जीसु के परखतोर
4
तेबे पवितर आत्मा जीसु के राने नीलो कि सयतान हुनके परखो।
2 हुन चालीस राती आउर चालीस मंजन उपास रलो, तेबे हुनके भूक लागली।
3 तेबे सयतान हुनचो लगे एउन बललो, “तुय महापरभु चो बेटा आस जाले, हुकुम देस, ‘ए पकना रोटी बनो’।”
4 जीसु सांगलो: “धरमसास्तर ने असन लिखलोर आसे,
‘मनुक रोटी ले ची नाई,
मानतर महापरभु बललोर, गोटोक-गोटोक गोट ले बले जीव रदे’।” †
5 तेबे सयतान हुनके पवितर सहर, जरूसलेम ने नेउन मंदिर चो गुबा ने उबा करलो,
6 आउर हुनके बललो, “तुय महापरभु चो बेटा आस जाले, तुय खुद खाले डगाव; कसनबलले धरमसास्तर ने लिखलोर आसे:
‘तुचो काजे महापरभु आपलो सरगदूतमन के हुकुम देयदे,
आउर हुनमन तुके, पांयमन ने पकना नी पावो बलते,
हाथे-हाथ झोकदे’।”†
7 जीसु हुनके बललो, “असन बले धरमसास्तर ने लिखलोर आसे:
‘तुय परभु आपलो महापरभु के नी परख’।”†
8 फेर सयतान, जीसु के गोटोक डेंग डोंगरी ने नीलो आउर संवसार चो जमाय राज आउर हुनचो धन-दुगानी के दखाउन
9 हुनके बललो, “तुय पाटा पड़ुन मोके पांय पड़लीस जाले, मय ए जमाय के तुके देउन देयंदे।”
10 तेबे जीसु हुनके बललो, “ए सयतान तुय मोचो लग ले जा, कसनबलले धरमसास्तर ने लिखलोर आसे:
‘तुय परभु आपलो महापरभु चो पांय पड़,
आउर हुनचेई सेवा कर’।”
11 तेबे सयतान हुनचो लगे ले जाते गेलो, आउर सरगदूतमन एउन जीसु चो सेवा-सुस्तारा करुक मुरियाला।
जीसु बचन सांगुक मुरियातोर
12 जूहन्ना के जयल घरे ढाकलो गोट के सुनुन, जीसु गलील परघन ने गेलो;
13 आउर हुन नासरत सहर के छांडुन, समूंद रेटे चो जबुलून आउर नपताली परघन चो कफरनहूम सहर ने जाउन रउक मुरियालो;
14 कसनबलले जसाया अगमजानी बाटले बललो परभु चो गोट, असने ची होओ:
15 “जबुलून आउर नपताली परघन,
जोन समूंद रेटे, जरदन नंदी चो हुन पाट,
बिजातीमन चो गलील परघन ने,
16 जोन लोगमन अंधार ने बसुन रला,
हुनमन बड़े झुजरा-उजर के दखला;
आउर जोन मोरना चो देस आउर छांय ने बसुन रला,
हुनमन उपरे उजर बरली।”†
17 हुनी बेरा ले जीसु बचन सांगुक आउर ए बलुक मुरियालो, “आपलो पापमन ले मन बोहड़ाहा कसनबलले सरग राज लगे ईलीसे।”
जीसु पईल चेलामन के हागदेतोर
18 जीसु गलील चो समूंद रेटे बुलतो बेरा, हुन मछरी धरु दुय भाईमन के समूंद ने झारी पकातो के दखलो; ए हुनमन आत: समोन जेके पतरस बले बलुआत, आउर हुनचो भाई अंदरियास।
19 जीसु हुनमन के बललो, “तुमी मोचो पाट-पाट इआ, मय तुमीमन के मनुक धरु बीतामन बनायंदे।”
20 हुनमन तूरते जाल-झारी के छांडुन जीसु चो पाट-पाट गेला।
21 जीसु खिंडिक फयले जाउन, आउर दुय भाईमन बललोने जाकूब आउर जूहन्ना के हुनमन चो बुआ जबदी संगे डोंगा ने झारी तुनतो के दखलो, आउर जीसु हुनमन के बले हागदिलो।
22 हुनमन तूरते आपलो बुआ आउर डोंगा के छांडुन जीसु चो पाट-पाट गेला।
जीसु बेमारमन के उजरातोर
23 जीसु सपाय गलील परघन ने बुलुन-बुलुन हुनमन चो मंडली-घरमन ने बचन सिखाते, आउर सरग राज चो नंगत खबर सुनाते, आउर लोगमन चो सबु बरन चो बेमारमन आउर निमलमन ले उजराते रये।
24 तेबे जीसु चो नाव सपाय सीरिया परघन ने उड़ली; लोगमन बरन-बरन चो बेमार-दुख ने पड़लो बीतामन के, जीसु लगे आनला, जेके देव-भूत, बापुर आउर लकवा-अलची धरलो बीतामन रओत, आउर जीसु सपाय के उजरालो।
25 गलील आउर दिकापुलीस, आउर जरूसलेम सहर चो, आउर जहूदिया परघनमन चो आउर जरदन नंदी चो हुन पाट ले बले खुबे बड़े भीड़ हुनचो पाट-पाट होला।