नवा बायदा चो सेवा करतो लोग
3
काय, फेर आमी आपलो बड़ाई करुंसे? नोहले आमी आउर लोग असन तुमचो लगे चिटी संगे एउआंव नोहले तुमचो ले चिटी धरुआंव?
2 आमचो चिटी तो तुमी ची आहास, जोन आमचो मन ने लिखलोर आसे, आउर हुनके सपाय लोग चिताउआत आउर पढ़ुआत।
3 ए दखायसे कि तुमी किरिस्त चो चिटी असन आहास, जोन आमचो सेवा चो फर असन आसे, जेके सियाई ले नाई मानतर जीवता महापरभु चो आत्मा ले, पकना चो पटी ने नाई, मानतर मन चो गुलगुला असन पटी ने लिखलोर आसे।
4 एईकाजे आमी किरिस्त बाटले महापरभु उपरे असनी भोरसा करुंसे।
5 असन नोआय कि आमी आपलो बाटले काई गोट चो बिचार करुक सकतो लाईक आसुं, मानतर आमी लाईक होतोर महापरभु बाटले आय।
6 महापरभु आमके नवा बायदा चो सेवक होतो लाईक बनालो, ए काई लिखलो नियम हिसाब ले नाई, मानतर पवितर आत्मा ले आय, कसनबलले लिखलो नियम मोरायसे, मानतर पवितर आत्मा जियायसे।
7 जेबे पकनामन ने लिखलो मोरना चो बायदा चो सेवा ले मोसा चो थमना इतलो उजर रली कि ए घटतो उजर होले बले इसराएलिमन, हुन उजर किरता हुनके दखुक नी सकला,
8 तेबे आत्मा चो बायदा चो सेवा कितरो जुगे उजर चो होयदे?
9 जेबे पापी आय बलतो बायदा चो सेवा इतलो उजर चो रली, तेबे धरमकारी आय बलतो बायदा चो सेवा आउर बले जुगे उजर चो कसन नी होयदे?
10 कसनबलले जुना बायदा, आगे खुबे उजर दखा देते रये। एदांय हुनचो ले खुबे आगर उजर चो नवा बायदा ईली, तेबे हुनचो पुरे जुना बायदा, उजर नोहलोर होली।
11 जेबे लिबतो उजर खुबे आय, तेबे जुग-जुग रतो उजर आउर कितरो आगर होयदे?
12 एईकाजे असन आसा करुन आमी ढाढ़ुस ले बलुंसे,
13 लिबतो उजर चो सरासरी के इसराएलिमन नी दखोत बलुन मोसा आपलो थमना के ढाकी होलो असन नोआय,
14 मानतर हुनमन एड़जा होलो किरता एबे बले जुना बायदा पढ़तो बेरा हुनी मोसा के ढाकी होलो पड़दा, इसराएलिमन चो मन ने बले ढाकी होयसे कि हुनमन समजुक नी सकोत। मानतर किरिस्त ने ची हुन पड़दा गुचेसे।
15 एबे बले मोसा चो किताप के पढ़तो बेरा हुनमन चो बुद ने पड़दा ढाकी होउ रउआय।
16 मानतर जेबे बले हुनमन चो मन परभु बाटे बोहड़ेदे, तेबे हुन पड़दा गुचेदे।
17 परभु तो आत्मा आय, आउर जोन थाने परभु चो आत्मा आसे, हुता छुट आसे।
18 मानतर जेबे आमी सपाय चो उगाड़ा थमना ने परभु चो उजर, जसन दरपन ने दखा देउआय उसने दखा देयसे, तेबे आमी सपाय, परभु, जोन आत्मा आय हुनचो बाटले उजर ले जुगे उजर पाउन हुनी घटन ने खिंडिक-खिंडिक पलटते जाउंसे।