जूहन्ना के पूजतोर
14
राजा हेरोद चवथाई गलील परघन ने राजपाट करतो बेरा जीसु चो बारे ने सुनलो,
2 तेबे राजा आपलो सेवा-सुस्तारा करु बीतामन के बललो, “ए तो जूहन्ना बपतिस्मा देतो बीता जीव उठलोसे, एईकाजे ए खुबे सकत बुता करेसे।”
3-4 राजा हेरोद आपलो भाई फिलिपुस चो बायले हेरोदिया के राकलो काजे, जूहन्ना हुनके बलु रये कि आपलो भाई चो बायले के राकतोर नी बने। एईकाजे जूहन्ना के राजा हेरोद बंदाउन जयल घरे ढकालो।
5 राजा हेरोद जूहन्ना के मोरते मारतो काजे बिचारलो, मानतर लोगमन जूहन्ना के अगमजानी मानतो किरता लोगमन के डरते रये।
6 राजा हेरोद चो जनम-दिने, हेरोदिया चो बेटी राजा चो सगा लोग पुरे बड़ेया नाचुन हुनमन चो मन के जीतली।
7 तेबे राजा हेरोद हरिक होउन किरिया खाउन बललो, “जोन बले तुय मांगसे, मय तुके देयंदे।”
8 तेबे लेकी बलली, “जूहन्ना बपतिस्मा देतो बीता चो मुंड के काटुन गोटोक परात ने मोके एथा आनुन देस।” एईकाजे कि हुनचो आया आगे ले हुनके सिखाउ रये।
9 राजा खुबे फिकिर ने पड़लो, मानतर आपलो सगामन पुरे जुबान दिलो किरता, जूहन्ना चो मुंड के हुनके देउन देतो काजे हुकुम दिलो;
10 आउर राजा जयल-घरे पाईकमन के पठाउन जूहन्ना चो मुंड के कटालो,
11 आउर हुनचो मुंड के परात ने आनुन लेकी के दिला, आउर लेकी हुनचो आया के दिली।
12 एचो पाछे जूहन्ना चो चेलामन एउन हुनचो धड़ के नेउन माटी दिला, आउर जाउन जीसु के सपाय गोट सांगला।
जीसु पांच हजार लोगमन के खुआयसे
13 जेबे जीसु ए गोट के सुनलो, तेबे हुन डोंगा चेगुन कोनी छीड़ा जगा ने गेलो। एके जानुन लोगमन सहरमन ले निकरुन जीसु चो पाट-पाट हिंडते गेला।
14 डोंगा ले उतरुन जीसु गोटोक बड़े भीड़ के दखलो आउर लोगमन के जीव दुखुन, हुनमन चो सपाय बेमारमन के उजरालो।
15 सांज होतोके चेलामन हुनचो लगे एउन बलला, “ए छीड़ा जगा आय आउर बेर बले बसेसे; एमन के गांवमन ने जाउन आपलो काजे खादी-पीदी घेनतो काजे जाउक देस।”
16 जीसु बललो, “एमन के जातोर जरुर नोआय! तुमी ची एमन के काई खातो काजे दियास।”
17 तेबे चेलामन बलला, “एथा आमचो लगे पांचठन रोटी आउर दुयठन मछरी के छांडुन आउर काईची नीआय।”
18 जीसु बललो, “रोटी-मछरीमन के मोचो लगे आना।”
19 फेर जीसु, लोगमन के रोंडा ने बसतो काजे बललो, आउर पांचठन रोटी आउर दुयठन मछरी के धरुन सरग बाटे दखुन धन-धन करलो; आउर हुन रोटी-मछरीमन के गोंदा करुन-करुन चेलामन के देते गेलो, चेलामन लोगमन के दिला।
20 सपाय लोगमन पेट भर खादला, सपाय खादलो पाछे चेलामन लगे बारा फाडरी गोंदामन उरली।
21 खाउ लोगमन ने बायले-पिलामन के छांडुन, मनुकमन पांचेक हजार रला।
जीसु पानी उपरे हिंडेसे
22 तूरते जीसु चेलामन के बेरपेला डोंगा ने चेगालो आउर आपलो ले आगे समूंद चो हुन पाट जातो काजे पठालो, आउर लोगमन के जाउक दिलो।
23 लोगमन गेलो पाछे, जीसु गोटोक आउर डोंगरी ने पारथना करुकलाय गेलो; आउर हुताय राती बेरा एकला रलो।
24 हुदलदांय समूंद मंजारे चेलामन चो डोंगा, पुरे ले लेहरा बोहतो किरता डीग-डाग होते रये।
25 आउर कुकड़ा बासतो बेरा जीसु समूंद मंजार ले पानी उपरे हिंडते-हिंडते हुनमन लगे ईलो।
26 चेलामन हुनके पानी उपरे हिंडतो के दखुन खुबे डरला आउर “ए तो भूत आय!” बलुन चिचियाला।
27 “धोसा करा, नी डरा! मय आंय”, जीसु बललो।
28 तेबे पतरस बललो, “ए परभु, तुय ची आस जाले, मोके पानी उपरे हिंडुन तुचो लगे एतो काजे हुकुम देस।”
29 जीसु बललो, “आव!” तेबे पतरस डोंगा ले उतरुन पानी उपरे हिंडुक मुरियालो।
30 मानतर पुरे लेहरा-हलका के दखुन डरलो, आउर जेबे हुन बुड़ुक मुरियालो तेबे चिचियाउन बललो, “ए परभु, मोके बचाव!”
31 जीसु टपके हुनचो हाथ के धरुन झीकलो आउर बललो, “ए इजिक पतेयातो बीता, तुय काय काजे दुक-पुछ करलीस?”
32 जिदलदांय हुनमन डोंगा ने चेगला, तेबे लेहरा-हलका थामली।
33 एके दखुन डोंगा ने रलो सपाय चेलामन जीसु के डंडासरन करला, आउर बलला, “सते, तुय महापरभु चो बेटा आस।”
जीसु खुबे बेमारमन के उजरायसे