चीना मांगतोर
16
तेबे फरीसी आउर सदूकिमन जीसु लगे एउन हुनके परखतो काजे बलला, “आमके बादरी चो काई चीना दखाव।”
2 जीसु हुनमन के बललो, “तुमी सांज बेरा चो लाल बादरी के दखुन बलुआहास, ‘आजी बादरी उगाड़ु रयदे’,
3 आउर बियान पाहार चो लाल-धोंवसया बादरी के दखुन बलुआहास, ‘आजी लेहरा-धुका एयदे।’ तुमी बादरी चो चीनामन के दखुन सांगुक सकुआहास, फेर समया चो चीनामन के दखुन कसन नी सांगुक सकास?
4 ए जुग चो अडरा आउर बेबिचारी (दुसर बाटे मन लगातो बुलन) लोग चीना डगराउआत, मानतर अगमजानी जोना चो चीना के छांडुन आउर काई चीना देउक नी होए।” तेबे जीसु हुनमन चो लग ले गेलो।
फरीसीमन आउर सदूकिमन चो पाग
5 चेलामन समूंद चो हुन पाट जातो बेरा रोटी नेउक भूलकला।
6 जीसु हुनमन के बललो, “दखा, फरीसीमन आउर सदूकिमन चो पाग ले बाचुन राहा।”
7 एके सुनुन चेलामन रोटी नी आनलु बलुन आपलाहान ने बिचार करुक मुरियाला।
8 जीसु हुनमन चो बिचार के जानुन बललो, “ए इजिक पतेयातो लोगमन, रोटी नीआय बलुन काय काजे बिचारसाहास?
9 काय तुमी एबले नी समजास? हुन पांच हजार लोगमन आउर पांच रोटीमन के तुमके सूरता नीआय, आउर हुदलदांय कितरो फाडरी रोटी गोंदामन उरु रये?
10 आउर काय तुमके चार हजार लोगमन आउर सात रोटी के सूरता नीआय? हुदलदांय कितरो फाडरी रोटी उरु रये?
11 तुमी कसन नी समजास, मय तुमके रोटी आउर पाग चो बारे ने नाई, मानतर फरीसीमन आउर सदूकिमन चो पाग ले चेत करुन रतो काजे बलेंसे।”
12 तेबे हुनमन समजला, जीसु रोटी आउर पाग के नाई, मानतर फरीसीमन आउर सदूकिमन चो सिखानीमन ले चेत करुन रतो काजे बललोसे।
पतरस, जीसु के किरिस्त आय बलतोर
13 जिदलदांय जीसु, कयसरिया फिलिपी चो सहरमन ने ईलो, आपलो चेलामन के पूछलो: “लोगमन मय मनुक चो बेटा के, काय बलसोत?”
14 चेलामन बलला, कोनी बपतिस्मा देतो बीता जूहन्ना बलसोत, कोनी-कोनी एलिया बलसोत आउर कोनी तुके अगमजानी जरमिया नोहले कोनी गोटोक अगमजानी आय बलसोत।
15 जीसु हुनमन के पूछलो: “मानतर तुमी मोके कोन आय बलेसाहास?”
16 समोन पतरस बललो: “तुय जीवत महापरभु चो बेटा किरिस्त आस”।
17 एके सुनुन जीसु बललो, “ए समोन, जोना चो बेटा, तुय धन-धन आस। मास आउर लोउ बाटले नाई, मानतर मोचो बुआ जोन सरग ने आसे, ए गोट चो समज तुके दिलोसे।
18 मय बले तुके बलेंसे, तुय पतरस आस, आउर मय ए सिलपट ने मोचो मंडली बनायंदे, आउर पतालपुर चो कोनी सकत हुनके जीतुक नी सके।
19 मय तुके सरग राज चो कुचीमन देयंदे, आउर जोन तुय मंजपुर ने बांदसे, हुन सरग ने बांदी होयदे, आउर जोन बले तुय मंजपुर ने ढीलसे, हुन सरग ने ढीली होयदे।”
20 तेबे जीसु चेलामन के चेतानी देउन बललो: “मोके किरिस्त आय बलुन कोकई नी सांगा”।
आपलो मोरना चो बारे ने जीसु चो अगमगोट
21 जीसु हुदलदांय ले आपलो चेलामन के समजाउक मुरियालो, मोके जरूसलेम ने जातोर ची आय आउर धरम-सियानमन, पुजारीमन चो मुखियामन, आउर धरम-पंडितमन चो हाथ ले खुबे डंड पायंदे आउर हुनमन मोके मोरते मारदे, मानतर मय तीसर दिने जीव उठेंदे।
22 एके सुनुन पतरस, जीसु के अलगे नेउन चिड़चिड़ाय होउन बललो, “ए परभु, महापरभु तुके केबई असन नी करो।”
23 तेबे जीसु उलटुन पतरस के बललो: ए सयतान मोचो लग ले जा, तुय मोचो धोका चो किरता आस। तुय महापरभु चो गोट के नाई, मानतर मनुकमन चो गोट ने मन लगाउआस।
24 तेबे जीसु आपलो चेलामन के बललो: कोनी मोचो संगे एउक मन करेसे जाले, हुन आपलो मन-इछा के छांडुन आपलो कुरूस के बोउन मोचो संगे एओ।
25 जोन कोनी आपलो जीव के बचाउक मन करेसे हुन आपलो जीव के हजायदे, आउर जोन कोनी मोचो काजे आपलो जीव के हजायदे, हुन आपलो जीव के बचायदे।
26 कोनी मनुक सपाय संवसार के पाउन बले आपलो जीव के हजालोने हुनके काय नफा होयदे? मनुक आपलो जीव चो पलटा काय देउक सके?
27 मय मनुक चो बेटा, सरगदूतमन संगे आपलो बुआ चो मयमा ने एयंदे, हुदलदांय सपाय लोगमन के आपलो बुता चो असन फर देयंदे।
28 मय तुमके सते बलेंसे, जोन लोग एता उबा आसोत, हुनमन ले कोनी-कोनी असन आसोत जोन मय मनुक चो बेटा के, आपलो राज ने एतोके नी दखोतले मोरना चो सुवाद के नी चाकोत।