2
एईकाजे मय मन ने असन बिचार करले कि फेर तुमके मुरमुरा करुक नी एयें।
2 कसनबलले मय तुमके मुरमुरा करले जाले, मोके कोन हरिक करदे? हुनीमन चे करदे जोनमन के मय मुरमुरा करले।
3 ए गोट के मय तुमके एईकाजे लिखलेसे, मोचो ईलोने, जोन लोग ले मोके हरिक होतोर रली, हुनमन ले मय मुरुसनाय होउक नी होओ। कसनबलले मोके तुमी सपाय ले ए गोट चो भोरसा आसे कि जोन मोचो हरिक आय, हुन तुमी सबु चो बले हरिक आय।
4 खुबे तकलीस आउर मन चो दुख-डंड ले मय खुबे गागुन-गागुन तुमके लिखले, एईकाजे तुमी मुरमुरा नी होआ, मानतर मय तुमके कितरो मया करेंसे, ए गोट के तुमी जाना।
पापी के खेमा
5 कोनी मोके मुरमुरा करलोसे जाले, हुन मोके चे नोआय, मानतर तुमी सपाय के बले मुरमुरा करलोसे।
6 हुनचो काजे ए डंड खुबे आय, जोन मंडली-भाईमन बाटले होयसे।
7 एईकाजे एचोले नंगत ए आय कि तुमी हुनचो पाप के खेमा करा, आउर हुनके अस्तिर करा कि हुन मनुक खुबे मुरमुरा होउन एकलाय नी पड़ो।
8 एईकाजे मय तुमके गुहार करेंसे कि हुनके आपलो मया चो चीना दखाहा।
9 तुमी मोचो सपाय गोटमन के मानतो काजे तियार आसास कि नाई बलुन परखुन जानतो काजे, मय तुमके लिखु रले,
10 जेके तुमी खेमा करसास, हुनके मय बले खेमा करेंसे। कसनबलले जोन बले मय खेमा करले, हुन तुमचो किरता किरिस्त दिलो हक ले खेमा करले।
11 एईकाजे कि सयतान चो चाल आमचो उपरे नी चलो, कसनबलले आमी हुनचो घतमन के जानलुसे।
तरोआस ने पउलुस चो बाय-बिकाल होतोर
12 जेबे मय किरिस्त चो नंगत खबर सुनातो काजे तरोआस ईले, हुदलदांय परभु मोके किरिस्त चो नंगत खबर सुनातो आउर गोटोक पक्का मोहका दिलो,
13 मानतर मोचो भाई तीतुस के नी दखलोके मोचो मन बाय-बिकाल होली, एईकाजे मय हुनमन ले बिदा मांगुन मकिदुनिया गेले।
किरिस्त ने जीत चो तिहार
14 मानतर महापरभु चो धन-धन होओ, जोन किरिस्त ने अमदेया आमके जीतायसे आउर हुनचो गियान के नंगत बास असन आमचो ले सपाय बाटे बिगरायसे।
15 कसनबलले मुक्ति पावतो लोगमन आउर नास होतो लोगमन, दुनो काजे आमी, महापरभु लगे किरिस्त चो नंगत बास आंव।
16 कितरो लोगमन काजे आमी मोरना चो अडरा बास आंव, आउर कितरो लोगमन काजे आमी जीवना चो नंगत बास आंव। एचो लाईक कोन आसे?
17 कसनबलले आमी हुन खुबे लोगमन असन नोआंव, जोन महापरभु चो बचन ने आपलो नफा काजे मिला-मिसा करुआत, मानतर आमी महापरभु चो पुरे किरिस्त ने सत मन ले महापरभु चो पठालो-लोग असन बलुआंव।