पुरखा-पाटी चो सिखिया
7
तेबे फरीसीमन आउर धरम-पंडितमन जोनमन जरूसलेम ले एउ रओत, जीसु लगे रूंडला।
2 आउर हुनमन, जीसु चो चेलामन ले कोके-कोके हाथ नी धोअलोर भात खातो के दखला।
पुरखा-पाटी चो नीतीमन के मानसोत (7:2)
3 कसनबलले फरीसीमन आउर सपाय जहूदीमन पुरखा-पाटी चो रीतीमन के मानते एयसोत कि जिदलदांय ले हुनमन नंगत ले हाथ नी धोओत, हुदलदांय ले नी खाओत।
4 आउर फरीसीमन हाट-हड़री ले एउन, जिदलदांय ले हुनमन नी नहादे, हुदलदांय ले नी खादे; असन आउर खुबे धरम चो नीती नियममन आसे, जसन बटकीमन, कसलामन आउर कांस चो थारीमन के मांजतोर-घसतोर।
5 एईकाजे हुन फरीसीमन आउर धरम-पंडितमन जीसु के पूछला, “कसन तुचो चेलामन पुरखा-पाटी चो रीतीमन ने नी चलोत, आउर हाथ नी धोअलोर भात खायसोत?”
6 जीसु हुनमन के बललो, “जसाया चो अगमगोट ने तुमी कपटीमन चो बारे ने सते लिखलोसे:
‘ए लोगमन टोंड ले मोके मानसोत,
मानतर हुनमन चो मन मोचो बाटे नीआय।
7 आउर एमन फोकाहा काजे मोचो सेवा करसोत
कसनबलले हुनमन, मनुकमन चो नीती के सिखिया बनाउन सिखायसोत।’†
8 तुमी महापरभु चो हुकुम के छांडुन मनुकमन चो नीतीमन के मानसास।”
9 जीसु बललो, “तुमी तुमचो नीतीमन के मानतो काजे महापरभु चो हुकुम के सोजे छांडुन देयसास!
10 कसनबलले मोसा बललोसे, ‘आपलो माय-बाप के इजित करा,’ आउर ‘जोन माय-बाप के सरापदे हुनके मोरते मारतोर आय।’†
11 मानतर तुमीमन ले, कोनी आपलो माय-बाप के, ‘जितरो बले तुमके मोचो ले मिरतोर रये, हुन सपाय के महापरभु के दान करुन दिले’ बललो जाले,
12 तुमी हुनचो गोट के मानुन हुनचो माय-बाप चो काई सेवा करतो ले अटकायसास।
13 आउर असनी तुमी, मनुक चो बनालो नीती के बचातो काजे, महापरभु चो बचन के नी मानसास आउर तुमी असनी खुबे दुसर काम बले करसास।”
मनुक के असुद बनातो तीजमन
14 जीसु लोगमन के आपलो लगे हागदेउन बललो, “तुमी सपाय मोचो गोट के नंगत ले सुना, आउर समजा।
15 असन काई तीज नीआय जोन बाहर ले भीतरे जाउन मनुक के असुद करो, मानतर जोन तीज मनुक चो भीतर ले बाहरे निकरुआय हुनी, मनुक के असुद करुआय।
16 जेके कान आसे हुन नंगत ले सुना।”
17 आउर जिदलदांय जीसु, भीड़ ले घरे गेलो, तेबे हुनचो चेलामन ए कटाव चो बारे ने हुनके पूछला।
18 जीसु चेलामन के पूछलो, “काय, तुमी बले नी समजास? काय, तुमी नी समजास कि जोन तीज मनुक चो टोंड ले भीतरे जायसे, हुन मनुक के असुद नी करुक सके?
19 कसनबलले खातो बिती, मनुक चो मन ने नाई, मानतर पेट ने जाउआय आउर भाटा गेलोने निसकुन जाउआय।” असन बलुन जीसु सपाय खातो तीजमन के सुद मानलो।
20 फेर जीसु बललो, “जोन मनुक चो मन ले निकरेसे हुनी, मनुक के असुद करेसे।
21 कसनबलले भीतर ले बललोने मनुक चो मन ले अडरा बिचार, बेबिचार, दुसर चो बायले थाने जातोर,
22 चोरतोर, माने-मारतोर, लालच करतोर, अडरा चलनी-बुलनी, धोका देतोर, कुचर, ईरका, होस-नंजरेया, निंदरतोर, गुमान आउर मूरक गोटमन निकरुआय।
23 ए सपाय अडरा गोटमन, मनुक भीतर ले ची निकरुआय आउर मनुक के असुद करुआय।”
गोटोक बायले चो बिसवास
24 आउर जीसु हुताले उठुन सूर आउर सयदा राजमन ने ईलो; आउर गोटोक घरे गेलो आउर मन करलो कि कोनी नी जानोत। मानतर हुन लुकुक नी सकलो।
25 तूरते गोटोक बायले, जेचो नानी बेटी के देव-भूत धरु रली, जीसु ईलो गोट के सुनुन हुनचो लगे जाउन पांय पड़ली।
26 आउर हुन जूनानी जात चो सुरुफिनीन बायले, जीसु के बिनाली, “मोचो बेटी थान ले देव-भूत के निकराउन देस।”
27 जीसु हुन बायले के बललो, “आगे पिला-झीलामन के पेट भर खाउक देस, कसनबलले पिला-झीलामन चो भात के, कुकुरमन के खुआतोर नंगत नोआय।”
28 मानतर हुन जीसु के बलली, “सते आय परभु, तेबले बले कुकुरमन, पिलामन चो घसरलो भात सकड़ीमन के खाउआत।”
29 जीसु हुनके बललो, “एई नंगत गोट काजे तुय जा, तुचो बेटी ले देव-भूत निकरुन गेली।”
30 आउर हुन बायले आपलो घरे एउन दखली कि हुनचो बेटी खटेया ने सोउन रली, आउर देव-भूत हुनचो थान ले निकरुन जाउन रये।
जीसु गोटोक मूका-भयरा के उजरायसे
31 फेर जीसु, सूर आउर सयदा चो राज ले निकरुन दिकापुलीस राज ले होते-होते गलील चो समूंद लगे अमरलो।
32 आउर लोगमन गोटोक भयरा के जोन तोतरते रये, जीसु लगे आनुन हुनके गुहारला कि हुनके छिंउन उजराउन देस।
33 तेबे जीसु भीड़ ले भयरा के अलगे नीलो, आउर आपलो अंडकीमन के हुनचो कानमन ने ओलालो, आउर थूकून भाति हुनचो जीब के छिंवलो,
34 आउर सरग बाटे दखुन लाम निनास धरलो, आउर हुनके बललो, “इफ्तह”, बललोने, “उगड़ुन जा।”
35 आउर हुनचो कान उगड़ुन गेली, आउर हुनचो जीब चो गठ ढीली होली आउर हुन सरसरा गोटेयाउक मुरियालो।
36 तेबे जीसु लोगमन के हुकुम दिलो कि कोकई नी सांगा: मानतर जीसु हुनमन के जितरो दागा दिलो, उतरोई हुनमन आउर सांगुक मुरियाला।
37 आउर सुनलो लोगमन खुबे भक्याउन बलुक मुरियाला: “हुन काई बले करलो, नंगत चे करलो, हुन भयरामन के सुनतो काजे, आउर मूकामन के गोटेयातो सकत देयसे।”