माटी चो हांडीमन ने धन
4
आमके महापरभु चो दया ले असन सेवा मिरलीसे, एईकाजे आमी ढाढ़ुस नी छांडु।
2 आमी खुसनाय करतो लाज चो बुतामन के छांडलु, आउर मन-गरबी बले नी करुं आउर महापरभु चो बचन ने अगराहा नी जोड़ुं, मानतर महापरभु चो पुरे सत के दखाउन आपलो भलई सपाय मनुक चो बुद* ने भरुंसे।
3 आमी सुनातो नंगत खबर ने पड़दा ढाकी होलीसे जाले, नास होतो लोग काजे ची ढाकी होलीसे।
4 ए संवसार चो मालिक, सयतान, नी पतेयातो लोग चो बुद* के गुपालोसे, एईकाजे कि हुनमन महापरभु चो घटन बललोने, किरिस्त चो नंगत खबर चो मयमा-उजर के दखुक नी सकोत।
5 कसनबलले आमी आपलो बारे ने नाई मानतर किरिस्त जीसु चो बारे ने सुनाउंसे कि हुन परभु आय आउर आपलो बारे ने बलुंसे, “आमी जीसु चो किरता तुमचो कमेया आंव”।
6 एईकाजे कि महापरभु बललो, “अंधार ले उजर बरो” आउर हुनचो उजर आमचो मन ने बरली कि महापरभु चो मयमा-उजर चो गियान जीसु किरिस्त चो थमना ले बरो।
7 मानतर ए गियान चो धन, आमचो देहें ने माटी चो हांडी ने संगालो असन संगालोसे कि ए खुबे गियान आमचो बाटले नाई, मानतर महापरभु चो सकत बाटले आय।
8 आमी चारो कुती ले तकलीस ने तो पड़ुंसे, मानतर मुरुसनाय नी होउं, काई करुक तो नी सकुं, मानतर फिकिर नी करुं।
9 तंगाउ तो आत, मानतर महापरभु आमके नी छांडे, घसराउ तो आत, मानतर नास नी होउ।
10 आमी जीसु चो मोरना के आपलो देहें ने अमदेया धरुन बुलते रहुंसे कि जीसु चो जीवना बले आमचो देहें ने दखा देओ।
11 कसनबलले जीसु चो किरता आमी जीवता-जीवता अमदेया मोरना चो हाथे सोपी होउंसे कि आमचो मोरतो देहें ने जीसु चो जीवना दखा देओ।
12 असन बरन ने आमी मोरना ले जुजुंसे, मानतर तुमी जुग-जुग चो जीवना पायसास।
13 जसन धरमसास्तर ने लिखलीसे, “मय पतेयाले, एईकाजे मय बलले।” तेबे आमी बले हुनी आत्मा ले सतपतेयाउंसे, एईकाजे सांगुसे।
14 कसनबलले आमी जानुंसे, महापरभु जोन परभु जीसु के जियालो, हुनी आमके बले जीसु चो संगी समजुन जियायदे, आउर तुमचो संगे आपलो पुरे उबा करेदे।
15 ए सपाय तुमचेई काजे आय; कसनबलले जसन खुबे लोगमन के महापरभु चो दया मिरले, खुबे लोगमन धन-धन करदे आउर एचोले महापरभु चो मयमा होयदे।
16 एईकाजे आमी ढाढ़ुस नी छांडु; आमचो संवसारिक चोला (मनुक गुन) नसते गेले बले, आमचो आत्मा रोजे-दिना नवा होते जायसे।
17 कसनबलले डंडिक काजे चो आमचो खिंडिक तकलीस, आमचो काजे खुबे खास आउर जुग-जुग चो मयमा पावतो काजे तियार करेसे।
18 आउर आमी दखा देतो तीजमन के नाई, मानतर नी दखा देतो तीजमन चो बाट दखते रहुंसे, कसनबलले दखलो तीजमन खिंडिक दिन काजे आय, मानतर नी दखलो तीजमन जुग-जुग काजे आय।