आपलो पापमन ले मन बोहड़ाहा नोहले नास होआसे
13
हुदलीदांय हुता रलो लोगमन जीसु के सांगला कि गलीलेयामन जरूसलेम चो मंदिर ने जतरा चेगातो बेरा पिलातुस हुनमन के मोरते माराउन हुनमन चो लोउ के हुनीमन चो जतरा संगे मिसाउन रये।
2 एके सुनुन जीसु हुनमन के बललो: “तुमी काय बिचार करासाहास, ए गलीलेया लोगमन, जमाय गलीलेया लोगमन ले जुगे पापी रला, जेचो किरता हुनमन उपरे असन बिपती पड़ली?
3 मय तुमके बलेंसे नाई; मानतर तुमी पाप ले मन नी बोहड़ालोने तुमी जमाय असने ची नास होआसे।
4 तुमी काय बिचार करासाहास कि हुन अठारा झन जोनमन चो उपरे सीलोह चो गुमट घसरली आउर हुनमन चेपाय होउन मोरला: काय जरूसलेम ने रतो दुसर जमाय लोगमन ले जुगे कसूरदार रला?
5 मय तुमके बलेंसे, नाई; मानतर तुमी पाप ले मन नी बोहड़ालोने असने मोरुन जाहासे।”
6 फेर जीसु हुनमन के ए कटाव सांगलो, “कोनी मनुक चो अंगुर-बाड़ी ने गोटोक अंजीर चो रूक रली। हुन हुता फर डगराउक ईलो, मानतर हुता हुनके गोटोक बले फर नी मिरली।
अंजीर रूक चो खेंदा ने फर (13:6)
7 तेबे हुन बाड़ी राखा करतो बीता के बललो, ‘दख, मय तीन बरक ले ए अंजीर रूक ने फर डगराउक एयंसे, मानतर गोटोक बले फर नी मिरे। एईकाजे एके गोंदुन देस, काय काजे ए ठान के फोकाहा धरलीसे?’
8 मानतर हुन मालिक के बललो: ‘ए मालिक, एके ए बरक काजे बले रउक देस, मय एचो चारो-कुती कोड़कुन खत देयंदे।
9 फेर एतो बरक फर धरली जाले नंगत आय, नोहले हुनके गोंदुन देवां’।”
जीसु बिसातो दिने, कुबड़ी बायले के उजरायसे
10 बिसातो दिने जीसु जहूदीमन चो गोटोक मंडली-घर ने सिखाते रये।
11 आउर हुता गोटोक बायले रये जेके अठारा बरक ले गोटोक निमल करतो देव-भूत तकलीस करते रये। हुन कुबड़ी, खटके उबा होउक नी सकते रये।
12 जीसु हुनके दखुन हागदेउन हुनके बललो: “ए बायले, तुय आपलो दिनई ले उजरलीस।”
13 जीसु हुनचो उपरे हाथ थापलो, आउर हुन तूरते सलसला उबा होली आउर हुन महापरभु के सहराली।
14 हुन बायले के जीसु बिसातो दिने उजरालो, एईकाजे जहूदी मंडली-घर चो मुखिया रीस होउन लोगमन के बललो: “बुता करतो काजे छय दिन आसे, हुनी दिनमन ने एउन उजराय होआ, मानतर बिसातो दिने, नाई।”
15 ए सुनुन परभु हुनके बललो: “ए कपटीमन, काय तुमी बिसातो दिने तुमचो बयला नोहले गदई के कोटा ले ढीलुन पानी खुआउक नी नियासे?
16 ए बायले जोन अबराहम चो थर चो आय, जेके सयतान अठारा बरक ले बांधुन संगाउ रये, बिसातो दिने छंडाय होतोर काय, ए नंगत नोआय?”
17 जिदलदांय जीसु ए गोटमन के सांगलो, तेबे हुनचो सपाय बयरीमन लाज पड़ला, मानतर जीसु करलो महासंदे चो बुतामन ले सपाय लोगमन हरिक होला।
लूका 12:32-34; LUK 13:10-
सरसुन बीचा आउर पाग चो कटाव
18 फेर जीसु पूछलो: “महापरभु चो राज कसन आसे? मय हुनचो कटार काय ले करेंदे?
