जीसु आउर नीकुदेमुस
3
फरीसीमन ने नीकुदेमुस नाव चो गोटोक मनुक रये, जोन जहूदीमन चो मुखिया रये।
2 हुन राती बेरा जीसु लगे एउन बललो, “ए गुरुजी, आमी जानुंसे कि तुय महापरभु बाटले गुरुजी होउन ईलीसीस; कसनबलले कोनी बले मनुक, जेचो संगे महापरभु नीआय, हुन ए चीनामन के जोन तुय दखायसीस, दखाउक नी सके।”
3 जीसु हुनके बललो, “मय तुके सते सांगेंसे, कोनी बले नवा जनम नी धरलोर, महापरभु चो राज के दखुक नी सकोत।”
4 नीकुदेमुस हुनके बललो, “मनुक जिदलदांय डोकरा होलोसे, तेबे फेर कसन ने जनम धरुक सके? काय, हुन आपलो आया चो पेट ने दुसर हार ओलुन जनम धरुक सके!”
5 जीसु बललो, “मय तुके सते सांगेंसे, कोनी मनुक पानी ले आउर पवितर आत्मा ले नी जनमलोर महापरभु चो राज ने ओलुक नी सके।
6 कसनबलले जोन देहें ले जनमलोर आय, हुन देहें आय; आउर जोन महापरभु चो आत्मा ले जनमलोर आय, हुन आत्मा आय।
7 मोचो बललो गोट ने, नी भक्याव कि तुके नवा जनम धरतोर ची आय।
8 लेहरा जोन बाटे भावले, हुन बाटे बोहुआय, आउर तुय हुनचो राग के सुनुआस। मानतर नी जानीस कि हुन कोन बाटले एयसे आउर कोन बाटले जायसे? महापरभु चो आत्मा ले जनमलोर सपाय असने चे आत।”
9 नीकुदेमुस हुनके बललो, “ए गोटमन कसन ने होउक सके?”
10 एके सुनुन जीसु हुनके बललो, “काय, तुय इसराएलिमन चो गुरुजी होउन बले ए गोटमन के नी समजसीस?
11 मय, तुके सते सांगेंसे कि आमी जोन जानुंसे हुनी बलुंसे, आउर जोन आमी दखलुसे, हुनचो गवई देउंसे, आउर तुमी आमचो गवई के नी मानुआहास।
12 मय तुमके मंजपुर चो गोटमन सांगले, तुमी नी पतेयाहास, तेबे फेर मय तुमके सरगपुर चो गोटमन सांगले, कसन ने पतेयाहासे?
13 कोनी सरग ने नी चेगलासोत, सोजे हुनीची, जोन सरग ले उतरलोसे, बललोने, मनुक चो बेटा जोन सरग ने आसे।”
14 “जोन बरन ले मोसा, टंग-टंगा राने पीतल चो साप के डेंग ने उठालोसे, उसने बरन ले मनुक चो बेटा के बले डेंग ने उठादे ची।
15 कसनबलले जोन बले हुनके पतेयाउ आय, हुन जुग-जुग चो जीव पाओ।”
16 महापरभु संवसार के असन मया करलो कि हुन आपलो गोटकी ची बेटा के देउन दिलो कि जोन बले हुनके पतेयाउ आय, हुन नास नी होओ, मानतर जुग-जुग चो जीव पाओ।
17 महापरभु आपलो बेटा के संवसार ने डंड चो हुकुम देतो काजे नाई, मानतर एईकाजे पठालो कि मंजपुर हुनचो बाटले मुक्ति पाओ।
18 जोन हुनके पतेयायसे, हुनके डंड चो हुकुम नीआय, मानतर जोन हुनके नी पतेयायसे, हुन कसूरदार आय; एईकाजे कि हुन महापरभु चो गोटकी ची बेटा चो नाव के नी पतेयालोसे।
19 उजर संवसार ने ईलोके बले लोगमन अडरा बुतामन करते रला। कसनबलले हुनमन अंधार के, उजर ले जुगे मया करला। एईकाजे डंड चो हुकुम होली।
20 जोन बले अडरा करेसे, हुन उजर ले बईर करेसे, आउर आपलो पाप दखा देयदे बलुन उजर ने नी एये।
21 मानतर जोन सत ने चलेसे, हुन उजर लगे एयसे। कसनबलले हुनचो बुतामन महापरभु बाटले आय बलुन दखा देओ।
जूहन्ना, जीसु चो बारे ने गवई देयसे
22 एचो पाछे, जीसु आउर हुनचो चेलामन जहूदिया राज ने ईला; आउर हुन, हुता हुनमन संगे रउन बपतिस्मा देते रलो।
23 जूहन्ना बले सालेम लगे एनोन ने बपतिस्मा देते रये। हुता खुबे पानी रये आउर खुबे लोग एउन बपतिस्मा धरते रओत।
24 हुदलदांय ले जूहन्ना के जयल घरे नी भोरुन रओत।
25 हुता जूहन्ना चो आदो चेलामन, कोनी-कोनी जहूदीमन संगे सुद होतो गोट काजे बला-बली होला।
26 एईकाजे हुनमन जूहन्ना लगे एउन हुनके बलला, “ए गुरुजी, जोन मनुक जरदन नंदी चो हुन पाट तुचो संगे रये, आउर जेचो गोट के तुय सांगते रयीस, दख, हुन बपतिस्मा देयसे, आउर सपाय हुनचो लगे एयसोत।”
27 जूहन्ना हुनमन के बललो, “जिदलदांय ले मनुक के सरग ले नी देदे, हुदलदांय ले हुन काई बले पाउक नी सके।
28 तुमी खुदे मोचो गवई आहास कि मय बलले, मय किरिस्त नोआंय, मानतर हुनचो ले आगे मोके पठालोर आसे।
29 जेचो दुली आसे, हुनी दुला आय: मानतर दुला चो संगवारी हुनचो राग सुनुन खुबे हरिक होयसे; एदांय मोचो ए हरिक भरपुर होलीसे।
30 हुनके बाड़तोर आउर मोके घटतोर ची आय।”
31 “जोन उपर ले एयसे हुन जमाय ले नंगत आय; जोन मंजपुर ले एयसे, हुन मंजपुर चो आय आउर मंजपुरचेई गोटमन सांगेसे; जोन सरग ले एयसे, हुन सपाय ले उपरे आय।
32 जोन बले हुन दखलो आउर सुनलो, हुनचेई गवई देयसे; आउर कोनी हुनचो गवई के नी मानोत।
33 जोन हुनचो गवई के मानेसे, हुन ए गोट के पतेयाउन पक्का करेसे कि महापरभु सत आय।
34 जेके महापरभु पठालोसे, हुन महापरभु चो गोटमन बलेसे; कसनबलले महापरभु आपलो बेटा के पवितर आत्मा खुबे ले दिलोसे।
35 बुआ बेटा के मया करेसे, आउर हुन जमाय तीजमन के हुनचो हाथे देउन-दिलोसे।
36 जोन, बेटा के पतेयायसे हुन जुग-जुग चो जीव पायदे; जोन बेटा के नी पतेयायसे हुन जीव के नी दखेदे; मानतर महापरभु चो रीस हुनचो उपरे रयदे।”