मरकुस
लिखलोर नंगत खबर
जूहन्ना चो सिखिया
“दख, मय मोचो दूत के तुचो पुरे पठायंसे,
जोन तुचो काजे बाट तियार करेदे;†
3 राने गोटोक हागदेतो बीता चो राग सुना देयसे:
परभु चो बाट तियार करा,
आउर हुनचो सड़क के सलक करा।”†
4 जूहन्ना राने बपतिस्मा देते, आउर पापमन चो खेमा काजे मन बोहड़ाव चो बपतिस्मा चो गोट सांगते ईलो।
जूहन्ना बपतिस्मा देतो बीता (1:4)
5 सपाय जहूदिया राज आउर जरूसलेम सहर चो रतो खुबे लोगमन निकरुन भाति जूहन्ना लगे गेला, आउर आपलो पापमन के मानुन जरदन नंदी ने हुनचो ले बपतिस्मा धरला।
6 जूहन्ना, ऊंट रुआं चो फटई पींदुन आपलो करांडे चामड़ा चो पट्टा बांदुन रलो। हुन थापा आउर रान चो ओंडार तेल खाते रलो।
7 हुन असन सांगते रलो, “जोन मोचो पाछे एउआय, हुनके मोचो ले आगर सकत आसे, मय लोउन हुनचो पनई-डोरी के ढीलतो लाईक नीआंय।
8 मय तुमके पानी ने बपतिस्मा दिलेसे, मानतर हुन तुमके पवितर आत्मा ले बपतिस्मा देयदे।”
जीसु चो बपतिस्मा आउर परखतोर
9 हुन दिनमन ने, जीसु गलील परघन चो नासरत सहर ले एउन, जरदन नंदी ने जूहन्ना ले बपतिस्मा धरलो।
10 जिदलदांय हुन पानी ले निकरलो, तेबे तूरते जीसु, बादरी के उगाड़ी होते आउर पवितर आत्मा के परेंया असन आपलो उपरे उतरतो के दखलो।
11 हुदलीदांय सरग ले राग सुना दिली: “तुय मोचो लाडरा बेटा आस, तुचो ले मय खुबे हरिक आंसे।”
12 पवितर आत्मा तूरते जीसु के राने पठालो।
13 राने दुय कोड़ी दिन ले सयतान हुनके परखलो आउर जीसु, रान जियादमन संगे रये; आउर सरगदूतमन हुनचो सेवा करते रओत।
जीसु चारझन मछरी मारुमन के हागदेयसे
14 राजा हेरोद, जूहन्ना के धरालो पाछे, जीसु गलील ने एउन महापरभु चो राज चो नंगत खबर सुनालो,
15 आउर बललो: “बेरा पुरलीसे, आउर महापरभु चो राज लगे अमरलीसे। मन बोहड़ाहा आउर नंगत खबर के सतपतेयाहा।”
16 गोटोक दिने, जीसु गलील चो समूंद रेटे ले जाते रये, आउर हुन समोन आउर हुनचो भाई अंदरियास के समूंद ने झारी पकातो के दखलो; कसनबलले हुनमन चो मछरी धरतो पेसा रये।
17 जीसु हुनमन के बललो: “मोचो पाटे इआ, मय तुमके मनुक धरतो बीतामन बनायंदे।”
18 तूरते हुनमन आपलो झारीमन के छांडुन जीसु चो पाट-पाट गेला।
19 आउर खिंडिक पुरे जातो के, जीसु जबदी चो बेटा जाकूब, आउर हुनचो भाई जूहन्ना के डोंगा ने झारी तुनतो के दखलो।
20 जीसु हुनमन के तूरते हागदिलो, आउर हुनमन आपलो बुआ जबदी के, बुता करतो लोगमन संगे डोंगा ने छांडुन, जीसु संगे गेला।
देव-भूत धरलो मनुक
21 जीसु आउर चेलामन कफरनहूम सहर ने ईला आउर हुन, बिसातो दिने* जहूदीमन चो मंडली-घरे जाउन, महापरभु चो गोट सांगुक मुरियालो।
22 आउर लोगमन हुनचो गोट ले खुबे भक्याला; कसनबलले जीसु हुनमन के जहूदीमन चो धरम-पंडितमन असन नाई, मानतर हक संगे महापरभु चो गोट सांगते रलो।
23 हुदलीदांय हुनमन चो मंडली-घरे गोटोक मनुक रलो, जेके देव-भूत धरुन रये।
24 हुन चिचियाउन बललो: “ए जीसु नासरतेया, आमचो ले तुचो काय काम? काय तुय आमके मोराउक ईलीसीस? मय जानेंसे, तुय कोन आस? तुय महापरभु चो पवितर लोग आस!”
