बीच बुनतो बीता खेतीयार चो कटाव
13
हुनी दिने जीसु घर ले निकरुन समूंद-कटा जाउन बसलो।
2 तेबे बड़े भीड़ हुनचो लगे रूंडा होली, एके दखुन जीसु डोंगा ने चेगलो, आउर भीड़ समूंद-कटा उबा रली।
3 जीसु हुनमन के कहनी-कटावमन ले खुबे गोटमन के सांगलो: “गोटोक खेतीयार बीच बुनुक निकरलो।
4 बुनतोदांय खिंडिक बीच बाट रेटे घसरली आउर चड़ईमन हुनके खादला।
5 खिंडिक बीच पतरली भुंय ने घसरली, खुबे माटी नी मिरलो किरता झपके अखरली।
6 मानतर चेर नी गेलो किरता बेर उदलो के बुटामन कुमचुन सुकुन गेली।
7 आउर खिंडिक बीच लाटा-बुटा ने घसरली आउर लाटा-बुटामन बाड़तोके हुनके चेपाली।
8 मानतर खिंडिक बीच नंगत भुंय ने घसरली, आउर खेड़ धरली, कोनी सव खंडी, कोनी साठ खंडी, आउर कोनी तीस खंडी फर होली।
9 जेके कान आसे हुन धियान ले सुना।”
जीसु कहनी-कटावमन ले गोटेयायसे
10 तेबे चेलामन हुनचो लगे एउन पूछला, “काय काजे तुय लोगमन ले कहनी-कटाव ले गोटेयाउआस?”
11 जीसु हुनमन के बललो, “सरग राज चो बारे ने तुमके समज दिलोर आसे, मानतर हुनमन के नाई।
12 कसनबलले जेचो लगे आसे, हुनके देतोर होयदे आउर हुनचो लगे खुबे होयदे; फेर जेचो लगे काईची नीआय, हुनचो ले धरतोर होयदे जोन बले हुनचो लगे आसे।
13 मय एईकाजे हुनमन के कहनी-कटाव ले गोटेयाउ आंय, हुनमन दखुन बले नी दखलो असन होयसोत, सुनुन बले नी सुनलो असन होयसोत आउर नी समजोत।
14 आउर हुनमन चो बारे ने अगमजानी जसाया चो बललोर अगमगोट सत होयसे:
‘तुमी कान ले सुनासे,
मानतर नी समजासे;
आउर आंईक ले तुमी दखासे,
मानतर नी चिताहासे।
15 कसनबलले एमन चो भाव बड़लीसे,
आउर आंईक अंदरी
आउर कान भयरी होलीसे;
असन होले होती, हुनमन आंईक ले दखोत,
आउर कान ले सुनोत,
आउर मने समजोत,
आउर पाप बाट ले बोहड़ोत, फेर मय हुनके नंगत करेंदे’।†
16 मानतर धन-धन आय तुमचो आंईक, जोन दखेसे; आउर धन-धन आय तुमचो कान, जोन सुनेसे।
17 मय तुमके सते सांगेसे, खुबे अगमजानीमन आउर धरमकारीमन मन करला जोन गोट के तुमी दखसाहास, हुनके दखोत, मानतर हुनमन दखुक नी सकला; आउर जोन गोटमन के तुमी सुनसाहास, हुनके सुनोत, मानतर हुनमन सुनुक नी सकला।”
बीच बुनतो बीता कटाव चो अरथ
18 “एदांय तुमी बीच बुनतो बीता चो कटाव चो अरथ के सुना:
19 बाट रेटे घसरलो बीच असन आय, कोनी मनुक सरग राज चो बचन के सुनुन नी समजेसे आउर जोन बले हुनचो मने आसे, हुनके बले सयतान एउन भूलकाउन देयसे।
20 आउर पतरली भुंय ने बुनलोर बीच हुन मनुक असन आय जोन बचन सुनुन तूरते हरिक ले मानेसे।
21 मानतर हुन चेर नी गेलो किरता खिंडिक असन दिन चो आय, आउर बचन चो किरता तकलीस नोहले डाटा पड़ले तूरते धोका खायसे।
22 जोन बीच लाटा-बुटा ने घसरलोर रली, हुन ए मनुक असन आय जोन बचन सुनेसे, मानतर ए संवसार चो फिकिर आउर धन चो धोका, बचन के चेपायसे आउर फर नी धरे।
23 जोन बीच नंगत भुंय ने बुनलोर आसे ए हुन मनुक असन आय, जोन बचन के सुनेसे आउर समजेसे, आउर कोनी सव खंडी, कोनी साठ खंडी, आउर कोनी तीस खंडी फर धरेसे।”
लाटा-बुटा चो बीच चो कटाव
24 जीसु हुनमन के आउर गोटोक कटाव सांगलो: “सरग राज हुन मनुक चो असन आय जोन आपलो बेड़ा ने नंगत बीच के बुनलो।
25 मानतर सोवा पड़लो राती हुनचो बयरी एउन गउं बुनलो थाने लाटा-बुटा चो बीच के बुनुन जाते गेलो।
26 जिदलदांय गउं अखरुन खेड़ निकरुक मुरियाली, तेबे लाटा-बुटामन चो खेड़ बले दखा दिली।
27 तेबे कमेयामन एउन बेड़ा मालिक के बलला, ‘ए मालिक, काय तुय आपलो बेड़ा ने नंगत बीच नी बुनुन रलीस? फेर लाटा-बुटामन कहां ले अखरली?’
28 मालिक हुनमन के बललो, ‘ए कोनी बयरी चो चाल आय।’ कमेयामन हुनके बलला, ‘काय आमी जाउन लाटा-बुटामन के निंजातो के तुय मन करसीस?’
