गोटोक कोला हाथ बीता मनुक
3
जीसु, जहूदीमन चो मंडली-घरे फेर गेलो; हुता गोटोक मनुक रये जेचो गोटोक हाथ कोला होउ रये,
2 आउर आदो लोग जीसु चो उपरे दोस लगातो काजे छंद ने रओत कि दखुं, हुन बिसातो दिने बले हुन मनुक के चेकरायदे कि नाई।
3 जीसु, हुन कोला हाथ बीता के बललो, “पुरे आव।”
4 आउर लोगमन के पूछलो: “काय, बिसातो दिने उजरातोर कि अडरा करतोर, जीव बचातोर कि मारतोर नंगत आय?” मानतर हुनमन ओगाय रला।
5 आउर जीसु, हुनमन चो कपट ले मुरुसनाय होउन, हुनमन के रीस ने भोंवरक दखलो, आउर हुन मनुक के बललो: “तुचो हाथ पुरे लमाव।” हुन लमालो, आउर हुनचो हाथ चेंग-चेंगा होली।
6 तेबे फरीसीमन बाहरे जाउन तूरते हेरोदेयामन संगे सला होउन बिचार करला कि जीसु के कसन करुन मारवां।
समूंद रेटे गोटोक भीड़
7 आउर जीसु आपलो चेलामन संगे गलील समूंद बाटे गेलो: आउर गलील राज ले, आउर जहूदिया,
8 आउर जरूसलेम सहर आउर इदूमिया ले, आउर जरदन नंदी चो हुन पाट ले, आउर सूर आउर सयदा चो आली-पाली ले गोटोक बड़े भीड़, एके सुनुन भाति हुनचो लगे ईला कि हुन कसन महासंदे चो काम करेसे।
9 आउर हुन आपलो चेलामन के बललो, “मोचो काजे गोटोक नानी डोंगा तियार करु राहा, कसनबलले ए भीड़ मोके ठेगला-मस्का नी करोत।”
10 कसनबलले हुन खुबे झन के उजराउन रये, एईकाजे जितरो लोग बेमार पड़ु रओत, हुनके छिंवतो काजे घसर-पड़ होते रओत।
11 आउर देव-भूत धरलो लोगमन बले, जिदलदांय हुनके दखोत, तेबे हुनचो पुरे घसरते रओत, आउर किरकिरुन बलते रओत कि तुय महापरभु चो बेटा आस;
12 आउर जीसु हुनमन के दागा दिलो कि मोचो बारे ने कोकई नी सांगा।
जीसु बाराझन चेलामन के बाछतोर
13 फेर जीसु डोंगरी उपरे चेगलो, आउर आपलो मन करतो लोगमन के आपलो लगे हागदिलो; आउर हुनमन हुनचो लगे ईला।
14 तेबे हुन बाराझन मनुकमन के बाछलो कि हुनमन हुनचो संगे रओत, कसनबलले हुनमन के महापरभु चो गोट सांगतो काजे पठाउक सको,
15 आउर देव-भूतमन के निकरातो काजे हक संगाओत।
16 हुनमन ए आत:
समोन जेके जीसु, पतरस नाव संगालो,
17 आउर जबदी चो बेटा जाकूब आउर जाकूब चो भाई जूहन्ना, जोनमन चो नाव जीसु, बुअनरगिस बललोने “घुड़लतो चो बेटा” संगालो,
18 अंदरियास,
फिलिपुस,
बरतुलमय,
मत्ती,
थोमा,
हलफई चो बेटा जाकूब,
तदई,
आउर समोन कनानेया,
19 आउर जहूदा इसकरियोती (जोन जीसु के धराउन दिलो)।
जीसु आउर सयतान
20 जीसु घरे ईलो: आउर असन भीड़ कुड़ा होली कि हुनमन रोटी खाउक बले नी सकला।
21 जिदलदांय जीसु चो बुद गुपलीसे बलुन हुनचो कुटुम लोग सुनला, तेबे हुनके धरुन नेतो काजे ईला।
22 जरूसलेम ले ईलो धरम-पंडितमन, असन बलते रओत कि जीसु ने बेलजाबुल* बललोने सयतान आसे, आउर हुन देव-भूतमन चो मुखिया चो साहरा ले भूतमन के निकरायसे।
23 जीसु धरम-गुरुमन के हागदेउन हुनमन के कहका सांगुक मुरियालो, “सयतान के सयतान कसन निकराउक सके?
24 नोहले कोनी राज चो लोगमन, आपनेमन झगड़ा होलोने, हुन राज कसन ने नंगत रयदे?
25 नोहले कोचई घरे, आपनेमन झगड़ा होलोने, हुन घर कसन ने नंगत रयदे?
26 नोहले सयतान आपलेई बिरुद ने लड़ा-जुजा करलोने, हुन कसन बनुन रउक सके, हुनचो तो नास होउन जायदे।
27 मानतर कोनी मनुक कोनी सकत बीता चो घरे ओलुन, हुनचो माल-मता झीका-उड़मा करुक नी सकेदे। जिदलदांय ले हुन, सकत बीता के आगे ची नी बांदेदे; हुदलदांय ले हुनचो घर के झीका-उड़मा करुक नी सके।
28 मय तुमके सते बलेंसे, मनुकमन चो सपाय पाप आउर निंदरतोर के खेमा करेदे।
29 मानतर जोन कोनी पवितर आत्मा के निंदरेदे, हुनके केबई बले खेमा नी करेदे। मानतर हुन जुग-जुग काजे पापी होयदे।”
30 कसनबलले धरम-गुरुमन बलते रओत कि जीसु थाने असुद आत्मा आसे।
जीसु चो आया आउर भाईमन
31 तेबे जीसु चो आया आउर हुनचो भाईमन ईला, आउर बाहरे उबा होउन हुनके हागदेउक पठाला।
32 भीड़ हुनचो भोंवरक बसुन रला, आउर हुनमन जीसु के बलला: “दख, तुचो आया आउर तुचो भाईमन बाहरे तुके डगरायसोत।”
33 जीसु हुनमन के बललो: “मोचो आया आउर मोचो भाईमन कोन आत?”
34 आउर हुता जोन भोंवरक बसु रओत, हुनमन के दखुन जीसु बललो: “दखा, मोचो आया आउर भाईमन।
35 जोन बले महापरभु चो मन-इछा असन चलेसे, हुनीमन मोचो भाई, बईन आउर आया आत।”