25 जीसु रीस होउन देव-भूत के दागा देउन बललो: “ओगाय रा, आउर हुनचो ले निकरुन जा।”
26 तेबे देव-भूत हुन मनुक के अलट-बिलट करुन, आउर जोर ले किरकिरुन हुनचो ले निकरुन गेली।
27 एके दखुन सपाय लोग खुबे भक्याला आउर गोटोक-दुसर के गोटेयाउक मुरियाला: “ए सपाय गोटमन काय आय? ए तो काई नवा सिखिया आय! हुन हक संगे देव-भूतमन के बले हुकुम देयसे, आउर हुनमन हुनचो हुकुम के मानसोत।”
28 आउर जीसु चो नाव गलील चो आली-पाली चो परघनमन ने झटके उड़ली।
जीसु खुबे लोगमन के उजरातोर
29 आउर जीसु तूरते जहूदीमन चो मंडली-घर ले निकरुन, जाकूब आउर जूहन्ना संगे समोन आउर अंदरियास चो घरे ईलो।
30 समोन चो सतरी के जर धरु रली, आउर हुनमन तूरते हुनचो बारे ने जीसु के सांगला।
31 तेबे जीसु हुनचो लगे जाउन हाथ के धरुन हुनके उठालो, आउर हुनचो जर उतरली, तेबे हुन, हुनमन चो सेवा-सुस्तारा करुक मुरियाली।
32 जिदलदांय बेर बसली आउर सांज होली, तेबे लोगमन सपाय बेमार लोगमन के, आउर देव-भूत धरलो लोगमन के बले हुनचो लगे आनला।
जीसु बेमारमन के उजरायसे। (1:32)
33 आउर सहर चो सपाय लोग दुआरे कुड़ा होला।
34 हुन, खुबे लोगमन के जोन बरन-बरन चो बेमारीमन ले दुखी रओत, हुनमन के उजरालो, आउर खुबे देव-भूतमन के निकरालो, आउर देव-भूतमन के गोटेयाउक नी दिलो, कसनबलले हुनमन चिताते रओत कि जीसु कोन आय।
जीसु एकलाय ने पारथना करतोर
35 बड़े बियाने, बेर नी उदलो बेरा, हुन उठुन भाति निकरलो, आउर गोटोक चिमचामनाय राने गेलो आउर हुता पारथना करुक मुरियालो।
36 तेबे समोन आउर हुनचो संगवारीमन हुनके डगर गेला।
37 जिदलदांय हुनमन, हुनके भेटला, तेबे हुनके बलला: “सपाय लोग तुके डगरायसोत।”
38 हुन, हुनमन के बललो: “इआ, आमी कोनी आली-पाली चो गांव-पारा ने जाउं; आउर मय हुता बले महापरभु चो गोट के सांगेंदे, कसनबलले एईकाजे मय ईलेसे।”
39 आउर हुन गलील परघन ने जहूदीमन चो मंडली-घरमन ने जाउन-जाउन बचन सुनाते आउर देव-भूतमन के निकराते रलो।
जीसु गोटोक कोढ़ बेमार बीता के उजरातोर
40 गोटोक कोढ़ बेमार बीता हुनचो लगे एउन हुनके गुहारलो, आउर हुनचो पुरे मांडिखुटा देउन बललो: “तुय मन करसीस जाले मोके छुक-छुका करुक सकीस।”
41 जीसु हुनचो उपरे जीव दुखुन हाथ लमालो, आउर हुनके छिंउन बललो: “मय मन करेंसे, तुय छुक-छुका हो।”
42 तूरते हुनचो कोढ़ बेमार छांडली, आउर हुन छुक-छुका होलो।
43 जीसु तूरते हुनके असन बलुन बिदा करलो:
44 “दख, कोकई काई नी सांग, मानतर जाउन भाति तुय खुद के, जहूदीमन चो पुजारी के दखाव। तुचो चेकरलो चो बारे ने जोन बले मोसा सांगुन रये, हुनके भेंट चेगाव। तेबे हुनमन चो पुरे तुय छुक-छुका होलीसीस बलुन गवई होयदे।”
45 मानतर हुन बाहरे जाउन ए गोट के खुबे सांगते, इतलो बिगराउन दिलो कि जीसु फेर लोगमन चो पुरे नी जाउक सकलो, आउर बाहरे रान जगा ने रये, आउर सपाय बाटले लोग हुनचो लगे एते रओत।