29 हुन बललो, ‘नाई, लाटा-बुटा के निंजातो बेरा गउं बुटामन बले उखनी होयदे।
30 गउं पाकत ले संगे बाड़ुक दियास, काटतो बेरा मय भूतियारमन के सांगेंदे, आगे लाटा-बुटामन के काटुन डसातो काजे भारा बांदा, आउर गउं के मोचो कोटार ने कुड़ाहा’।”
सरसुन बीचा आउर पाग चो कटाव
31 जीसु हुनमन के आउर गोटोक कटाव सांगलो: “सरग राज गोटोक सरसुन बीचा असन आय, जेके कोनी बीता आपलो बाड़ी ने पेरलो।
32 सरसुन बीचा जमाय बीचामन ले नानी आय, मानतर बाड़ुन सपाय साग-पान ले बड़े बुटा होउआय; आउर बादरी चो लिटी-चड़ईमन एउन हुनचो खेंदामन ने गूड़ा बनायसोत।”
33 जीसु हुनमन के आउर गोटोक कटाव बललो: “सरग राज, पाग असन आय, जेके कोनी बायले धरुन तीन पसरी गउं-पिसान संगे चटकली आउर धीरे-धीरे सपाय पिसान ने पाग ईली।”
34 जीसु लोगमन के सपाय गोटमन कहनी-कटाव ले सांगते रये, आउर कहनी-कटाव नोहलो हुन काईची नी सांगे,
35 जसन कि अगमजानीमन बाटले बललोर गोट पुरा होओ:
“मय कहनी-कटावमन ले सांगतो काजे मोचो टोंड के उगाड़ेंदे:
मय हुन गोटमन के जोन संवसार चो मूर ले लुकलीसे पुरे आनेंदे।”†
लाटा-बुटा चो कटाव चो अरथ
36 जेबे हुन, भीड़ के बिदा करुन घरे गेलो, तेबे हुनचो चेलामन हुनचो लगे एउन बलला, “लाटा-बुटा चो कहनी-कटाव चो अरथ आमके समजाउन देस।”
37 जीसु हुनमन के बललो, “नंगत बीचा बुनतो बीता मय मनुक चो बेटा आंय।
38 संवसार बेड़ा आय, नंगत बीचा सरग राज चो पिला-झीलामन आत, आउर लाटा-बुटा चो बीचा सयतान चो पिलामन आत।
39 जोन बयरी लाटा-बुटा चो बीचा के बुनलो हुन सयतान आय; फसल चो कटई संवसार चो सरती आय, आउर काटुबीता सरगदूतमन आत।
40 जसन लाटा-बुटामन के रूंडाउन डसातोर होयदे, उसनेची संवसार चो सरती बेरा होयदे।
41 मय मनुक चो बेटा आपलो सरगदूतमन के पठायंदे, आउर हुनमन सयतान चो राज ले सपाय धोका खुआउमन आउर ओधरमीमन के रूंडा करदे,
42 आउर हुनमन के आईग कुंड ने पकादे, हुता हुनमन गागा-बोगा आउर दात कडरदे।
43 धरमकारीमन हुदलदांय आपलो बुआ चो राज ने बेर असन बरदे। सुनतो लोगमन चेत करुन सुना।”
हांडा-रुपया आउर खुबे मोल बिती मोती चो कटाव
44 “सरग राज बेड़ा ने गाड़लोर हांडा-रुपया असन आय, जेके कोनी मनुक भेटलोके हरिक ने जाउन आपलो सपाय धन-माल के बिकुन हुनीची बेड़ा के घेनलो।”
45 “फेर सरग राज गोटोक बेपारी असन आय जोन खुबे मोल बिती मोती के डगराते रये।
46 जिदलदांय हुनके गोटोक खुबे मोल बिती मोती मिरली, आपलो सपाय धन-माल के बिकुन हुन मोती के घेनलो।”
झारी चो कटाव
47 “फेर सरग राज हुन बड़े झारी असन आय जेके समूंद ने पकाला, आउर हुन थाने सपाय बरन चो मछरीमन फसला।
48 जिदलदांय झारी भोरली, तेबे हुनके रेटे झीकला, आउर सपाय नंगत-नंगत मछरीमन के ढुटामन ने भोरला आउर सड़लो-गड़लो के पकाउन दिला।
49 संवसार चो सरती ने असने ची होयदे। सरगदूतमन एउन पापीमन के धरमातीमन ले अलगादे,
50 आउर पापीमन के आईग कुंड ने पकादे। हुनमन हुता गागा-बोगा आउर दात कडरदे।”
51 जीसु हुनमन के पूछलो, “काय ए सबु गोट के तुमी समजलास?” हुनमन जीसु के बलला, “हव।”
52 जीसु हुनमन के फेर बललो, “जोन धरम-पंडितमन सरग राज चो बारे ने गियान पावलासे, हुन गोटोक घर मालिक असन आय जोन आपलो भंडार ले जुना आउर नवा जाकमन के निकरायसे।”
अगमजानी आपलो परघन ने मान नी पाओत
53 जीसु ए कटाव के सांगुन पाछे, हुताले जाते गेलो।
54 आउर आपलो परघन ने एउन मंडली-घर ने बचन सांगुक मुरियालो, लोगमन हुनचो सिखिया के सुनुन अचरित होला आउर बलुक मुरियाला, “एके ए गियान आउर सकत कहां ले मिरली?
55 काय, ए बड़ई चो बेटा नोआय? काय, एचो आया मरियम आउर एचो भाईमन जाकूब, जूसुफ, समोन आउर जहूदा नोआत?
56 काय, एचो बईनमन आमचो मंजिगता नी रसोत? फेर एके ए सपाय गियान कहां ले मिरली?”