कुरिंथी चो मंडली
काजे पठालो-बीता पउलुस चो दुसर चिटी
जुहार
1
महापरभु चो मन ले जीसु किरिस्त चो पठालो-बीता पउलुस आउर आमचो भाई तीमुथियुस बाटले, महापरभु चो मंडली, जोन कुरिंथुस सहर ने आसे, आउर अखाया परघन चो सपाय पवितर लोग चो नाव ने चिटी:
2 आमचो बुआ महापरभु आउर परभु जीसु किरिस्त बाटले तुमके दया आउर अस्तिर मिरते रओ।
पउलुस, महापरभु के धन-धन करेसे
3 आमचो परभु जीसु किरिस्त चो महापरभु आउर बुआ चो धन-धन होओ, जोन दया चो उबजास आउर अमदेया अस्तिर पावतो काजे उकसाउ महापरभु आय।
4 महापरभु आमके सपाय तकलीस बेरा अस्तिर करेसे; आमके महापरभु दिलो अस्तिर ले, जोन बले काई बरन चो तकलीस ने आसोत, हुनमन के आमी बले असने अस्तिर पावतो काजे उकसाउक सकुं।
5 कसनबलले जसन आमी किरिस्त चो तकलीस ने जुगे करुन संगी होउंसे, उसनेचे किरिस्त बाटले अस्तिर ने बले जुगे करुन आमी संगी होउंसे।
6 आमी तकलीस पाउंसे जाले, हुन तकलीस तुमचो अस्तिर आउर मुक्ति काजे आय, आमी अस्तिर पाउंसे जाले, हुन बले तुमचो अस्तिर काजे आय, जेचोले तुमी तकलीस के धीरजा ले कटलाउक सकसाहास, जेके आमी बले कटलाउंसे,
7 कसनबलले आमी जानुसे कि तुमी जसन आमचो तकलीस ने तकलीस पायसास, उसनेची आमचो अस्तिर ने बले संगी होयसास, एईकाजे आमचो आसा तुमचो काजे चमकट आसे।
8 ए भाईमन, आमी मन करुंसे कि तुमी हुन दुख-डंड समया चो बारे ने जाना, जोन तकलीस आमी आसिया ने पावलु, आमी कटलातो सकत ले आगर तकलीस ने पड़ुन रलु कि आमके मरुंदे बे असन लागते रये।
9 आमचो मन ने असन लागते रये कि आमचो काजे मोरना चो हुकुम मिरलीसे, एईकाजे आमी आपलो उपरे नाई मानतर महापरभु उपरे भोरसा करु, जोन मोरलो लोग के जियाउआय।
10 हुनी आमके मोरना चो बड़े गराहां ले बचालो, आउर एबे बले बचायसे। हुनचो उपरे आमके आसा आसे कि हुन आमके एतो दिनमन ने बले बचायदे।
11 तुमी बले मिसुन पारथना बाटले आमचो साहरा होआसे कि खुबे लोगमन चो पारथना बाटले जोन बर आमके मिरली, हुनचो किरता खुबे लोग आमचो बाटले महापरभु के धन-धन करोत।
पउलुस चो जातो उआट पलटतोर
12 कसनबलले आमके आपलो बुद चो गवई ने गुमान आसे कि आमी ए संवसार ने आउर जुगे करुन तुमीमन लगे आमचो चलनी-बुलनी महापरभु चो लाईक पवितर आउर सत चो रये, जोन संवसारी गियान ले नाई मानतर महापरभु चो दया ले रये।
13 आमी तुमके हुतलेई ची लिखलुसे, जेके तुमी पढ़ुक आउर समजुक बले सकास; तुमी आमके नंगत ले नी समजलासाहास, मानतर मोके आसा आसे कि सरासरी ले समजते राहासे,
14 जसन तुमीमन ले कितरो लोग आमचो किरता गुमान करसास, उसनेची आमी बले परभु जीसु चो ईलो दिने तुमचो किरता गुमान करुंदे,
15 एई भोरसा ले मय आगे तुमचो लगे एतो पक्का बिचार करु रयें कि तुमके फेर नफा होओ।
16 मोचो एई बिचार रये कि पईल तुमचो लगे एउन मकिदुनिया ने जायंदे, आउर फेर मकिदुनिया ले तुमचो लगे एयंदे: आउर तुमी मोके जहूदिया बाटे खिंडिक दूर अमराउन दियासे।
17 काय, मय हर-बर ने बिचार करले? नोहले काय, मय हुन संवसारिक मनुक असन आंय, जोन काई गोट ने ‘हव-हव’ बलेदे, मानतर हुनचो अरथ ‘नाई-नाई’ आय?
18 महापरभु सत गवई आय कि आमी तुमके सांगलो बचन ने ‘हव’ आउर ‘नाई’ गोटकी संगे होउक चे नी सके। ‘हव’ आय जाले, ‘हव’ ची आय आउर ‘नाई’ जाले, ‘नाई’ ची आय।
19 कसनबलले तुमचो मंजिगता महापरभु चो बेटा जीसु किरिस्त चो खबर के, मय, सिलवानुस आउर तीमुथियुस सुनालु, हुन थाने ‘हव’ आउर ‘नाई’ नी रये; मानतर ‘हव’ ची ‘हव’ रये।
20 कसनबलले महापरभु चो सबु बायदा किरिस्त ने ‘हव’ संगे आसे। एईकाजे हुनचो बाटले आमी आमीन बलुंसे कि आमचो बाटले महापरभु चो मयमा होओ।
21 आउर जोन आमके आउर तुमके किरिस्त ने चमकट करलोसे आउर आमके अबिसेक करलोसे, हुन महापरभु आय।
22 हुन आमके चीना लगालोसे आउर बयाना हिसाब ने पवितर आत्मा दिलोसे।
23 मय तुमके बचातो काजे ची कुरिंथुस ने एबले नी ईले आउर एचो गवा महापरभु आसे।
24 एचो अरथ ए नोआय कि आमी तुमचो बिसवास उपरे हक संगाउक मन करुंसे; मानतर आमी तुमचो हरिक काजे तुमचो संग देउंसे, कसनबलले बिसवास ने तुमी चमकट आसास।