जूहन्ना बपतिस्मा देतो बीता आउर जीसु
3
हुन दिनमन ने, जूहन्ना बपतिस्मा देतो बीता जहूदिया परघन ने एउन, चिमचामनाय राने महापरभु चो गोट सांगुक मुरियालो:
2 “मन बोहड़ाहा, कसनबलले *सरग राज लगे अमरलीसे।”
3 ए हुनी आय जेचो गोट जसाया अगमजानी बाटले बललोर रली:
चिमचामनाय राने गोटोक हागदेतो बीता चो राग सुनुक होयसे,
“परभु चो बाट तियार करा,
हुनचो खोरमन के सीधा बनाहा।”†
4 जूहन्ना ऊंट रुआं चो फटई पींदते रये, करांडे चामड़ा चो पट्टा बांदते रये। थापामन आउर रान चो ओंडार के खाते रये।
5 तेबे जरूसलेम सहर आउर सपाय जहूदिया परघन आउर जरदन नंदी लगे रलो गांव-गूड़ा चो लोगमन जूहन्ना लगे ईला।
6 हुनमन आपलो-आपलो पापमन के मानुन जूहन्ना ले जरदन नंदी ने बपतिस्मा धरला।
7 फरीसीमन आउर सदूकिमन बपतिस्मा धरतो काजे आपलो लगे एतोके दखुन जूहन्ना बपतिस्मा देतो बीता बललो, “ए साप चो पिलामन! कोन तुमके चेतानी दिलो कि महापरभु चो एतो बिती रीस ले पराहा?
8 एईकाजे असन बुता करा कि जेचोले तुमचो मन बोहड़ालास बलुन जानुक होओ;
9 तुमी आपलो-आपलो मने ए नी बिचारा कि अबराहम आमचो पुरखा आय; मय तुमके बलेंसे, ए पकनामन ले महापरभु अबराहम काजे बेटा-बेटी जनमाउक सके।
10 एदांय कुड़ार रूकमन चो बूंदे संगालोर आसे, एईकाजे जोन-जोन रूक नंगत फर नी धरे, हुनमन के गोंदुन आईग ने पकाउन देयदे।
11 मय तो तुमके पानी ले मन बोहड़ातो चो बपतिस्मा देयंसे, मानतर जोन मोचो पाछे एतो बीता आय, हुन मोचो ले जुगे सकत बीता आय; मय हुनचो पनई के बले उठातो लाईक नीआंय। हुन तुमके पवितर आत्मा आउर आईग ले बपतिस्मा देयदे।
12 हुनचो हाथे हुनचो सूप आसे, जेचोले हुन गउं के भूसा ले अलगे करेदे। हुन आपलो कोठार के छुकनाय करुन, गउं के गदेया ने संगायदे, आउर भूसा के केबई नी लिबतो आईग ने डसायदे।”
जूहन्ना ले जीसु चो बपतिस्मा
13 जीसु गलील परघन ले जरदन नंदी रेटे जूहन्ना लगे बपतिस्मा धरुक ईलोदांय,
14 “मोके तुचो ले बपतिस्मा धरतोर आय, मानतर तुय मोचो लगे ईलीसीस?” बलुन जूहन्ना, जीसु के ठेबाउक मुरियालो।
15 जीसु हुनके बललो, “एदांय तुय असने होउक देस, कसनबलले असने बरन ले सबु धरम बुतामन के पुरा करतोर नंगत आय।” तेबे जूहन्ना हुनचो गोट के मानलो।