जीसु, लकवा मारलो मनुक के उजरायसे
9
फेर जीसु, गलील समूंद चो हुन पाट डोंगा नाहकुन आपलो सहर कफरनहूम ने ईलो।
2 तेबे गोटोक लकवा मारलो बीता के लोगमन खटेया संगे बोउन जीसु लगे आनला, हुनमन चो बिसवास के दखुन लकवा मारलो बीता के जीसु बललो, “ए बेटा, ढाढ़ुस कर, तुचो पाप खेमा होली।”।
3 एके सुनुन धरम-पंडितमन आपलो मने बिचारला, “ए महापरभु के निंदरेसे।”
4 जीसु हुनमन चो बिचार के जानुन बललो, “तुमी आपलो मने असुद बिचार काय काजे करसाहास?
5 ए गोटमन ले काय सरसरा आय? ‘तुचो पाप खेमा होली बलतोर’ कि ‘उठ, हिंड-बुल बलतोर।’
6 मानतर तुमी ए जाना कि मंजपुर ने मनुक चो बेटा के पाप खेमा करतो चो हक आसे।” जीसु लकवा मारलो बीता के बललो, “उठ, आपलो खटेया के बोउन आपलो घरे जा।”
7 हुन उठुन आपलो घरे जाते गेलो।
8 एके दखुन लोगमन डरला आउर महापरभु चो मयमा करला जोन मनुकमन के असन हक दिलोसे।
जीसु, मत्ती के हागदेतोर
9 जिदलदांय जीसु हुताले पुरे गेलो, मत्ती नाव चो गोटोक मनुक के चोंगी-नाका ने बसलोर दखलो। जीसु हुनके बललो, “मोचो पाट-पाट आव।” हुन उठुन जीसु चो पाट-पाट गेलो।
10 जिदलदांय जीसु मत्ती चो घरे खाउकलाय बसलो, तेबे पट्टी धरु बीतामन आउर पापीमन बले एउन जीसु आउर हुनचो चेलामन संगे खाउकलाय बसला।
11 फरीसीमन एके दखुन जीसु चो चेलामन के बलला, “तुमचो गुरुजी पट्टी धरु बीतामन आउर पापीमन संगे काय काजे खाउआय?”
12 एके सुनुन जीसु बललो, “बईदकार बरसक बीतामन काजे नोआय, मानतर बेमारमन काजे लागुआय।
13 तुमी जाउन धरमसास्तर चो ए बचन सीखा: ‘मय जतरा-पानी ले नाई, मानतर दया करतो काजे मन करेंसे।’ मय धरमातीमन के नाई, पापीमन के हागदेउक ईलेसे।”
उपास चो गोट
14 तेबे जूहन्ना चो चेलामन जीसु लगे एउन पूछला, “काय किरता ने आमी आउर फरीसी इतलो उपास-पियास करुंसे, मानतर तुचो चेलामन उपास नी करोत?”
