जूहन्ना बपतिस्मा देतो बीता चो बुता
3
बड़े राजा तिबिरियुस कयसर चो राज करतो पंदरा बरक होउन रये, हुदलदांय
पुन्तियुस पिलातुस जहूदिया परघन चो दखा-राखा करतो बीता रये
आउर हेरोद अंदिपास, गलील परघन ने राज करते रये
आउर हुनचो भाई फिलिपुस, इतूरया आउर तरखोनीतिस उपरे राज करते रये,
आउर लिसानियास, अबिलेने चो राज करतो बीता रये।
2 हुदलदांय हन्नास आउर काइफा बड़े पुजारीमन रला, हुनी समया ने महापरभु, रान ने जकरिया चो बेटा जूहन्ना के गोटेयालो।
3 आउर जूहन्ना जरदन नंदी चो आली-पाली चो गुलाय परघनमन ने जाउन, पापमन चो खेमा काजे मन बोहड़ातो चो बपतिस्मा चो गोट सांगलो।
4 जसन जसाया अगमजानी चो किताप ने लिखलोर आसे:
“रान ने गोटोक हागदेतो बीता चो राग होयसे कि,
परभु चो बाट तियार करा,
आउर हुनचो सड़कमन के सलक बनाहा।
5 गोटोक-गोटोक खोदरा के पाटतोर होयदे,
आउर गोटोक-गोटोक डोंगरी आउर ढिपका के सम करतोर होयदे;
आउर कोकटी-बाकटी बाट के
सीधा आउर खोदरा-ढिपका बाट के सलक करतोर होयदे।
6 आउर जमाय जात चो लोगमन महापरभु चो मुक्ति के पावदे।”†
7 खुबे लोगमन जूहन्ना ले बपतिस्मा धरतो काजे निकरुन ईला, मानतर जूहन्ना हुनमन के बललो: “ए साप चो पिलामन, तुमके कोन सांगलो कि महापरभु चो एतो बिती रीस ले पराहा।
8 एईकाजे मन बोहड़ातो लाईक फर आना; आउर आपलो मन ने असन बिचार नी करा कि आमचो पुरखा अबराहम आय (आमी डंड ले बाचुंदे), कसनबलले मय तुमके बलेंसे, महापरभु ए पकनामन ले अबराहम काजे पिलामन जनमाउक सके।
9 आउर एबे टंगिया, रूकमन चो बूंदे संगालोर आसे; कसनबलले जोन रूक नंगत फर नी धरेसे, हुनके गोंदुन आईग ने पकाउन देयदे।”
10 लोग-कुड़ा हुनके पूछला: “तेबे आमके काय करतोर आय?”
11 जूहन्ना हुनमन के बललो: “जेचो लगे दुयठन कुड़ता आसे, गोटोक के हुनके देतोर आय, जेचो लगे नीआय। आउर जेचो लगे भात आसे, हुनके बाटा करतोर आय।”
12 पट्टी उसील करतो बीतामन बले बपतिस्मा धरतो काजे एउन रओत, हुनमन हुनके पूछला: “ए गुरुजी, आमी काय करुआंव?”
13 जूहन्ना हुनमन के बललो: “कानुन चो हिसाब ले आगर पट्टी उसील नी करा।”
14 भीड़ मंजिगता रोम राज चो पाईकमन रला, हुनमन बले जूहन्ना के पूछला: “आमी काय करुआंव?” हुन, हुनमन के बललो: “बेरपेला कोचई ले पयसा नी झीका आउर कोकई फंद बदी नी दिया। आपलो भूती ले हरिक राहा।”
रोम राज चो पाईक (3:14)
15 जोन लोगमन किरिस्त चो एतो बाट टाकते रला, हुनमन आपलाहान-आपलाहान मन ने जूहन्ना चो बारे ने बिचारुक मुरियाला कि हुन किरिस्त तो नोआय?
