पईल चेलामन
5
जिदलदांय जीसु गनेसरत समूंद रेटे उबा रलो, तेबे महापरभु चो गोट के सुनतो काजे लोगमन जीसु लगे उपरा-पेला होते रओत।
2 तेबे हुन समूंद-खंडे बांदलोर दुयठन डोंगामन के दखलो, आउर मछरी मारुमन डोंगा ले उतरुन झारीमन के धोअते रओत।
3 जीसु हुनमन थान ले गोटोक डोंगा ने चेगलो, जोन समोन चो रये, आउर समोन के, डोंगा के खंड ले खिंडिक खोल बाटे नेउक बललो। तेबे जीसु, डोंगा ने बसुन लोगमन के सिखाउक मुरियालो।
4 सिखिया देउन सारलो, तूरते हुन समोन के बललो: “तुचो डोंगा के हुन खोल बाटे ने, आउर तुचो संगवारीमन संगे मछरी धरतो काजे झारी के पकाहा।”
5 समोन हुनके बललो: “ए मालिक, आमी गुलाय राती खुबे मसागत करलु आउर काईची नी पावलु, तेबले बले तुय बलसीस जाले, आमी झारीमन के पकाउंदे।”
6 जिदलदांय हुनमन जीसु चो गोट के मानला, झारी ने इतरो मछरीमन पड़ला कि झारी फाटतो असन होली।
7 तेबे हुनमन आपलो संगवारीमन के, जोन दुसर डोंगा ने रला, हुनमन के आपलो साका करतो काजे अक्याला। हुनमन लगे अमरला आउर हुन दुनो डोंगामन ने इतरो मछरी भोरला कि डोंगामन बुड़तो असन होली।
8 जिदलदांय समोन पतरस ए महासंदे चो बुता दखलो, तेबे जीसु के पांय पड़लो आउर बललो: “ए परभु, मोचो लगे ले जा, मय पापी मनुक आंय!”
9 कसनबलले इतरो मछरी के धरलो किरता समोन आउर हुनचो संगवारीमन खुबे अकचक्याउन गेला।
10 उसनेची जबदी चो बेटा जाकूब, आउर जूहन्ना बले, जोन समोन संगे बुता करतो बीतामन रओत, अकचक्याला। तेबे जीसु समोन के बललो: “तुय नी डर, एदांय ले तुय मनुकमन के मोचो लगे आनसे।”
11 हुनमन डोंगामन के खंडे आनला आउर जमाय के छांडुन जीसु चो पाट-पाट गेला।
लूका 5:4-11
कोढ़ बेमार बीता
12 जिदलदांय जीसु गोटोक सहर ने रलो आउर हुता गोटोक मनुक रये, जेके कोढ़ बेमार जुगे जीतुन रये, आउर हुन जीसु के दखुन भुंये मांडिखुटा देउन गुहारलो: “ए परभु, तुय मन करसीस जाले मोके छुक-छुका करुक सकीस।”
13 जीसु हाथ लमाउन हुनके छिंवलो आउर बललो: “मय मन करेंसे, तुय छुक-छुका हो।” हुन कोढ़ ले तूरते चेकरलो।
14 तेबे जीसु हुनके हुकुम दिलो: “कोकई नी सांग, मानतर जाउन आपने के पुजारी* के दखाव; आउर आपलो सुद होतो काजे जोन चेगावा मोसा चो हुकुम ने सांगलोर आसे, हुनके चेगाव; कसनबलले हुनचो ले गवई होओ कि तुय छुक-छुका होलीसीस।”
15 जीसु चो गोट जुगे जगुर-पगुर होउन गेली, आउर खुबे लोग-कुड़ा हुनके सुनतो काजे आउर आपलाहान बेमारमन ले चेकरतो काजे जुहला।
16 मानतर जीसु, राने एकला जाउन पारथना करते रये।
लकवा मारलो बीता छुकनाय होतोर
17 गोटोक दिने जीसु लोगमन के सिखाते रलो, आउर फरीसीमन आउर नियम-कानुन चो गुरुमन हुता बसुन रओत। हुनमन गलील परघन आउर जहूदिया परघन चो गोटोक-गोटोक गांव ले आउर जरूसलेम सहर ले एउन रओत। लोगमन के छुक-छुका करतो महापरभु चो सकत हुनचो संगे रये।
18 हुदलीदांय आदो लोग लकवा मारलो गोटोक मनुक के खटेया संगे बोउन आनला, आउर हुनमन हुनके जीसु चो पुरे मंडातो उपाय डगराते रला।
19 मानतर भीड़ चो किरता हुनके घर भीतरे जीसु लगे नेउक नी सकला, तेबे हुनमन छानी उपर चो पकनामन के हिटाउन भोंगा बनाला आउर हुन थान ले हुनके खटेया संगे भीड़ चो मंजिगता जीसु चो पुरे उतराला,
20 जीसु हुनमन चो बिसवास के दखुन हुनके बललो: “ए मनुक, तुचो पाप खेमा होली।”
21 तेबे धरम-पंडितमन आउर फरीसीमन गुरमुरुक मुरियाला कि ए कोन आय, जोन महापरभु के निंदरेसे? महापरभु के छांडुन कोन पाप खेमा करुक सके?
