7
ए मोचो मीत लोग, जेबे आमके ए बायदामन मिरलीसे, तेबे इआ, आमी आपलो देहें चो आउर आत्मा चो सबु मईल के धोउन, महापरभु के डरुन पवितर ने संपुरन होउं।
पउलुस हरिक होतोर
2 आमके तुमचो मन ने धरा। आमी कोकई ओनियाव नी करलुसे, कोचई काई नी नसालुसे आउर कोकई नी ठगलुसे।
3 मय तुमके दोख देतो काजे नी बलेंसे, कसनबलले मय आगे ची सांगुन रयें कि आमी तुमके खुबे मया करुंसे, आमी तुमचो संगे मोरतो-जीवतो काजे तियार आसुं।
4 मय तुमके खुबे ढाढ़ुस ले बलेंसे, मोके तुमचो ले खुबे गुमान आसे; मय खुबे अस्तिर ने आंसे आउर आमचो सपाय दुख ने बले मय खुबे हरिक ने आंसे।
5 कसनबलले जेबे आमी मकिदुनिया ने ईलु, तेबे आमके बिसाउक नी मिरली, आमी चारो कुती ले तकलीस पावलु; बाहरे लड़ई होते रये आउर मन भीतरे डर रये।
6 तेबे बले सोज लोग के अस्तिर करु महापरभु, तीतुस के आमचो लगे अमराउन अस्तिर करलो।
7 सोजे हुनचो ईलोके चे नाई मानतर तुमी तीतुस के खुबे अस्तिर करलास गुने मोके हरिक लागली। हुन मोके सांगलो कि तुमी मोके दखतो काजे खुबे भांय-भांय होयसास आउर मोचो किरता तुमी कितरो मुरमुरा होलास आउर मोचो काजे तुमी अमदेया हलवाल होयसास, ए गोट सुनुन मोके खुबे हरिक लागली।
8 मोचो चिटी ले तुमके मुरमुरा करले, मानतर हुनचो काजे मय नी खिसियाये; जसन आगे खिसियाते रये। कसनबलले मोचो चिटी ले तुमी मुरमुरा तो होलास, मानतर हुन डंडिक काजे आय।
9 एदांय मय खुबे हरिक आंसे, तुमी मुरमुरा होलो किरता नाई, मानतर तुमी मुरमुरा होलो किरता मन बोहड़ालास गुने आय। तुमचो मुरमुरा होतोर महापरभु चो मन-इछा ले रये कि आमचो बाटले तुमके काई नोकसान नी होओ।
10 कसनबलले जोन महापरभु चो मन-इछा ले खिसियायसे, हुनके मुक्ति मिरेसे, मानतर संवसार चो जीवना काजे मुरमुरा होलोने मोरना मिरेसे।
11 एईकाजे दखा, महापरभु चो इछा ले मुरमुरा होले, कितरो हरिक, कितरो गोट-उलटातोर, कितरो रीस, कितरो डर, कितरो डंड देतो बिचार उबजली? तुमी सपाय बरन ने पक्का दखालास कि तुमचो ने काई दोख नीआय।
12 मय जोन तुमके लिखु रले, हुन ओनियाव करलो बीता आउर जेचो उपरे ओनियाव होली हुनमन चो किरता नोआय। मानतर एईकाजे लिखले, तुमी जोन आमचो लय ने आसास, हुन लय महापरभु चो पुरे तुमचो ने दखा देओ।
13 एईकाजे आमके अस्तिर मिरली।
आमचो अस्तिर ले नाई, मानतर तीतुस के तुमी अस्तिर करलास गुने हुन हरिक होलो किरता आमी खुबे हरिक आसुं।
14 मय तुमचो किरता गुमान करले आउर मय लाज नी पड़ले; मानतर जसन आमी तुमके सबु गोट सत-सत सांगु रलु, उसनेची तीतुस चो पुरे आमचो गुमान करतोर बले सत होली।
15 जेबे हुन तुमचो हुकुम मानतो गोटमन के सूरता करुआय कि कसन तुमी डरुन-थरथरुन हुनके परघालास, तेबे हुनचो मया तुमचो काजे आउर आगर बाड़ली।
16 मय एईकाजे खुबे हरिक आंसे कि मोके तुमचो उपरे पुरा भोरसा आसे।