जीसु आउर जूहन्ना बपतिस्मा देतो बीता
11
जीसु आपलो बारा चेलामन के हुकुम देउन भाति, गलील परघन चो सहरमन ने सिखिया आउर बचन सांगतो काजे हुताले गेलो।
2 जूहन्ना बपतिस्मा देतो बीता जयल घरे रलो बेरा, किरिस्त चो करलो बुतामन के सुनुन आपलो चेलामन के ए पूछुक पठालो,
3 “काय एउ बीता तुय ची आस, नोहले काय, आमी दुसर चो बाट दखुआंव?”
4 जीसु हुनमन के बललो, “जोन बले तुमी सुनसाहास, आउर दखसाहास सबु के जूहन्ना के जाउन सांगा,
5 कानामन दखसोत आउर खोड़ेया-माटेयामन हिंडसोत, कोढ़ बेमार बीतामन के उजरायसोत आउर भयरामन सुनेसोत, मोरलोमन के जियायसोत, आउर गरीब-दुखीमन के नंगत खबर सुनायसोत।
6 धन-धन आय हुन, जोन मोचो किरता धोका नी खाये।”
7 जिदलदांय जूहन्ना चो चेलामन हुताले गेला, तेबे जीसु जूहन्ना चो बारे ने लोगमन के बललो, “तुमी राने काय दखुक जाउ रलास? काय, लेहरा ले हलतो गुगुनड़ामन के?
8 फेर तुमी काय दखुक जाउ रलास? काय, कोसा पोतिया पींदलो मनुक के? दखा, जोन कोसा पोतिया पींदेसोत, हुनमन राज माहालमन ने रउआत।
9 फेर तुमी काय काजे जाउ रलास? काय, कोनी अगमजानी के दखुक जाउ रलास? हव, मय तुमके बलेंसे अगमजानी ले बले बड़े के।
10 ए हुनी आय जेचो बारे ने धरमसास्तर ने लिखलोर आसे:
‘दख, मय आपलो दूत के तुचो पुरे पठायंसे,
जोन तुचो काजे बाट तियार करेदे’।†
11 मय तुमके सते सांगेंसे, जोन बायलेमन ले जनमलासे, हुनमन ले कोनी बले जूहन्ना बपतिस्मा देतो बीता ले बड़े नोआत; मानतर जोन सरग राज ने नानी ले नानी आय हुन जूहन्ना ले बड़े आय।
12 जूहन्ना बपतिस्मा देतो बीता चो समया ले धरुन एदांय ले बलबीतामन आपलो बल-सकत ले सरग राज ने ओलतो काजे होते रओत, आउर हुनमन झीका-उड़मा करते रओत।
13 सपाय अगमजानीमन आउर नियम-कानुनमन, जूहन्ना अमरतले अगमगोट सांगते रला।
14 तुमी पतेयाउआहास जाले, एलिया जोन एतो बीता रये, ए हुनी आय।
15 जेके सुनतो काजे मन आसे, हुनी सुना।
16 मय ए जुग चो लोगमन के कोचो ले कटारेंदे? एमन हाटे बसुन हागदिया-देई होतो पिलामन असन आत,
17 ‘आमी तुमचो काजे बांवसी फूकलु,
आउर तुमी नी नाचलास;
आमी खिसियालु,
आउर तुमी छाती नी पेटलास।’
18 कसनबलले जूहन्ना खातो-पीवतो के छांडुन जुगे दिनमन ने उपास करते रये, आउर तुमी ‘हुनचोने भूत आत्मा आसे’ बलेसाहास।
19 मनुक चो बेटा खाते-पीवते ईलो; तुमी हुनके, ‘ढोर मतवार मनुक आउर पट्टी धरतो बीतामन आउर पापीमन चो संगवारी’ बलसास। मानतर गियान आपलो बुतामन ले सते बनली।”
लोग, मन नी बोहड़ातो के जीसु चो खिसियातोर
20 तेबे जीसु हुन सहरमन के घिनियालो, जोन थाने हुन बड़े सकत बुतामन के करु रये, मानतर हुनमन आपलो मन नी बोहड़ाला।
21 तेबे जीसु बललो, “हाय, खुराजीन! हाय, बेतसयदा! जोन सकत बुतामन तुचोने करलासे, हुन सूर आउर सयदा सहरमन ने करुन रले, हुता चो लोग टाट ओड़ुन, आउर लाकड़ी ने बसुन केबले मन बोहड़ाउ रता।
22 मानतर मय तुमके बलेंसे, नियाव चो दिने सूर आउर सयदा चो गती तुमचो ले आगर कटलातो लाईक होयदे।
23 ए कफरनहूम, तुके सरग ने मान मिरेदे बलसीस? तुय तो पतालपुर ने जासे! जोन सकत बुतामन तुचोने करलोर आसे, सदोम सहर ने करु रता जाले, हुन आजी ले रती आउर नास नी होती।
24 मानतर मय तुके बलेंसे, नियाव चो दिने सदोम देस चो गती, तुमचो ले आगर कटलातो लाईक होयदे।”
बोजा ले चेपालो लोगमन के सुस्ती
25 जीसु हुदलीदांय बललो, “ए बुआ, सरग आउर मंजपुर चो परभु, मय तुमके जुहार करेंसे, तुय ए गोटमन के गियानी आउर समज बीतामन ले लुकाउन रलीस, आउर लेकामन के दखालीस।
26 हव, ए बुआ, कसनबलले तुके एई नंगत लागली।
27 मोचो बुआ मोके जमाय के सोपुन दिलोसे; बुआ के छांडुन कोनी बेटा के नी जाने; आउर बेटा के छांडुन कोनी बुआ के नी जाने आउर हुन जेके बेटा दखाउक मन करेसे।