जीसु के परखतोर
4
जिदलदांय जीसु जरदन नंदी ले बोहड़ुन ईलो, तेबे हुन पवितर आत्मा ले भरपुर रलो, आउर आत्मा हुनके रान ने नीलो, आउर सयतान पाप ने पाड़तो काजे दुय कोड़ी दिन ले जीसु के परखते रलो।
2 इतरो दिन ने हुन काईची नी खादलो आउर हुन दिनमन पुरा होली तेबे हुनके भूक लागली।
3 आउर सयतान हुनके बललो: “तुय महापरभु चो बेटा आस जाले, ए पकना के रोटी होतो काजे हुकुम देस।”
4 जीसु हुनके बललो: “महापरभु चो किताप ने असन लिखलोर आसे:
‘मनुक सोजे रोटी ले ची जीव नी रउआय’।” † (मानतर महापरभु चो सपाय गोटमन ले जीव रउआय)।
5 तेबे सयतान, हुनके गोटोक डेंग थाने नीलो आउर डंडकीचे गुलाय संवसार चो जमाय राजमन के दखालो,
6 आउर सयतान, जीसु के बललो: “ए जमाय उपरे हक आउर जमाय धन-दुगानी मय तुके देयंदे। ए सपाय मोचो हक ने दिलोर आसे, आउर जेके मय मन करेंसे, हुनके देउन देयंसे।
7 एईकाजे, तुय मोके डंडासरन करुआस जाले, ए जमाय तुचो होयदे।”
8 जीसु हुनके बललो, “असन लिखा आसे:
‘तुके तुचो महापरभु चो पांय पड़तोर आय,
आउर तुके हुनके ची सेवा करतोर आय’।”†
9 तेबे सयतान हुनके जरूसलेम ने नीलो आउर मंदिर चो सबु ले सिग ने उबा करलो, आउर बललो: “तुय महापरभु चो बेटा आस जाले, आपने के एथा ले खाले घसराव।
10 कसनबलले असन लिखलोर आसे:
‘महापरभु आपलो दूतमन के तुके बचातो काजे हुकुम देयदे’।†
11 ‘आउर हुनमन तुके झोकदे
कि तुचो पांय ने पकनामन नी पाओ’।”
12 जीसु हुनके बललो: “धरमसास्तर ने असन बले लिखलोर आसे:
‘तुय, परभु आपलो महापरभु के नी परखतोर आय’।”†
13 जिदलदांय सयतान जमाय परखलो पाछे खिंडिक दिन काजे हुनचो लगे ले जाते गेलो।
लूका 4:1-13
जीसु सेवा-बुता करुक मुरियातोर
14 जीसु, पवितर आत्मा चो सकत ले भरपुर होउन गलील ने बोहड़लो। हुनचो गोट आली पाली चो जमाय राज ने जगुर-पगुर होली।
15 आउर हुन हुता चो मंडली-घरमन ने सिखाते रलो, आउर जमाय लोगमन हुनके सहराला।
आपलो गांव ने मान नी पावतोर
16 आउर हुन नासरत ने ईलो, जोन थाने हुन पिला बेरा रलो; आउर नीती असन बिसातो दिने मंडली-घरे जाउन धरमसास्तर चो पाठ पढ़तो काजे उबा होलो।
17 अगमजानी जसाया चो किताप हुनके दिला आउर हुन किताप के उगाड़ुन, ए गोट के पढ़लो जोन थाने असन लिखलोर रये:
18 “महापरभु चो आत्मा मोचो उपरे आसे,
एईकाजे कि हुन गरीब-दुरीबमन के नंगत खबर सुनातो काजे मोके अबिसेक करलोसे,
आउर कयदीमन के छंडातो चो
आउर कानामन के दखतो सकत देतो चो गोट सुनातो काजे
आउर चेपालो लोगमन के छंडातो काजे
19 आउर महापरभु चो हरिक होतो समया चो गोट सांगतो काजे मोके पठालोसे।” †
20 तेबे जीसु किताप के बंद करुन मंडली-घर चो सेवक के दिलो, आउर बसुन सिखाउक मुरियालो; आउर मंडली-घरे रलो जमाय लोगमन खुबे धियान देउन हुनचो बाटे दखते रला।
21 तेबे हुन हुनमन के बललो: पवितर सास्तर चो ए गोट आजी तुमचो पुरे पुरा होलीसे, जसन एके पढ़तो के सुनलास।
22 आउर जमाय लोगमन जीसु के सहराला, आउर हुनचो टोंड ले निकरलो दया-धरम चो गोट के सुनुन भक्याउन गेला, आउर बलला: काय, ए जूसुफ चो बेटा नोआय?
