बुनतो बीता चो कटाव
4
जीसु फेर समूंद रेटे महापरभु चो गोट सांगते रलो, आउर असन बड़े भीड़ हुनचो लगे कुड़ा होली कि हुन समूंद ने गोटोक डोंगा ने चेगुन बसलो, आउर सपाय भीड़ समूंद रेटे उबा रली।
2 जीसु हुनमन के कहकामन ले आपलो खुबे सिखिया गोटमन के सांगलो:
3 “सुना, गोटोक खेतीयार आपलो बेड़ा ने बीच बुनतो काजे निकरलो।
4 आउर हुन बुनतो बेरा खिंडिक बीच बाट रेटे घसरली, आउर चड़ईमन एउन हुनके खादला।
5 आउर खिंडिक बीच पकना जगा ने घसरली, जोन थाने हुनके खिंडिक माटी मिरली, एईकाजे झटके अखरली।
6 जिदलदांय बेर उदून घाम छेकली, तेबे चेर नंगत नी धरलो किरता सुकली।
7 आउर खिंडिक बीच लाटा-बुटा ने घसरली, आउर लाटामन बाड़ुन हुनके चेपाला, एईकाजे हुन नी फरली।
8 आउर खिंडिक बीच खतउ माटी ने घसरली। हुन अखरली आउर बाड़ुन फरली। कोनी तीस गुना, कोनी साठ गुना आउर कोनी सव गुना फर धरली।”
9 आउर जीसु बललो: “जेके कान आसे हुन नंगत ले सुनोत।”
कटावमन चो अरथ
10 जिदलदांय भीड़ जीसु लग ले गेला, तेबे हुनचो संगवारीमन आउर बारा चेलामन जीसु चो सांगलो कहकामन चो बारे ने पूछला।
11 आउर जीसु हुनमन के बललो, “तुमके तो महापरभु चो राज चो भेद के दिलोर आसे, मानतर बाहरेया लोगमन काजे ए सपाय गोटमन कहका असन दिलोर आसे।
12 एईकाजे ‘हुनमन दखते-दखते बले नी चिताओत, आउर सुनते-सुनते बले नी समजोत;
कि हुनमन समजता जाले, पसताता आउर हुनमन चो पाप खेमा होती’।”†
13 जीसु चेलामन के बललो, “काय, तुमी ए कहका के नी समजलास, तेबे दुसर कहका के कसन समजासे?
14 बुनतो बीता महापरभु चो बचन बुनुआय।
15 कोनी-कोनी लोग बाट रेटे घसरलो बीच असन आत, जेचो मने महापरभु चो बचन बुनलोर आसे। मानतर सयतान तूरते एउन बचन के नेउआय बललोने भूलकाउन देउआय।
16 आउर असनी ची जोन पकना कुड़ा माटी ने बुनुआत, ए हुनमन आत, जोन बचन के सुनुन तूरते हरिक ले मानुआत,
17 मानतर आपलो भीतरे चेर नी धरलो किरता हुनमन खिंडिक दिन काजे रउआत, एचो पाछे महापरभु चो बचन किरता हुनमन उपरे दुख-डंड होले, तूरते हुनमन धोका खाउआत।
18 आउर जोन लाटा-बुटा ने चेपाय होउन रओत, ए हुनमन आत, जोनमन महापरभु चो बचन के सुनला।
19 आउर संवसार चो फिकिर, आउर धन चो सुख, आउर दुसर तीज चो लोभ हुनमन चो ने समाउन, महापरभु चो बचन के चेपाउन देउआय, आउर हुन फोकाहा होउन जायसे।
20 आउर जोन नंगत भुंय ने बुनु रला, ए हुनमन आत, जोन महापरभु चो गोट सुनुन मानुआत आउर फर धरुआत, कोनी तीस गुना, कोनी साठ गुना, आउर कोनी सव गुना।”
गोटोक दीया चो कटाव
21 जीसु चेलामन के पूछलो, “काय, कोनी दीया धराउन पयली भीतरे नोहले खटेया खाले संगाउआत? काय, एके दीया रूखी ने संगातो काजे नोआय?
