आमचो सरग चो घर
5
कसनबलले आमी जानुंसे, जिदलदांय आमचो संवसारिक डेरा असन चोला नास होयदे, तेबे आमके महापरभु बाटले सरग ने गोटोक घर मिरेदे, जोन मनुक चो बनालोर नोआय, मानतर जुग-जुग काजे आय।
2 ए संवसारिक चोला ने आमी खुबे दुख-डंड पाउंसे आउर आमी खुबे मन करुंसे कि सरग चो चोला के पीदुं।
3 सरग चो चोला के पींदलु जाले, आमी नांगड़ा नी रउं।
4 आमी ए संवसारी चोला पींदुन खुबे डंड-कसट चो बोजा ने चेपाय होउन कहरुंसे, तेबले बले ए चोला के छांडुक मन नी करु, मानतर आमी ए मन करुंसे कि मोरतो चोला चो पलटा, जुग-जुग जीव रतो चोला मिरो।
5 महापरभु ची आय, जोन आमके एचई लाईक बनालोसे आउर बयाना ने आमके पवितर आत्मा बले दिलोसे।
6 एईकाजे आमी अमदेया ढाढ़ुस करुंसे, आउर ए जानुंसे कि जिदलदांय ले आमी संवसारिक चोला ने आसुं, हुदलदांय ले परभु ले अदरे आसुं।
7 कसनबलले आमी रंग-रूप के दखुन नाई, मानतर बिसवास ले चलुंसे।
8 आमी ढाढ़ुस करुंसे आउर संवसारिक देहें ले अदरे होउन परभु संगे रतोर खुबे नंगत समजुंसे।
9 एईकाजे आमी देहें संगे रउं नोहले अदरे रउं, आमचो गोटकी इछा आय कि आमी परभु के हरिक करते रउं।
10 कसनबलले आमी सपाय, किरिस्त चो नियाव गादी चो पुरे जरुर दखा देवां, आउर सपाय लोगमन के आपलो-आपलो संवसारिक देहें ले करलो नंगत नोहले अडरा बुता चो पलटा मिरेदे।
महापरभु संगे मिला-मिसा
11 कसनबलले परभु के डरुंसे गुने आमी लोगमन के समजाते रउंसे; मानतर महापरभु आमचो हाल के जाने, आउर मोके आसा आसे कि तुमी बले आपलो मन-चेतन ले जानासे।
12 आमी आपलो बड़ाई तुमचो पुरे फेर नी करुं, मानतर आमी तुमके गोटोक मोहका देउंसे कि तुमी आमचो उपरे गुमान करा। एईकाजे कि हुनमन के सांगुक सका, जोनमन मन ले नाई, मानतर मान पावतो काजे ढोंग गोट ने गुमान करुआत।
13 आमी चेत नोहलोर आसुं जाले, महापरभु काजे आय, आउर चेत ने आसुं जाले, तुमचो काजे आय।
14 कसनबलले किरिस्त चो मया आमके बेरपेला करेसे। एईकाजे आमी ए समजुआंव कि जेबे किरिस्त एकलाय सबु लोग काजे मोरलो, तेबे सपाय मोरला।
15 आउर हुन एई हिसाब ने, सपाय लोग काजे मोरलो कि जोनमन जीव आसोत, हुनमन एदांय आपलो काजे नी जीओत, मानतर हुनचो काजे जीओत, जोन हुनमन काजे मोरलो आउर फेर जीव उठलो।
किरिस्त ने नवा बनतोर
16 एईकाजे, एदांय ले आमी कोकई बले संवसारिक हिसाब ने नी समजु। आमी किरिस्त के संवसारिक हिसाब ने समजुन रलु, तेबले बले एदांय ले हुनके असन नी समजुंदे।
17 एईकाजे कोनी किरिस्त ने आसे जाले, हुन नवा बनलोर आय; आगे चो गोट मेटली; दखा, सपाय गोट नवा होलीसे।
18 ए सपाय गोटमन महापरभु बाटले होलीसे, जोन किरिस्त बाटले आमके आपलो संगे मिला-मिसा करालो आउर लोगमन के महापरभु संगे मिला-मिसा करातो सेवा आमके सोपलोसे।
19 बललोने महापरभु, संवसार चो लोगमन चो पापमन के दोख नी देउन, किरिस्त ने हुनमन के आपलो संगे मिला-मिसा करलो। आउर मिला-मिसा करतो चो नंगत खबर आमके सोपलोसे।