23 आउर जीसु हुनमन के बललो, “सते तुमी ए कहका मोके बलासे, ‘बईद, तुय आपने के छुकनाय कर’। तुमी ए बले मोके बलासे, ‘ए गोटमन के तुचेई गांव ने कर, जोन आमी सुनलुसे कि तुय कफरनहूम ने करलिसीस’।”
24 आउर हुन बललो: मय तुमके सते सांगेंसे: कोनी बले अगमजानी आपलेई गांव ने इजित-मान नी पाए।
25 आउर मय तुमके सते सांगेंसे: अगमजानी एलिया जीव रलो बेरा जिदलदांय साढ़े तीन बरक ले पानी-बरसा नी होली कि गुलाय देस ने बड़े भूक पड़ली, तेबे इसराएल राज ने खुबे रांडीमन रला।
26 मानतर सयदा राज चो सारफत गांव ने गोटोक रांडी के छांडुन आउर कोचई लगे एलिया के नी पठालो,
27 अगमजानी एलिसा जीव रलो बेरा इसराएल राज ने खुबे कोढ़ बेमारमन रला; मानतर सीरिया राज चो नामान के छांडुन आउर कोनी छुक-छुका नी होला।
28 ए गोट के सुनते खन मंडली-घर ने रलो जमाय लोगमन रीस होला,
29 आउर उबा होउन जीसु के सहर ले खोर ने निकराला, आउर जोन डोंगरी ने हुनमन चो सहर रली, हुनचो सिग ने नेउन हुनके हुताले खाले घसराउंदे बलते नीला,
30 मानतर जीसु हुनमन चो मंजिगता ले निकरुन जाते गेलो।
लूका 4:16-30
भूत धरलो बीता के उजरातोर
31 जीसु, गलील परघन चो कफरनहूम सहर ने ईलो, आउर बिसातो दिने लोगमन के सिखाते रये।
32 लोगमन हुनचो गोट के सुनुन भक्याउन गेला, कसनबलले हुनचो गोट हक संगे रली।
33 हुन मंडली-घरे देव-भूत धरलो गोटोक मनुक रये।
34 हुन खुबे जोर ले किरकिरुन बललो: ए जीसु नासरतेया, आमके तुचो ले काय बुता? काय, तुय आमके नसाउक ईलीसीस? मय तुके जानेंसे कि तुय कोन आस? तुय महापरभु चो पवितर लोग आस।
35 जीसु हुनके दागा देउन बललो: ओगाय रा; आउर हुनचो थान ले निकरुन जा। तेबे देव-भूत हुन मनुक के लोगमन चो पुरे कचाड़ुन, नोकसान नी करुन हुनचो ले निकरुन गेली।
36 एके दखुन जमाय भक्याला, आउर हुनमन गोटोक-दुसर ले गोटेयाउक मुरियाला आउर बलला: ए कसन गोट आय कि हुन हक संगे आउर बल संगे देव-भूतमन के हुकुम देयसे, आउर हुनमन निकरुन जायसोत।
37 एईकाजे चारो कुती जमाय जगा ने जीसु चो गोट जगुर-पगुर होली।
जीसु, समोन (पतरस) चो सतरी आउर दुसर लोगमन के उजरातोर
38 जीसु मंडली-घर ले उठुन समोन (पतरस) चो घरे गेलो। समोन चो सतरी के जर धरु रली, आउर हुनमन, हुनचो काजे जीसु के गुहारला।
39 जीसु हुनचो ओचना लगे जाउन जर के दागा दिलो आउर जर हुनचो ले उतरुन गेली, आउर समोन चो सतरी तूरते उठुन हुनमन चो सेवा-सुस्तारा करुक मुरियाली।
40 बेर बसतोदांय, जोनमन लगे बरन-बरन चो बेमार पड़लो लोगमन रओत, हुनमन के जीसु लगे आनला, आउर हुन गोटोक-गोटोक चो उपरे हाथ संगाउन हुनमन के उजरालो।
41 देव-भूतमन बले खुबे लोगमन ले निकरुन गेला, आउर किरकिरुन बलला: तुय महापरभु चो बेटा आस, मानतर जीसु हुनमन के दागा दिलो आउर गोटेयाउक नी दिलो, कसनबलले हुनमन जानुन रला कि हुन किरिस्त आय।
मंडली-घरे जीसु बचन सुनातोर
42 जिदलदांय बियान पावली, तेबे जीसु निकरुन गोटोक रान जगा ने गेलो, आउर लोग-कुड़ा हुनके डगराते-डगराते हुनचो लगे ईला, आउर हुनके जाउक नी देउन बलला: आमचो थान ले नी जा।
43 मानतर जीसु हुनमन के बललो: मोके दुसर-दुसर सहरमन ने बले महापरभु चो राज चो नंगत खबर सांगतोर ची आय, कसनबलले एचई काजे मोके पठालोर आसे।
44 आउर हुन जहूदिया राज चो मंडली-घरमन ने नंगत खबर सांगते रलो।