22 कसनबलले काई बले लुकलोर नीआय, जोन दखा नी देये आउर काई बले नी लुकलीसे जोन उजर ने नी दखा देये।
23 नोहले काई भेद चो गोट लुकलोर नीआय, आउर लुकलीसे जाले तो हुन भेद के उजर ने आनतो काजे लुकलोर आसे। जेके कान आसे, हुन नंगत ले सुनोत।”
24 जीसु हुनमन के बललो, “जोन तुमी सुनसास नंगत ले सुना: आउर जोन नाप ले तुमी नापसास, हुनी नाप ने तुमचो काजे बले नापदे, आउर हुनचो ले आगर देदे।
25 जेचो लगे आसे हुनके जुगे देयदे, आउर जेचो लगे काई नीआय, आउर हुनचो ले हुनके बले धरदे, जे बले हुनचो लगे आसे।”
अखरतो बीच चो कटाव
26 जीसु चेलामन के बललो, “महापरभु चो राज असन आय, जसन कोनी मनुक भुंय ने बीच बुनलो,
27 आउर राती सोयसे, आउर मंज ने उठेसे, आउर हुन बीच असन अखरली आउर बाड़ली कि हुन नी जाने।
28 कसनबलले भुंय बीच के अखराली, आगे गाजा निकरली, फेर खेड़ ने धान होली।
29 आउर जिदलदांय धान पाकेसे, तेबे हुन तूरते हीरा ने काटेसे, कसनबलले कटई अमरलीसे।”
सरसुन बीच चो कटाव
30 आउर जीसु बललो, “आमी महापरभु चो राज के कोचो संगे कटारवां, आउर कोन कहका ले एके सांगुक सकुआंव?
31 महापरभु चो राज सरसुन बीचा असन आय: कि जिदलदांय भुंय ने बुनुआत तेबे भुंय चो सपाय बीचमन ले नानी होउआय।
32 मानतर जिदलदांय बुनला, तेबे अखरुन सपाय बुटा ले बड़े होउआय, आउर हुनचो असन बड़े खेंदामन निकरुआय कि चड़ईमन हुनचो छांये एउन गूड़ा बनाउक सकदे।”
33 जीसु लोगमन के असन बरन चो खुबे कटावमन सांगुन हुनमन चो समजतो हिसाब ने गोट सुनाते रये।
34 कटावमन नोहलो हुनमन के काईची नी बलते रये: आउर कोनी नी रलो बेरा जीसु आपलो चेलामन के सपाय गोटमन चो अरथ सांगते रये।
जीसु लेहरा धुका के थमायसे
35 हुनी दिने जिदलदांय सांज होली, तेबे जीसु चेलामन के बललो, “इआ, आमी हुन पाट जो।”
36 आउर हुनमन भीड़ के छांडुन भाति जसन जीसु रलो असने ची हुनके डोंगा ने, आपलो संगे नीला। हुनचो संगे दुसर डोंगामन बले रली।
37 बड़े लेहरा-धुका ईली आउर हलका डोंगा ने अमरली कि हुन एबे पानी ने बुड़तो असन होली।
38 आउर जीसु डोंगा चो पाट बाटे गादी ने सोवते रये, तेबे हुनमन हुनके चेताउन बलला, “ए गुरु, काय, तुके फिकिर नीआय कि आमी बुड़ुंदेबे?”
39 तेबे जीसु उठुन लेहरा-धुका के रीस होलो, आउर पानी के दागा देउन बललो, “ओगाय रा, थामुन जा!” आउर लेहरा-धुका थामुन गेली, आउर सबु बाटे चिमचामनाय होली।
40 जीसु, चेलामन के बललो, “तुमी काय काजे डरसास? काय, तुमके एबले बिसवास नीआय?”
41 हुनमन खुबे डरला आउर बलला, “ए कसन मनुक आय कि लेहरा धुका आउर पानी बले एचो गोट के मानेसोत?”