके बललो: “मय तुके सते बलेंसे कि आजी तुय मोचो संग सरग ने रसे।”

लूका 23:39-43

जीसु चो मोरना

(मत्‍ती 27:45-56; मरकुस 15:33-41; जूहन्‍ना 19:28-30)

44 थका-थकी मुंडे बेरा ले धरुन अड़उ पाहार ले जमाय परघन ने अंधार होउन गेली, एईकाजे कि बेर उजर देउक नी सकली,

45 मंदिर चो पड़दा मंजिगता ले दुय गोंदा होउन गेली,

46 जीसु बड़े राग ले चिचियाउन बललो: “ए बुआ, मय, मोचो आत्‍मा के तुचो हाथे सोपुन देयंसे।” आउर असन बलुन आपलो जीव छांडलो।

47 रोमी पलटन चो नानी मुखिया जमाय के दखुन महापरभु के सहरालो आउर बललो, “सते ए मनुक धरमाती रये।”

48 लोगमन जोन दखुकलाय जुहुन रओत, जमाय घटलो गोटमन के दखुन कपार-छाती पेटुन गागते बोहड़ला।

49 मानतर जीसु चो जान-चीन लोगमन आउर जमाय बायलेमन जोन गलील परघन ले जीसु संगे एउन रओत फयले उबा होउन दखते रओत।

लूका 23:44-49

जीसु चो मोड़ी के करपन ने संगातोर

(मत्‍ती 27:57-61; मरकुस 15:42-47; जूहन्‍ना 19:38-42)

50 धरम-मंडली चो गोटोक मनुक, जेचो नाव जूसुफ रये, हुन नंगत आउर सतधरमी रये।

51 हुन जहूदीमन चो सोर आउर करलो बुतामन ले हरिक नी रये। हुन जहूदीमन चो सहर अरिमतिया चो रतो बीता रये आउर हुन महापरभु चो राज चो बाट टाकते रये।

52 हुन पिलातुस लगे गेलो आउर जीसु चो मोड़ी के मांगलो।

53 हुन जीसु चो मोड़ी के कुरूस ले उतरालो आउर महांग बिती चदर ने गुं‍डियाउन, हुनके असन मोठ ने संगालो, जोन डोंगरी पकना ने खनु रलो करपन रली। हुन थाने केबई कोचई मोड़ी नी संगाउन रओत।

54 हुन बिसातो दिन काजे तियार होतो चो दिन रये, आउर बिसातो दिन^* अमरा-अमरी होते रये।

55 हुन बायलेमन जोन गलील ले जीसु संगे एउन रला, जूसुफ चो पाट-पाट गेला आउर एके बले दखला कि जीसु चो मोड़ी के कसन करपन ने संगायसोत।

56 हुनमन घरे बोहड़ला आउर नंगत बासबीती जाकमन आउर बासतेल के तियार करला आउर नियम-कानुन असन हुन बिसातो दिने सुस्‍ताला।

लूका 23:50-56