जीसु, कोढ़ बेमार बीता के छुक-छुका करेसे
8
जिदलदांय जीसु डोंगरी ले उतरलो, तेबे कुड़ायक भीड़ हुनचो पाट-पाट होला।
2 तूरते गोटोक कोढ़ बेमार बीता जीसु लगे एउन हुनके पांय पड़ुन बललो, “ए परभु, तुय मन करसीस जाले, मोके छुक-छुका करुक सकीस।”
3 जीसु हुनके छिंउन बललो, “मय मन करेंसे, तुय छुक-छुका हो।” आउर हुन कोढ़ बेमार ले तूरते छुकनाय होलो।
4 तेबे जीसु हुनके बललो, “दख, कोकई नी सांग, मानतर तुय जाउन आपने के पुजारी के दखाव आउर जोन भेंट मोसा ठेबाउ रये हुनके चेगाव, कसनबलले हुनचो गवई होओ।”
पलटन चो बड़े मुखिया चो बिसवास
5 जीसु कफरनहूम सहर ने ईलो बेरा गोटोक पलटन चो बड़े मुखिया हुनचो लगे एउन गुहारलो,
6 “ए परभु, मोचो कमेया के लकवा मारलो किरता खुबे दुख ने पड़लोसे।”
7 जीसु हुनके बललो, “मय एयंदे आउर हुनके उजराउन देयंदे।”
8 पलटन चो बड़े मुखिया बललो, “ए परभु, तुय मोचो घरे एतो लाईक मय नोआंय। मानतर सोजे तुय बलुन देस, मोचो कमेया उजरुन जायदे।
9 कसनबलले मय बले दुसर काजे बुता करु बीता आंय, आउर पाईकमन बले मोचो हक ने आसोत। जेबे मय एकलो के, ‘जा’ बलले, हुन जायसे; आउर दुसर के, ‘आव’ बलले, हुन एयसे; आउर जिदलदांय मोचो कमेया के, ‘एके कर’ बलले, हुन करेसे।”
10 एके सुनुन जीसु अकचक्याउन गेलो, आउर आपलो पाटे एतो लोगमन के दखुन बललो, “मय तुमके सते सांगेंसे, जमाय इसराएलिमन ने बले असन बिसवास के मय नी दखले।
11 मय तुमके बलेंसे, खुबे लोगमन बेर उदिया आउर बेर बुड़ती बाटले एउन अबराहम, इसहाक आउर जाकूब चो संगे सरग राज ने खाउक बसदे।
12 मानतर राज चो जनम-बाड़ लोगमन के बाहरी अंधार ने छांडुन देयदे: आउर हुता हुनमन गागदे आउर दात कडरदे।”
13 तेबे जीसु पलटन चो बड़े मुखिया के बललो, “जा, जसन तुय बिसवास करलीस उसने तुचो काजे होओ।” हुनचो कमेया हुनी बेरा छुकनाय होलो।
जीसु, बेमार बीतामन के उजरायसे
14 जीसु, पतरस चो घरे ईलो, तेबे हुन पतरस चो सतरी के जर धरलोके ओचना ने सोवलो के दखलो।
15 जीसु हुनके छिंवलो आउर हुनचो जर उतरली, तेबे हुन ओचना ले उठुन जीसु चो सेवा-सुस्तारा करुक मुरियाली।
16 सांज बेरा लोगमन देव-भूतमन धरलो बीतामन के जीसु लगे आनला, जीसु सोजे दागा देउन भूतमन के निकरालो; आउर सपाय बेमार बीतामन के छुकनाय करलो।
17 असन बरन ले जसाया अगमजानी बाटले बललो गोट पुरा होली:
“हुन आपने आमचो निमलमन के धरलो आउर आमचो बेमार-डंडमन के उठालो।”†
जीसु चो चेला बनतो चो मोल
18 जीसु आपलो भोंवरक बड़े भीड़ के दखुन आपलो चेलामन के समूंद चो हुन पाट जातो काजे हुकुम दिलो।
19 तेबे गोटोक धरम-पंडित हुनचो लगे एउन बललो, “ए गुरुजी, तुमी जोन थाने बले जाहासे, हुन थाने मय तुमचो पाट-पाट एयंदे।”
20 जीसु हुनके बललो, “कोलेया काजे फोंगाड़ आउर चड़ई काजे गूड़ा आसे; मानतर मय मनुक चो बेटा के मुंड टेकतो काजे बले ठान नीआय।”
21 गोटोक आउर चेला जीसु के बललो, “ए परभु, आगे मोके मोचो बुआ चो मोड़ी के माटी देतो काजे जाउक देस।”
22 जीसु हुनके बललो, “तुय मोचो पाट-पाट आव, आउर मोरलोमन* के आपलो मोड़ी के माटी देउक देस।”
जीसु लेहरा-हलका के थमातोर
23 जेबे जीसु डोंगा ने चेगलो, तेबे हुनचो चेलामन बले हुनचो पाट के नी छांडला।
24 हुदलीदांय समूंद ने बड़े भारी लेहरा-धुका उठली, डोंगा लेहरा ले बुड़ुक मुरियाली, मानतर जीसु सोवते रये।
25 तेबे चेलामन जीसु लगे एउन बलला, “ए परभु, आमके बचाव, आमी मोरुंदेबे।”
26 जीसु, हुनमन के बललो, “ए खिंडिक पतेयातो लोगमन, तुमी काय काजे डरेसाहास?” तेबे जीसु उठुन लेहरा-धुका के दागा दिलो, आउर सपाय लेहरा-धुका थामली।
27 आउर हुनमन भक्याउन बलुक मुरियाला, “ए कसन मनुक आय, लेहरा-धुका आउर हलकामन बले एचो हुकुम मानेसोत।”
जीसु दुयझन भूत धरलो मनुकमन के उजरातोर
28 जिदलदांय जीसु समूंद चो हुन पाट गदरेनिया राज ने अमरलो, तेबे दुयझन देव-भूत धरलो मनुकमन मोड़ा-भाटा ले निकरुन जीसु के भेटला। हुनमन इतलो उड़गाड़ी रओत कि कोनी हुन बाटले जाउक नी सकते रओत।
दुयझन भूत धरलो मनुकमन (8:28)
29 हुनमन चिचियाउन बलला, “ए महापरभु चो बेटा, आमचो ले तुके काय बुता? काय, तुय डंड-बेरा ले आगे आमके डंड देउक ईलीसीस?”
30 हुताले खिंडिक लापी, खुबे बरांहामन चो गोहड़ा चरते रओत।
31 गुहार करुन देव-भूतमन जीसु के बलला, “तुय आमके निकराउचे आस जाले, बरांहामन चो गोहड़ा ने पठाव।”
32 जीसु हुनमन के बललो, “जाहा!” देव-भूतमन निकरुन बरांहामन ने समाला, आउर जमाय बरांहा गोहड़ा तूरते पानी खंडे जाउन, घसरुन बुड़ून मोरला।
33 तेबे बरांहा चराउ-बीतामन पराते सहरे जाउन ए जमाय गोट के आउर जोनमन के देव-भूतमन धरु रये, हुनमन चो बारे ने बले लोगमन के सांगला।
34 तेबे जमाय सहर चो लोग जीसु के भेट करुक ईला, हुनमन जीसु के गुहार करुन बलला, तुय आमचो राज चो संद ले बाहरे जा।