सत्तर चेलामन के पठातोर
10
एचो पाछे जीसु परभु, सत्तर आउर मनुकमन के बाछुन तियार करलो, आउर जोन-जोन सहर-गांव ने हुन आपने जाउक मन करु रये हुता हुनमन के दुय-दुय करुन आपलो पुरे-पुरे पठालो।
2 आउर जीसु हुनमन के गोटोक कहका बललो: “धान पाकलो बेड़ामन खुबे आसोत; मानतर भूतियारमन जुगे नीआत; एईकाजे फसल देउ परभु ले गुहारा कि हुन आपलो बेड़ा ने भूतियारमन के पठाओ।
3 जाहा, मय तुमके मेंडामन चो असन डुरकीमन चो मंजिगता पठायंसे।
4 एईकाजे जातो बेरा थयली, झोरा, पनई आउर काई नी निया, बाटे-घाटे कोकई जुहार करुन बेरा के नी कटाहा।
5 जसने तुमी कोनी घरे ओलासे, आगे बला, ‘महापरभु ए घर ने अस्तिर देओ’।
6 हुन घरे कोनी अस्तिर चो बाट दखतो बीता आसे जाले, तुमचो अस्तिर चो बर हुनके मिरेदे; नोहले हुन बर तुमचो लगे बोहड़ुन एयदे।
7 हुनी घरे ठेबा, आउर जोन बले हुता मिरेदे, हुनी खाहा; कसनबलले भूतियारमन के आपलो भूती मिरतोर जरुर आय: घर-घर ने नी बुला।
8 जोन बले सहर-गांव ने तुमी जाहासे आउर हुनमन तुमचो इजित-मान करुन जोन बले तुमके देदे, हुनके खाहा।
9 हुता चो बेमारमन के उजराहा; आउर हुनमन के बला, ‘महापरभु चो राज तुमचो लगे अमरलीसे’।
10 मानतर सहर-गांव चो लोग तुमचो इजित-मान करतो काजे मन नी करलोने, हुनमन चो हाट-पसरा ने जाउन बला,
11 ‘तुमचो सहर चो धुरला बले जोन आमचो पांयमन ने होलीसे, आमी तुमचो पुरे तुमचो उलटा गवई होतो काजे फापड़ुंसे; तेबले बले ए गोट के जाना, महापरभु चो राज तुमचो लगे अमरलीसे’।
12 मय तुमके बलेंसे: नियाव चो दिने* हुन सहर चो हाल ले सदोम* चो हाल अदिक कटलातो लाईक होयदे।”
नी पतेयालो सहरमन के हाय!
13 “ए खुराजीन, तुचो उपरे काय डंड पड़ुआयबे! ए बेतसयदा, तुचो उपरे काय डंड पड़ुआयबे! कसनबलले जोन बड़े सकत चो बुतामन तुमचो ने होली; मानतर तुमी नी खिसियालास। हुन सकत चो बुतामन सूर आउर सयदा* सहरमन ने होलोने, हुनमन पोता ओड़ुन आउर लाकड़ी ने बसुन खिसियाउन महापरभु चो बाटे एता।
14 नियाव चो दिने तुमचो हाल ले सूर आउर सयदा चो हाल खुबे कटलातो लाईक होयदे।
15 आउर ए कफरनहूम, काय, तुय बिचारसीस कि तुके सरग ने इजित-मान मिरुआय? तुय पतालपुर ले खाले जासे।
16 जोन तुमचो के सुनेसे, हुन मोचो सुनेसे, आउर जोन तुमके निंदरेसे, हुन मोके निंदरेसे; आउर जोन मोके निंदरेसे, हुन मोचो पठाउ के बले निंदरेसे।”
सत्तर चेलामन बोहड़ुन एतोर
17 हुन सत्तर चेलामन हरिक ले बोहड़ुन ईला, आउर बलला: परभु, तुचो नाव ने देव-भूतमन बले आमचो गोट के मानसोत।
18 हुन, हुनमन के बललो: “मय सयतान के पानी जागलो असन रोस ने सरग ले घसरतो के दखते रयें,
19 दखा, मय तुमके सापमन के आउर बिचु-काकड़ामन के रमंदुन देतो चो आउर बयरी (सयतान) चो सपाय सकत उपरे हक दिलेसे, आउर कोनी जिनीस ले तुमचो काई नोकसान नी होयदे।
20 तेबले बले हरिक नी होआ कि भूतमन तुमचो गोट के मानसोत, मानतर सरग ने तुमचो नाव लिखलोर आसे बलते अदिक हरिक होआ।”
जीसु चो हरिक होतोर
21 हुदलीदांय जीसु पवितर आत्मा ने हरिक होलो आउर बललो: “ए बुआ, मंजपुर आउर सरग चो मालिक, मय तुचो जय-जय करेंसे, कसनबलले तुय ए गोटमन के अकल बीतामन आउर गियानकारीमन ले लुकाउन संगालीस आउर हुन गोटमन के पिलामन के दखाउन दिलीस।
22 मोचो बुआ जमाय के मोचो हाथे सोपुन दिलोसे, बुआ के छांडुन आउर कोनी बले बेटा कोन आय बलुन नी जानोत, आउर बेटा के छांडुन आउर कोनी बले नी जानोत कि बुआ कोन आय, मानतर सोजे हुनी जाने, जेके बेटा सांगलोसे।”
23 जीसु तेबे चेलामन बाटे उलटुन हुनीचीमन के बललो: “हुन आंईकमन धन-धन आत, जोन ए गोटमन के दखसोत, जेके तुमी दखसास।
24 कसनबलले मय तुमके बलेंसे: खुबे अगमजानीमन आउर राजामन जोन गोटमन के तुमी दखसाहास हुनके दखतो काजे मन करला; मानतर दखुक नी सकला; आउर जोन गोटमन के तुमी सुनसास, हुनके सुनतो काजे मन करला मानतर सुनुक नी सकला।”
जीव-दुखतो बीता सामरेया मनुक
25 तेबे गोटोक धरम-पंडित उबा होलो; आउर जीसु के परखतो काजे पूछलो: “गुरुजी, जुग-जुग चो जीव पावतो काजे मोके काय करतोर आंय?
