काना नाव चो गांव ने पानी के अंगुर रस उलटातोर
2
दुय दिन चो पाछे, गलील राज चो काना गांव ने बिया रये। जीसु चो आया मरियम बले हुता रये।
2 जीसु आउर हुनचो चेलामन के बले हुता नेवतुन रओत।
3 जिदलदांय अंगुर रस सरली, तेबे जीसु चो आया हुनके बलली, “हुनमन लगे अंगुर रस नीआय।”
4 जीसु हुनके बललो, “ए आया, मोके तुचो ले काय काम आसे? एबे मोचो बेरा नी अमरलीसे।”
5 जीसु चो आया कमेयामन के बलली, “जोन बले हुन तुमके बलेसे, उसने करा।”
6 हुता जहूदीमन चो सुद करतो नीती चो असन पकना ने घड़लोर छयठन हांडीमन रये, जोन थाने दुय-दुय तीन-तीन घंगार पानी धरुआय।
7 जीसु, कमेयामन के बललो, “हांडीमन ने पानी भोरुन दियास।” तेबे हुनमन उछरतले भोरुन दिला।
8 तेबे जीसु हुनमन के बललो, “एबे निकराउन भोज चो मुखिया लगे निया।”
9 हुनमन नीला, आउर जिदलदांय भोज चो मुखिया हुन पानी के चाकलो, जोन एबे अंगुर रस उलटुन रये, आउर नी जानुन रये कि हुन कहां ले ईली, (मानतर जोन कमेयामन पानी निकराउन रओत, हुनमन जानते रओत) तेबे हुन भोज चो मुखिया, दुला के हागदेउन बललो,
10 “कोनी होओ, आगे निरवा अंगुर रस के देउआत, आउर जिदलदांय लोगमन खाउन मातसोत, तेबे झाबा बिती देउआत; मानतर तुय नंगत अंगुर रस एबतले संगाउन रलीस।”
11 जीसु गलील राज चो काना गांव ने आपलो ए पईल महासंदे चो बुता दखाउन आपलो मयमा दखालो आउर हुनचो चेलामन हुनके पतेयाला।
12 एचो पाछे जीसु, हुनचो आया, हुनचो भाईमन आउर हुनचो चेलामन कफरनहूम ने गेला आउर हुता खिंडिक दिन रला।
जीसु, जरूसलेम चो मंदिर ने
13 जहूदीमन चो फसह तिहार लगे अमरु रये, एईकाजे जीसु जरूसलेम सहर ने गेलो।
14 हुन, मंदिर ने बयला आउर मेंडा आउर परेंया के बिकतो बीतामन आउर पयसा-कोहड़ी पलटतो बेपारीमन बसुन रतो के दखलो,
15 आउर डोरीमन चो कोड़ा बनाउन, जमाय मेंडामन आउर बयलामन के मंदिर ले खेदुन दिलो, आउर बेपारीमन चो पयसा के बिखरुन दिलो आउर टेबुलमन के उलटाउन दिलो।
16 हुन, परेंया के बिकुमन के बललो, “एमन के ए थान ले धरुन जाहा: मोचो बुआ चो घर के बिकतो-घेनतो ठान नी बनाहा।”
17 तेबे हुनचो चेलामन के सूरता ईली कि असन लिखलोर आसे:
“तुचो घर चो भर ले मोचो जीव जरेसे।”†
18 तेबे जहूदीमन जीसु के पूछला, “तुय जोन करसीस, एचो काजे आमके काय चीना दखायसीस?”
19 जीसु हुनमन के बललो, “ए मंदिर के भोसड़ाउन दियास, आउर मय एके तीन दिन ने फेर बनाउन देयंदे।”
20 जहूदीमन बलला, “ए मंदिर बनातो काजे दुय कोड़ी छय बरक लागली, आउर काय, तुय एके तीन दिन ने बनाउक सकीस?”
21 मानतर जोन मंदिर चो गोट जीसु सांगते रये, हुन आपलो देहें रली।
22 जिदलदांय जीसु, मोरलो लोगमन थान ले जीव उठलो, तेबे हुनचो चेलामन के सूरता ईली कि हुन ए गोट सांगुन रये; आउर हुनमन पवितर सास्तर आउर हुन गोटमन जेके जीसु सांगुन रये, पतेयाला।
23 फसह तिहार बेरा जीसु, जरूसलेम ने रये, तेबे खुबे लोगमन, हुनचो दखालो चीनामन के दखुन हुनके पतेयाला।
24 मानतर जीसु खुद के हुनमन चो भोरसा ने नी छांडलो कि हुन सपाय चो मन चो गोट के जानुन रये।
25 आउर हुनके कोनी बले, मनुकमन चो बारे ने सांगतोर काई काम नी रये; कसनबलले हुन खुदे जानते रये कि मनुक चो मन ने काय आसे।