15 जीसु हुनमन के बललो, “काय, दुला बरातीमन संगे रलोदांय कोनी दुखी होउक सकोत? मानतर हुन दिनमन एयदे, जिदलदांय दुला के बरातीमन ले अलगे करतोर होयदे, हुदलदांय हुनमन उपास-पियास करदे।”
16 “नवा फटई चो खाप के जुना फटई ने नी खिलोत, कसनबलले हुन नवा खाप सकड़ाउन जुना फटई के जुगे फटाउन देयदे।
17 नवा अंगुर रस के जुना तूमा ने नी भोरोत, कसनबलले असन करले तूमा फुटुन जायदे, आउर अंगुर रस बोहुन जायदे आउर तूमा* बले नसुन जायदे; मानतर नवा तूमा ने नवा अंगुर रस भोरुआत। असन बरन ले दुनो नसतोले बाचेसे।”
मोरना के जीततोर
18 ए गोट के जीसु बलते ची रये, तेबे मंडली-घर चो गोटोक मुखिया जीसु लगे एउन पांय पड़ुन बललो, “मोचो बेटी एबे मोरलीसे, मानतर तुय मोचो संगे एउन हुनके छिंवले हुन जीव उठेदे।”
19 जीसु उठुन आपलो चेलामन संगे हुनचो पाट-पाट जाते रलो।
20 हुनी बेरा गोटोक बायले जेके बारा बरक ले झरनी बेमार* रये, जीसु चो पाटकुती ले एउन हुनचो आंचरा फटई के छिंवली।
21 हुन आपलो मने-मने बलते रये, “मय जीसु चो आंचरा फटई के छिंवले जाले छुकनाय होयंदे।”
22 जीसु उलटुन हुनके दखुन बललो, “बेटी ढाढ़ुस कर; तुचो बिसवास तुके छुकनाय करली।” हुन बायले हुदलीदांय छुकनाय होली।
23 जेबे जीसु हुन मंडली-घर चो मुखिया घरे अमरलो आउर बांवसी बजातो बीतामन आउर गागतो-बोगतो भीड़ के दखुन बललो,
24 “लापी गुचा, लेकी नी मोरलीसे, मानतर सोयसे।” ए गोट के सुनुन लोगमन हांसला।
25 मानतर जेबे भीड़ के बाहरे करलो गुने, जीसु भीतरे जाउन लेकी चो हाथ के धरलो, आउर हुन जीव उठली।
26 आउर ए गोट के हुन परघन चो जमाय लोग सुनला।
कानामन के आउर कोंदा के उजरातोर
27 हुताले जीसु पुरे जातो के दुयझन कानामन, “ए दाउद चो बेटा, आमके जीव दुख!” बलते हुनचो पाट-पाट गेला।
28 जेबे हुन घरे अमरलो, तेबे हुन कानामन हुनचो लगे ईला, जीसु हुनमन के पूछलो, “काय, मय ए बुता करुक सकें बलुन तुमी पतेयायसाहास?” हुनमन बलला, “हव, परभु!”
29 तेबे जीसु हुनमन चो आंईक के छिंउन बललो, “तुमचो बिसवास चो असन तुमचो काजे होओ।”
30 आउर हुनमन दखुक मुरियाला। तेबे जीसु हुनमन के नंगत चेतानी देउन बललो, “दखा, ए गोट कोकई जान नी पड़ो।”
31 मानतर हुनमन हुताले जाउन ए गोट के हुन जमाय परघन ने उड़ान दिला।
32 जिदलदांय हुनमन बाहरे जाते रओत, तेबे लोगमन गोटोक देव-भूत धरलो कोंदा के जीसु लगे आनला।
33 आउर देव-भूत के निकरालो के कोंदा गोटेयाउक मुरियालो आउर भीड़ चो लोग दखुन भक्याउन बलला, “इसराएल देस ने, आमी असन केबई नी दखु रलु।”
34 मानतर फरीसीमन बलला, “ए तो देव-भूतमन चो मुखिया (सयतान) चो साहरा ले भूतमन के निकरायसे।”
भूतियारमन कम मानतर पाकलो फसल खुबे
35 जमाय गांव-सहर ने जीसु बुलुन हुनमन चो मंडली-घरमन ने बचन सांगते रये, आउर सरग राज चो नंगत खबर सुनाते रये, आउर लोगमन चो जमाय बरन चो बेमारमन के उजराते आउर निमल बीतामन के बल देते रये।
36 भीड़ के दखुन जीसु लोगमन काजे जीव दुखलो, कसनबलले हुनमन आंधी-बिरली भुलकलो धोरई नोहलो मेंडामन असन रओत।
37 जीसु आपलो चेलामन के बललो, “बेड़ा ने पाकलो फसल खुबे आसे, मानतर भूतियारमन कम आसोत।”
पाकलो फसल जुगे मानतर भूतियारमन खिंडिक (9:37)
38 एईकाजे बेड़ा चो मालिक (महापरभु) के गुहारा कि हुन आपलो बेड़ा ने खुबे भूतियारमन के फसल काटुक पठाओ।