19 हुन सरसुन बीचा असन आय जेके गोटोक मनुक आपलो बाड़ी ने बुनलो, आउर हुन बाड़ुन रूक होउन गेली, फेर बादरी चो चड़ईमन हुनचो खेंदामन ने आपलो गूड़ा बनाला।”
लूका 13:18-19
20 जीसु फेर पूछलो: मय महापरभु चो राज चो कटार काय ले करेंदे?
21 हुन पाग असन आय, जेके कोनी बायले तीन सोली चटकलो पिसान ने मिसाली आउर बेरा होते-होते जमाय चटकलो पिसान, पाग होउन गेली।
साकुड़ बाट
22 आउर जीसु बाटे चो गांव-सहरमन ने होउन सिखिया देते-देते जरूसलेम सहर जाते रये।
23 कोनी हुनके पूछलो, “ए परभु, काय मुक्ति पावतो लोगमन खिंडिक आत?”
24 जीसु हुनमन के बललो: “साकुड़ बाट ले ओलतो काजे खुबे मसागत करा, कसनबलले मय तुमके बलेंसे, खुबे लोगमन हुन बाट ले ओलतो काजे होदे, मानतर ओलुक नी सकदे।”
25 जिदलदांय घर चो मुखिया उठुन कपाट ढाकुन रयदे, हुदलदांय तुमी दुआरे उबा होउन कपाट के ठक-ठकाउन बलासे: “ए मालिक, आमचो काजे कपाट उगाड़”, हुन बलेदे, “मय तुमके नी जाने, तुमी कहां चो आहास?”
26 हुदलदांय तुमी बलासे: “आमी तुचो संगे खाते-पीवते रलु आउर तुय आमचो गांव-सहरमन ने सिखिया देउन रयीस।”
27 “मानतर हुन बलेदे, ‘मय तुमके बलेंसे, मय नी जाने तुमी कहां चो आहास। ए ओधरम करतो लोगमन मोचो ले लापी गुचा’।”
28 “जिदलदांय अबराहम, इसहाक, जाकूब आउर जमाय अगमजानीमन के महापरभु चो राज ने बसलोर दखासे, मानतर आपने के हुताले निसकालोर दखासे, तेबे तुमी हुता गागासे आउर दात कडरासे।
29 बेर उदिया (पूरब) आउर बेर बुड़ती (पचिम), बेर उदिया उजा हाथ (दखिन) आउर बेर उदिया डेबरी हाथ (उत्तर) ले लोगमन एउन महापरभु चो राज चो भोज ने मिसदे।
30 दखा, जोन लोग पाटे आसोत, हुनमन पुरे होदे आउर जोनमन पुरे आसोत हुनमन पाटे होदे।”
जरूसलेम काजे जीसु जीव-दुखतोर
31 हुदलीदांय आदो फरीसीमन जीसु लगे एउन हुनके बलला: “एता ले निकरुन जाहा, कसनबलले हेरोद राजा तुके मोरते मारतो काजे होलोसे।”
32 तेबे जीसु हुनमन के बललो: “जाउन हुन कोलेया के सांगा, दख, मय आजी आउर काली देव-भूतमन के निकरायंदे आउर बेमार लोगमन के उजरायंदे, आउर तीसर दिने मोचो बुता के सारेंदे।
33 तेबले बले मोके आजी काली आउर परान दिने बुता करते रतोर जरुर आय; कसनबलले होउक नी सके कि कोनी अगमजानी के जरूसलेम चो बाहरे मोरते मारोत।”
34 “ए जरूसलेम! ए जरूसलेम! तुय अगमजानीमन के मोरते मारसीस, आउर जोनमन के तुचो लगे पठालोसे, हुनमन चो उपरे तुय पकना फिंगुन मोरते मारसीस। कितरो हार मय मन करले कि जसन कुकड़ी-माय आपलो पिलामन के पाटकी खाले लेपटायसे उसनेची मय बले तुचो पिलामन के जुहा करें, मानतर तुय मन नी करलीस।
35 ए जरूसलेम चो रतो लोगमन दखा, तुमचो घर छांडा पड़ेदे। मय तुमके बलेंसे: तुमी मोके फेर केबई नी दखासे जिदलदांय ले तुमी नी बलासे, ‘धन-धन आय हुन, जोन परभु चो नाव ने एयसे।’”