सुद आउर असुद चो गोट
15
जरूसलेम सहर ले खिंडिक फरीसी आउर धरम-पंडितमन जीसु लगे एउन पूछला,
2 “तुचो चेलामन पुरखा-पाटी बेरा चो नीती के काय काजे नी मानोत, आउर हाथ नी धोअलोर खायसोत?”
3 तेबे जीसु हुनमन के बललो, “तुमी बले आपलो नीती किरता काय काजे महापरभु चो हुकुम के नी मानास?
4 कसनबलले महापरभु बलु रये, ‘आपलो आया-बुआ के मान करतोर आय’, आउर ‘जोन कोनी बले आपलो आया-बुआ के अडरा बलेदे, हुनके मोरते मारतोर आय।’
5 मानतर तुमी आपलो आया-बुआ के बलेसाहास, ‘जोन बले मय तुमके देतोर रये, हुनके महापरभु के भेंट चेगालेसे’,
6 आउर असने बरन ले आपलो आया-बुआ चो मान नी करुन, तुमी आपलो नीती चो किरता महापरभु चो बचन के टारुन देयसाहास।
7 ए कपटीमन, अगमजानी जसाया तुमचो बारे ने सते बलुन रये:
8 ‘एमन मोके टोंड ले ची मान करुआत,
मानतर एमन चो मन मोचो ले लापी रउआय।
9 आउर एमन फोकाहा मोचो सेवा करुआत,
आउर मनुकमन चो नीती के, धरम गोट आय बलुन लोगमन के सिखायसोत’।”†
मनुक के असुद करतो गोट
10 फेर जीसु लोगमन के हागदेउन बललो, “सुना, आउर समजा,
11 जोन बले टोंड भीतरे जायसे, हुन मनुक के असुद नी करे, मानतर जोन टोंड ले बाहरे निकरेसे, हुनी मनुक के असुद करेसे।”
12 तेबे चेलामन जीसु लगे एउन बलला, “काय तुय नी जानीस, तुचो गोट फरीसीमन के अडरा लागली?”
13 एके सुनुन जीसु बललो, “जोन बुटामन के मोचो सरग चो बुआ नी रोपलोसे, हुनके उकनेदे।
14 एईकाजे हुनमन के जाउक दियास; एमन बाट दखाउ काना आत। कसनबलले काना, काना के बाट दखालोने, दुनो खोदरा ने घसरदे।”
15 फेर पतरस, जीसु लगे एउन बललो, “ए कटाव चो अरथ आमके सांग।”
16 जीसु बललो, “तुमी एबले नी समजलासाहास?
17 काय तुमी नी समजास, जोन टोंडे जायसे हुन पेटे जाउन, झाड़ा बाटले निकरेसे?
18 हुन मनुक के असुद नी करे, मानतर हुनी मनुक के असुद करेसे जोन टोंड ले निकरेसे।
19 कसनबलले अडरा-बिचार, मोरते मारतोर, बेबिचार*, दुसर के आंईक लगातोर, चोरतोर, फंद बदी देतोर, आउर निंदरतोर, ए सपाय मन ले ची निकरेसे।
20 ए जमाय गोट मनुक के असुद करेसे, मानतर हाथ नी धोअलोर खादले मनुक के असुद नी करे।”
कनानी बायले चो बरसक बिसवास
21 तेबे जीसु हुन थान ले निकरुन, सूर आउर सयदा परघनमन बाटे गेलो।
22 हुन परघन चो गोटोक कनानी बायले जीसु लगे एउन, चिचियाउन बलुक मुरियाली, “ए परभु! दाउद चो बेटा, मोचो उपरे जीव दुख! मोचो बेटी के गोटोक देव-भूत धरलीसे।”
23 मानतर जीसु ओगाय होउन रलो। तेबे चेलामन हुनचो लगे एउन गुहारला, “एके जाउक देस, ए आमचो पाट-पाट चिचियाते एयसे।”
24 फेर हुन बललो, “इसराएल कुटुम चो मेंडामन असन हाजलो लोगमन के छांडुन मोके आउर कोचई लगे नी पठालासे।”
25 मानतर हुन बायले जीसु लगे एउन, पांय पड़ुन बलली, “ए परभु, मोके साका हो।”
26 जीसु हुनके बललो, “पिलामन चो रोटी कुकुरमन के देतोर नी बने।”
27 हुन बलली, “सते आय परभु, मानतर कुकुरमन बले आपलो मालिक चो घसरलो झूटा-आंटा ले जीयेसोत।”
28 एके सुनुन जीसु बललो, “तुचो बिसवास बड़े आय। तुय जसन मन करसीस, तुचो काजे उसनेची होओ।” आउर हुदलीदांय हुनचो बेटी उजरली।
जीसु चो अचरित बुतामन
29 जीसु पाछे हुताले जाउन गलील परघन चो समूंद कटा ईलो, आउर गोटोक डोंगरी खंडे चेगुन बसलो।
30 गोहड़ा-गोहड़ा लोगमन, काना-कोंदा के, कोला-माटेयामन के आउर खुबे बेमार-दुख ने पड़लो लोगमन के जीसु लगे आनला, ए सपाय लोगमन के जीसु उजरालो।
31 जिदलदांय लोगमन दखला कि कोंदामन गोटेयायसोत, कोला-माटेयामन हिंडसोत आउर कानामन दखसोत, हुनमन भखियाउन गेला, आउर इसराएल चो महापरभु के जय-जय करला।
चार हजार ले आगर लोगमन के खुआयसे
32 जीसु आपलो चेलामन के हागदेउन बललो, “मोके ए भीड़ के दखुन जीव दुखेसे, एमन तीन दिन ले मोचो संगे आसोत आउर एमन चो लगे खातो काजे काईची नीआय। मय एमन के भूके पठाउक मन नी करें। असन नी होओ एमन बाटे-घाटे थाकुन मुछियाओत।”
33 तेबे चेलामन जीसु के बलला: ए छीड़ा जगा आय, कहां ले आमी इतलो लोगमन के पेट भर खुआउक सकुआंव?
34 फेर जीसु हुनमन के पूछलो तुमचो लगे कितरो रोटीमन आसे? चेलामन बलला: सातठन रोटी आउर खिंडिक असन नानी मछरीमन आसे।
35 तेबे जीसु लोगमन के भुंये बसतो काजे हुकुम दिलो।
36 आउर रोटी-मछरीमन के धरुन जुहार करलो आउर गोंदा करुन-करुन चेलामन के देते गेलो आउर चेलामन, लोगमन के देते गेला।
37 सपाय लोग पेट भर खादला। खादलो पाछे चेलामन लगे सात फाडरी गोंदामन उरली।
38 हुता खाउ लोगमन ने बायले-पिला के छांडुन मनुकमन चार हजार रला।
39 फेर जीसु भीड़ के जाउक दिलो, पाछे डोंगा ने चेगुन मगदन नाव चो परघन संद ने ईलो।