22 जीसु हुनमन चो मन चो गोट के जानुन हुनमन के पूछलो: “तुमी आपलाहान मन ने काय बिचारसाहास?
23 काय, तुचो जमाय पापमन खेमा होली बलतोर नोहले उठ, आउर हिंड-बुल बलतोर, कोन गोट नंगत आय?
24 मानतर तुमी जाना कि मय मनुक चो बेटा* के मंजपुर ने पाप खेमा करतो चो हक आसे।” जीसु हुन लकवा मारलो मनुक के बललो: “मय तुके बलेंसे, उठ, आउर तुचो खटेया के बोउन तुचो घरे जा।”
25 हुन तूरते हुनमन चो पुरे उठलो, आउर जोन खटेया ने हुन सोउ रये हुनके बोउन, महापरभु चो जय-जय करते आपलो घरे जाते गेलो।
26 तेबे जमाय भक्याला आउर महापरभु के जय-जय करुक मुरियाला, आउर खुबे डरुन बलुक मुरियाला: “आजी आमी महासंदे चो बुतामन के दखलुसे।”
जीसु, लेवी के हागदेतोर
27 एचो पाछे जीसु खोर ने गेलो, आउर चोंगी-नाका ने बसलोर लेवी के दखलो। आउर हुनके बललो: “मोचो पाटे आव।”
28 तेबे लेवी जमाय के हुताय छांडुन उबा होलो आउर जीसु चो पाट-पाट गेलो।
29 आउर लेवी आपलो घरे जीसु काजे बड़े-रांदा तियार करलो। आउर हुता खुबे पट्टी उसील करतो बीतामन आउर दुसर लोगमन बले खाउक बसला,
30 तेबे फरीसीमन आउर हुनमन चो गोहड़ी चो धरम-पंडितमन जीसु चो चेलामन के गुरमुरुन बलला: “तुमी पट्टी उसील करतो बीतामन आउर पापीमन संगे काय काजे खायसाहास?”
31 जीसु हुनमन के बललो: “बईद तीरतिरा लोग काजे नोआय, मानतर बेमारमन काजे ची लागुआय।
32 मय धरमकारीमन के हागदेउकलाय नाई, मानतर पापीमन चो मन बोहड़ातो काजे ईलेसे।”
लूका 5:30-32
उपास चो गोट
33 आउर हुनमन (फरीसीमन आउर हुनमन चो गोहड़ी चो धरम पंडितमन) जीसु के बलला: जूहन्ना चो चेलामन बेरा-बेरा ने उपास रउआत आउर पारथना बले करुआत; आउर उसनेची फरीसीमन चो चेलामन बले करुआत; मानतर तुचो चेलामन खाउआत।
34 जीसु हुनमन के पूछलो: काय जिदलदांय ले दुला बरातीमन संगे आसे, तेबे हुनमन के उपास कराउक सकास?
35 मानतर हुन बेरा एयदे, जिदलदांय दुला के हुनमन ले अदरे करुन देयदे, तेबे हुन दिनमन ने हुनमन उपास रदे।
36 जीसु हुनमन के गोटोक आउर कटाव बले बललो: “कोनी मनुक नवा फटई चो खाप के काटुन जुना फटई ने नी खिले; असन करलोने, नवा फटई फाटून जायदे आउर हुन खाप जुना फटई संगे नंगत नी फोबे।
37 कोनी नवा अंगुर रस के जुना चामड़ी चो बनालोर तूमा ने नी भोरोत; मानतर असन करलोने नवा अंगुर रस तूमा के फुटाउन बोहेदे, आउर तूमा बले फोकाहा होउन जायदे।
38 नवा अंगुर रस के नवा चामड़ी चो तूमा ने भोरतोर आय।
39 कोनी मनुक जुना अंगुर रस के खाउन भाति नवा अंगुर रस के मन नी करे, कसनबलले हुन बलेसे, ‘जुना ची नंगत आय’।”