16 तेबे जूहन्ना हुन जमाय के बललो: मय तुमके पानी ले बपतिस्मा देयंसे, मानतर हुन एयसे, जोन मोचो ले खुबे बड़े आय। मय हुनचो पनई-डोरी के ढीलतो लाईक बले नोआंय। हुन तुमके पवितर आत्मा आउर आईग ले बपतिस्मा देयदे।
17 गउं के भूसा ले अलगातो सूप हुनचो हाथे आसे, आउर हुन आपलो कोठार के छुक-छुका करेदे; आउर गउं के आपलो गदेया ने संगायदे। मानतर भूसा के हुन, केबई नी लिबतो आईग ने पकाउन देयदे।
18 जूहन्ना खुबे नंगत गोटमन सांगुन-सांगुन लोगमन के उकसाते रये।
19 मानतर जूहन्ना, राजा हेरोद अंदिपास के हुनचो भाई फिलिपुस चो बायले, हेरोदिया के राकलो काजे, आउर हुनचो करलो जमाय अडरा बुता काजे दागा दिलो।
20 एईकाजे हेरोद, जूहन्ना के जयल-घरे ढकालो, जोन हुनचो जमाय अडरा बुतामन ले जुगे अडरा रली।
जीसु चो बपतिस्मा
21 जिदलदांय जमाय लोगमन बपतिस्मा धरला, आउर जीसु बले बपतिस्मा धरलो पाछे पारथना करते रये, तेबे बादरी उगाड़ी होली,
22 आउर पवितर आत्मा परेंया असन होउन हुनचो उपरे उतरलो, आउर सरग ले असन गोट होली: “तुय मोचो लाडरा बेटा आस, मय तुचो ले खुबे हरिक आंसे।”
लूका 3:19-22
जीसु चो पुरखा-पाटीमन
23 जिदलदांय जीसु सेवा-बुता करुक मुरियालो, हुनचो उमर तीसेक बरक होउन रये, आउर (जसन लोगमन बिचारते रला) हुन
जूसुफ चो बेटा आय,
आउर जूसुफ, एली चो बेटा रये,
24 आउर एली, मतात चो,
आउर मतात, लेवी चो,
आउर लेवी, मलकी चो,
आउर मलकी, जन्ना चो,
आउर जन्ना, जूसुफ चो,
आउर जूसुफ, मतिया चो,
25 आउर मतिया, आमोस चो,
आउर आमोस, नहूम चो,
आउर नहूम, असलया चो,
आउर असलया, नोग चो,
26 आउर नोग, मात चो,
आउर मात, मतिया चो,
आउर मतिया, सिमी चो,
आउर सिमी, जोसेख चो,
आउर जोसेख, जोदा चो,
27 आउर जोदा, जोनान चो,
आउर जोनान, रेसा चो,
आउर रेसा, जरुबाबिल चो,
आउर जरुबाबिल, सालतिएल चो,
आउर सालतिएल, नेरी चो,
28 आउर नेरी, मलकी चो,
आउर मलकी, अद्दी चो,
आउर अद्दी, कोसाम चो,
आउर कोसाम, इलमोदाम चो,
आउर इलमोदाम, एर चो,
29 आउर एर, एसू चो,
आउर एसू, एलीएजर चो,
आउर एलीएजर, जोरीम चो,
आउर जोरीम, मतात चो,
आउर मतात, लेवी चो,
30 आउर लेवी, सिमोन चो,
आउर सिमोन, जहूदा चो,
आउर जहूदा, जूसुफ चो,
आउर जूसुफ, जोनान चो,
आउर जोनान, इलयाकीम चो,
31 आउर इलयाकीम, मलेआ चो,
आउर मलेआ, मिन्ना चो,
आउर मिन्ना, मतात चो,
आउर मतात, नातान चो,
आउर नातान, दाउद चो,
32 आउर दाउद, जिसय चो,
आउर जिसय, ओबेद चो,
आउर ओबेद, बोअज चो,
आउर बोअज, सलमोन चो,
आउर सलमोन, नहसोन चो,
33 आउर नहसोन, अमीनादाब चो,
आउर अमीनादाब, अरनी चो,
आउर अरनी, हिसरोन चो,
आउर हिसरोन, फिरिस चो,
आउर फिरिस, जहूदा चो,
34 आउर जहूदा, जाकूब चो,
आउर जाकूब, इसहाक चो,
आउर इसहाक, अबराहम चो,
आउर अबराहम, तिरा चो,
आउर तिरा, नाहोर चो,
35 आउर नाहोर, सरूग चो,
आउर सरूग, रऊ चो,
आउर रऊ, फिलिग चो,
आउर फिलिग, एबिर चो,
आउर एबिर, सिला चो,
36 आउर सिला, केनान चो,
आउर केनान, अरफजद चो,
आउर अरफजद, सेम चो,
आउर सेम, नूह चो,
आउर नूह, लिमिक चो,
37 आउर लिमिक, मथूसिला चो,
आउर मथूसिला, हनोक चो,
आउर हनोक, जिरिद चो,
आउर जिरिद, महलेल चो,
आउर महलेल, केनान चो,
38 आउर केनान, एनोस चो,
आउर एनोस, सेत चो,
आउर सेत, आदम चो,
आउर आदम, महापरभु चो बेटा रये।