6
आमी महापरभु संगे बुता करतो लोग आंव गुने तुमके गुहारुंसे कि महापरभु चो दया तुमके मिरलीसे, हुनके फोकाहा जाउक नी दियास।
2 कसनबलले हुन बललोसे,
“पक्का समया ने मय तुचो सुनले
आउर मुक्ति चो दिने तुके साका होले”। †
दखा, एबे आय हुन नंगत बेरा; एबे ची आय हुन मुक्ति चो दिन।
पउलुस चो तकलीस
3 आमचो सेवा बुता दोस नोहलोर होओ कि आमचो ले कोनी धोका नी खाओत।
4 मानतर सपाय गोट ने महापरभु चो सेवकमन असन आपलो नंगत गुन के दखाते रहुंसे; दुख, तकलीस आउर गराहांमन के बड़े धीरजा ले सहुंसे।
5 कोड़ा चो मार ले, जयल जातो ले, झगड़ा-कोलार ले, मसागत ले, चेता रतो ले, भूक-पियास ले,
6 पवितर ले, गियान ले, धीरजा ले, दया करतो ले, पवितर आत्मा ले, सत मया ले,
7 सत बचन सुनातो ले, महापरभु चो सकत ले, धरम चो हतियार बललोने बचन के उजा हाथे आउर बिसवास चो आड़ के डेबरी हाथे धरुन,
8 मान पावतो ले आउर हिनस्ता होतो ले, बदी पावतो ले आउर नाव कमातो ले; आमके भरमातो लोग समजसोत, तेबले बले आमी सत लोग आंव।
9 आमी कोनी नी जानतो लोग असन आंव, तेबले बले आमी नाव कमालुसे; आमी मोरतो लोग असन आंव, मानतर दखा आमी जीव आसुं; मार खातो लोग आंव, मानतर एबले मोरते नी मारोत।
10 फिकिर करतो लोग असन आंव, मानतर अमदेया हरिक ने रउआंव; गरीब असन आंव, मानतर खुबे लोग के सवकार बनाउंसे; काई चे नोहलो असन आसुं, तेबले बले सपाय आसे।
मया करा-करी होवां
11 ए कुरिंथेयामन, आमी तुमके हलहला गोटेयालुसे। आमी तुमके खुबे मया करुंसे।
12 तुमचो काजे आमचो मन ने काई दुक-पुछ नीआय, मानतर तुमचेई मन ने दुक-पुछ आसे।
13 आपलो पिलामन समजुन तुमके बलेंसे, तुमी बले आमके खुबे मया करा।
आगर-घाट ने फांदी नी होआ
14 नी पतेयातो लोगमन संगे तुमी आगर-घाट ने फांदी नी होआ, कसनबलले धरम आउर ओधरम चो काय मिला-मिसा? उजर आउर अंधार चो काय जोड़ी आय?
15 आउर किरिस्त चो सयतान संगे काय नाता? नोहले, महापरभु के पतेयातो बीता चो, नी पतेयातो बीता संगे काय नाता?
16 आउर महापरभु चो मंदिर ले मूरतमन चो काय नाता? कसनबलले आमी तो जीवत महापरभु चो मंदिर आंव। जसन महापरभु बललोसे,
“मय हुनमन चो मन ने रयंदे,
आउर हुनमन संगे हिंडा-बुला होयंदे;
आउर मय हुनमन चो महापरभु होयंदे
आउर हुनमन मोचो लोग होदे।”†
17 एईकाजे परभु बलेसे,
“हुनमन चो मंजार ले निकरुन अलगे राहा;
आउर असुद तीज के नी छिंया,
तेबे मय तुमके आपलो मानेंदे।”†
18 मय तुमचो बुआ होयंदे
आउर तुमी मोचो बेटा-बेटी होआसे,
सबुले सकत चो परभु महापरभु चो एई बचन आय।†