जीसु, गोटोक लकवा मारलो मनुक के उजरायसे
2
खुबे दिन पाछे, जीसु फेर कफरनहूम ने ईलो, आउर लोगमन सुनला कि हुन, घरे आसे।
2 फेर इतरो लोग-कुड़ा होला कि दुआरे बले ठान नी बाचली, आउर जीसु हुनमन के महापरभु चो गोट सांगते रये।
3 तेबे गोटोक लकवा मारलो मनुक के चारझन बोउन जीसु लगे आनते रला।
4 मानतर जिदलदांय हुनमन भीड़ किरता हुनचो लगे नी अमरुक सकला, तेबे हुनमन घर चो छानी के उगाड़ला जेचो खाले जीसु रलो, आउर हुनमन लकवा मारलो बीता के खटेया संगे जीसु चो पुरे उतराला।
लकवा मारलो बीता के छानी उपर ले जीसु चो पुरे उतरायसोत (2:4)
5 जीसु हुनमन चो बिसवास के दखुन लकवा मारलो मनुक के बललो: “ए बेटा, तुचो पाप खेमा होली।”
6 तेबे हुता बसलो आदो धरम-पंडितमन, आपलाहान मन ने बिचार करुक मुरियाला,
7 “ए मनुक काय काजे असन बलेसे? ए तो महापरभु के निंदरेसे! महापरभु के छांडुन आउर कोन पाप खेमा करुक सके?”
8 जीसु हुदलीदांय आपलो मन ने जानलो कि हुनमन आपलाहान मन ने असन काय काजे बिचारसोत, आउर हुनमन के बललो: “तुमी काय काजे असन बिचारसाहास?
9 सरसरा काय आय? काय, लकवा मारलो मनुक के असन बलतोर कि तुचो पाप खेमा होली, नोहले असन बलतोर कि उठ, तुचो खटेया के धर आउर हिंड-बुल?
10 मानतर तुमी जानुन राहा कि मय मनुक चो बेटा के संवसार ने पाप खेमा करतो हक आसे।” जीसु हुन लकवा मारलो मनुक के बललो:
11 “मय तुके बलेंसे, उठ, तुचो खटेया उठाउन तुचो घरे जा।”
12 आउर हुन उठलो आउर तूरते खटेया उठाउन सपाय चो पुरे निकरुन गेलो; एके दखुन सपाय भक्याला, आउर महापरभु के जय-जय करुन बलला: “असन आमी केबई नी दखलुसे।”
जीसु, लेवी के हागदेयसे
13 जीसु फेर निकरुन गलील समूंद रेटे गेलो, आउर सपाय लोगमन हुनचो लगे ईला, आउर हुन, हुनमन के महापरभु चो बारे ने सिखालो।
14 जातो बेरा हुन, हलफई चो बेटा लेवी के चोंगी-नाका ने बसलोर दखलो, आउर हुनके बललो: “मोचो पाटे आव।” तेबे हुन उठुन जीसु चो पाट-पाट गेलो।
15 जीसु आपलो चेलामन संगे लेवी घरे खाउक बसलो। हुनमन संगे खुबे पट्टी उसील करतो बीतामन आउर पापीमन बले खाउक बसला; हुनमन ले खुबे लोग जीसु चो पाट-पाट ईलो लोग आत।
16 धरम-पंडितमन आउर फरीसीमन, जीसु के पट्टी उसील करतो बीतामन आउर पापीमन संगे खातो के दखुन जीसु चो चेलामन के बलला: “हुन तो पट्टी उसील करतो बीतामन आउर पापीमन संगे बसुन खायसे!”
17 जीसु असन सुनुन हुनमन के बललो: “नंगत लोगमन के बईद* नी लागे, मानतर बेमार लोगमन के लागुआय; उसने मय धरमकारीमन के नाई, मानतर पापीमन के हागदेउक ईलेसे।”
उपास चो बारे ने
18 जूहन्ना चो चेलामन, आउर फरीसीमन उपास करते रयसोत; तेबे लोगमन एउन जीसु के बलला: “जूहन्ना चो चेलामन आउर फरीसीमन चो चेलामन उपास रयसोत, मानतर तुचो चेलामन काय काजे उपास नी रयसोत?”
19 जीसु हुनमन के बललो: “काय, बरातीमन संगे दुला रलोने, बरातीमन उपास करुक सकोत? जिदलदांय ले दुला, बरातीमन संगे आसे, हुदलदांय ले बरातीमन उपास करुक नी सकोत।
20 मानतर हुन दिन एयदे, दुला के हुनमन ले अलगे करुन देयदे; हुदलदांय हुनमन उपास करदे।”
21 “कोनी बले नवा फटई ने जुना बिती खाप के नी खिलोत; कोनी खिललोने नवा खाप जुना फटई के झीकेदे, आउर नवा बिती ले जुना बिती आउर अदिक फाटून जायदे।
22 कोनी बले नवा अंगुर रस के जुना चामड़ी चो बनालोर तूमा ने नी भोरोत, नोहले कोनी भोरदे, तेबे जुना चामड़ी चो तूमा के अंगुर रस फुटाउन देयदे, आउर अंगुर रस आउर तूमा दुनो नसुन जायदे; मानतर अंगुर चो नवा रस, नवा तूमा ने भोरसोत।”
बिसातो दिन चो बारे ने
23 गोटोक बिसातो दिने जिदलदांय जीसु आउर हुनचो चेलामन बेड़ा बाटले जाते रओत, तेबे चेलामन गउं चो खेड़मन के टुटाउक मुरियाला।
24 तेबे फरीसीमन जीसु के पूछला: “दख, ए बिसातो दिने हुनमन ए बुता काय काजे करसोत, जोन मोसा चो हुकुम हिसाब ले नी बने?”
25 जीसु हुनमन के बललो: “काय, तुमी केबई नी पढ़लासाहास, जिदलदांय दाउद राजा के खातो काजे जरुरत पड़ली, आउर जोनमन हुनचो संगे रओत हुनमन के भूक लागली, हुदलदांय हुन, काय करलो?
26 हुन कसन ने बड़े पुजारी अबियातार चो बेरा, महापरभु चो मंदिर ने जाउन चेगालो रोटीमन के खादलो आउर आपलो संगवारीमन के बले दिलो, जोन रोटी, पुजारी के छांडुन आउर कोकई खातोर नी बने?”