तारा-गनतियारमन चो एतोर
2
हेरोद राजा चो राजपाट बेरा जीसु चो जनम जहूदिया परघन चो बेतलहम गांव ने होली, तेबे बेर उदिया बाटले तारा-गनतियारमन जरूसलेम सहर ने एउन पूछला,
2 “हुन कहां आसे, जोन जहूदीमन चो राजा होउन जनमलोसे? आमी बेर उदिया बाटे हुनचो तारा के दखलुसे आउर हुनके आमी डंडासरन करुक ईलुसे।”
3 ए गोट के सुनुन हेरोद राजा आउर हुनचो संगे सपाय जरूसलेम सहर ने रतो लोग भक्याउन गेला।
4 तेबे राजा हेरोद लोगमन चो सबु पुजारीमन चो मुखियामन आउर धरम-पंडितमन के जुहा करुन पता लगालो कि किरिस्त चो जनम कहां होतो असन आय।
5 हुनमन राजा के बलला, जहूदिया परघन चो बेतलहम गांव ने, कसनबलले अगमजानीमन बाटले धरमसास्तर ने असने लिखलोर आसे:
6 “ए बेतलहम, तुय जहूदिया परघन ने आसीस,
तुय जहूदिया चो राज करतो बीतामन ले कोचई ले बले नानी नोआस;
कसनबलले तुचो ले गोटोक राज करतो बीता जनमेदे,
जोन मोचो रयत इसराएल चो दखा-राखा करेदे।”†
7 तेबे राजा हेरोद तारा-गनतियारमन के खुसनाय पूछुन जानलो कि तारा केबे दखा देउ रये,
8 तेबे राजा ए बलुन हुनमन के बेतलहम गांव ने पठालो, “तुमी जाउन, हुन लेका-पिला चो बारे ने नंगत पता लगावा, आउर हुनके भेटलास जाले मोके सांगा, एईकाजे कि मय बले एउन हुनके डंडासरन करेंदे।”
9 राजा हेरोद चो गोट के सुनुन तारा गनतियारमन जाते गेला, आउर दखा, जोन तारा के बेर उदिया बाटे दखुन रला हुन तारा, हुनमन चो पुरे-पुरे गेली; आउर जोन थाने लेका-पिला रये, हुताय अमरुन उपरे ठेबली।
10 हुन तारा के दखुन हुनमन खुबे हरिक होला।
11 आउर हुनमन हुन घरे अमरुन पिला के आपलो आया मरियम चो संगे दखला, तेबे हुनमन डंडासरन करुन हुन पिला के पांय पड़ला, आउर आपलाहान थयली ले निसकाउन सोन, धूप आउर बासतेल के भेंट चेगाला।
12 आउर हुनमन हेरोद लगे फेर नी जाहा बलते, सपना ने चेतानी पावला आउर आपलो देस, दुसर बाट ले बोहड़ुन गेला।
मिसर देस ने परातोर
13 तारा-गनतियारमन गेलो पाछे जूसुफ के महापरभु चो गोटोक सरगदूत सपना ने दखा देउन बललो, “उठ, आपलो पिला आउर हुनचो आया के धरुन मिसर देस ने पराव; आउर मोचो सांगत ले, तुय हुताय रा; कसनबलले हेरोद राजा, पिला के मोरते मारतो काजे डगरायदेबे।”
14 तेबे हुन राती ची उठुन पिला आउर हुनचो आया के धरुन मिसर देस जाते गेलो,
15 आउर हेरोद राजा मरोतले जूसुफ हुताय रलो। एईकाजे कि जोन गोट परभु, अगमजानीमन बाटले बलु रये, हुनी पुरा होओ: “मय आपलो बेटा के मिसर देस ले हागदिले।”
16 राजा हेरोद समजलो कि तारा-गनतियारमन हुनके धोका दिला, हुन खुबे रीस होलो, आउर पाईकमन के पठाउन तारा-गनतियारमन सांगलो असन बेतलहम आउर हुनचो लगे-लगे गांवमन चो सबु दुय बरक आउर हुनचो ले नानी लेका पिलामन के मोरते मारतो काजे हुकुम दिलो।
17 तेबे जोन गोट जरमिया अगमजानी बाटले बलुन रये, हुन पुरा होली:
18 “रामाह सहर ने गोटोक कहरतोर कोलार सुना दिली,
गागतोर आउर खुबे दुख-खिसियातो चो;
राहेल आपलो लेकामन काजे गागते रये,
आउर ओगाय होउक मन नी करते रये, कसनबलले एदांय हुन लेकामन नीआत (मोरला)।” †
मिसर देस ले बोहड़तोर
19 हेरोद राजा मोरलो पाछे, महापरभु चो गोटोक सरगदूत मिसर राज ने जूसुफ के सपना ने दखा देउन बललो,
20 “उठ, बाबू आउर हुनचो आया के धरुन इसराएल देस ने जा, कसनबलले जोनमन बाबू के मोरते मारतो काजे डगराते रओत, हुनमन मोरुन गेला।”
21 तेबे जूसुफ उठुन आपलो पिला आउर हुनचो आया के धरुन इसराएल देस ने अमरलो।
22 मानतर जिदलदांय हुन सुनलो कि अरखिलाउस आपलो बुआ हेरोद चो पलटा ने जहूदिया परघन ने राज करेसे, हुन हुता जातो काजे डरलो। मानतर सपना ने महापरभु ले चेतानी पाउन गलील परघन ने गेलो,
23 आउर नासरत नाव चो सहर ने जाउन रउक मुरियालो, कसनबलले अगमजानीमन चो बाटले सांगलो हुन गोटमन पुरा होओ, “हुन नासरतेया बलाय होयदे।”