26 आउर जीसु हुनके पूछलो: नियम-कानुन चो किताप ने काय लिखलोर आसे? तुय हुनके कसन समजसीस?”
27 हुन जीसु के बललो: “तुय आपलो महापरभु के आपलो सपाय मन ले, आउर आपलो सपाय जीव ले, आउर आपलो सपाय बल ले आउर आपलो बुद ले मया कर; आपलो घर-लग चो लोगमन के आपलो असन मया कर।”
28 तेबे जीसु हुनके बललो: “तुय सते सांगलीस; असनी ची कर; तेबे तुय जीव रसे।”
29 मानतर हुन पंडित, आपने के सिद दखातो काजे जीसु के पूछलो: “मोचो घर लगे चो लोग कोन आय?”
30 जीसु हुनके बललो: “गोटोक मनुक, जरूसलेम ले जरीहो सहर जाते रलो, खंगारमन हुनके छेकुन हुनचो फटई के झीकुन निसकाला, आउर मुछियातले मारला आउर दड़-मड़या छांडुन जाते गेला।
31 आउर असन होली कि हुनी बाट ले गोटोक जहूदीमन चो पुजारी जाते रलो, मानतर हुन, हुन मनुक के दखुन लापी ले जाते गेलो।
32 असने, मंदिर ने साहरा करतो गोटोक लेवी बंस बीता बले हुन थाने ईलो, आउर हुन मनुक के दखुन बाट रेटे ले जाते गेलो।
33 मानतर नानी जात चो गोटोक सामरेया मनुक हुता अमरलो, आउर हुनके दखुन हुनचो जीव दुखली।
34 आउर हुनचो लगे जाउन हुनचो घावमन ने तेल आउर अंगुर-मंद रिकाउन पट्टा बांदलो; हुनके आपलो गदहा ने लतुन आसरम ने नीलो आउर हुनचो सेवा-जतन करलो।
35 दुसर दिने आसरम मालिक के दुयठन चांदी चो सिक्का (दीनार) दिलो आउर हुनचो सेवा-जतन करतो काजे सोपुन बललो, ‘जितरो बले आगर खरचा होयदे, मय बोहड़ुन ईलोने देयंदे’।
36 तेबे जीसु हुनके पूछलो: तुचो बिचार ने जोन मनुक के खंगारमन छेकुन रला, हुनचो काजे ए तीनो झन ने कोन नंगत घर-लग चो लोग आय?”
37 हुन पंडित बललो: “हुनी जोन हुनचो उपरे दया दखालो।” जीसु हुनके बललो: “जा, तुय बले असने ची कर।”
लूका 10:23-37
मारथा आउर मरियम घरे जीसु जायसे
38 जीसु आउर हुनचो चेलामन जाते-जाते गोटोक गांव ने अमरला। आउर मारथा नाव चो गोटोक बायले जीसु के आपलो घरे हागदिली।
39 हुनचो बईन मरियम परभु जीसु चो पांय लगे बसुन हुनचो गोट के सुनते रली।
40 मानतर मारथा सेवा-सुस्तारा करुन असकट होली आउर जीसु लगे एउन बलुक मुरियाली: “ए परभु, काय, तुके काई फिकिर नीआय कि मोचो बईन मोके सेवा-जतन करतो काजे एकला छांडुन दिलीसे? हुनके, मोचो साहरा करतो काजे बलुन देस।”
41 परभु हुनके बललो: “मारथा, ए मारथा, तुय खुबे गोटमन काजे फिकिर करसीस आउर मुरमुरा होलीसीस।
42 मानतर गोटोक गोट पक्का आय, हुन नंगत बाटा के मरियम बाछलीसे जेके हुनचो ले कोनी झीकुक नी सकदे।”