गोटकी-मन ले दान देतोर
8
ए भाई-बईनमन, एदांय आमी तुमके मकिदुनिया चो मंडलीमन ने महापरभु करलो दया के सांगुंसे।
2 खुबे तकलीस बेरा, नानागती ने रलोने बले, हुनमन खुबे हरिक आउर गोटकी मन ले दान देते रला।
3 हुनमन चो बारे ने मोचो एई गवई आय कि हुनमन आपलो सकत भर चे नाई, मानतर सकत भर ले बले आगर, गोटकी मन ले दान दिला।
4 पवितर लोगमन* के दान देतोने संगी होतो काजे हुनमन आमके घन-घन गुहारला।
5 आउर हुनमन आमचो आसा ले आगर दिला, बललोने हुनमन पईल आपने के परभु के सोपुन दिला, पाछे फेर महापरभु चो मन-इछा ले आपने के आमके सोपला।
6 एईकाजे आमी तीतुस के समजाउन रलु कि जसन दान जुहातोके आगे ले मुरियाउन रलो, उसनेचे तुमचो मंजिगता बले पुरा करो।
7 जसन तुमी बिसवास ने, महापरभु चो बचन ने, गियान ने, सपाय मसागत ने आउर आमके मया करतोने पक्का होलासास, उसने एदांय तुमी दान देतोने बले पक्का होआ।
8 मय तुमके हुकुम नी देयंसे, मानतर तुमचो मया चो सत के दुसर चो पुरे परखतो काजे बलेंसे।
9 तुमी आमचो परभु जीसु किरिस्त चो दया के जानेसाहास। हुन सवकार होउन बले तुमके साका होतो काजे गरीब होलो कि हुनचो गरीब होलो के तुमी सवकार होउक सकास।
10 ए गोट ने मोचो सला एई आय, गेलो बरक ले मुरियालो दान देतो बुता के तुमी सारुन दियास, कसनबलले ए बुता काजे पईल बिचार आउर मुरियातोर बले तुमचो ले ची होली।
11 कसनबलले जसन तुमचो दान देतो मन-इछा रली, उसनेची एबे तुमचो पूंजी हिसाब ले देउन पुरा करा।
12 कसनबलले जोन बले तुमचो लगे आसे हुताले गोटोक मन ले दान दिलोने महापरभु पायसे, हुन तीज के दिलोने नाई, जेके तुमी मन नोहलो देयसास।
13 असन नी होओ कि दान देतो ले दुसर के अस्तिर आउर तुमके तकलीस होओ।
14 मानतर सपाय जोंहरेया होतो हिसाब ले, तुमचो बाड़ती ले दुसर चो घाटा बेरा काम पड़ो, आउर दुसरमन चो बाड़ती ले तुमचो घाटा बेरा काम पड़ो; तेबे गोटकी जोंहरेया होयदे।
15 जसन धरमसास्तर ने लिखलीसे,
“जोन खुबे ओंडेयालो हुनके खिंडिक बले आगर नी होली
आउर जोन खिंडिक असन ओंडेयालो हुनके काई उना नी होली”।†
तीतुस आउर हुनचो संगे बुता करुमन
16 महापरभु चो धन-धन होओ कि तीतुस चो मन ने बले तुमचो काजे मोचो असन बिचार दिलोसे।
17 कसनबलले हुन आमचो गोट धरलो, आउर खुबे हरिक होउन आपलो मन-इछा ले तुमचो लगे गेलोसे।
18 हुनचो संगे आमी हुन भाई के बले पठालुसे जोन नंगत खबर सुनातोने सबु मंडलीमन ने नाव कमालोसे।
19 आउर इतलीचे नोआय, मानतर हुनके मंडलीमन बाटले बाछुन रला कि ए दान अमराउन देतो काजे आमचो संगे एओ, आमी ए सेवा एईकाजे करुंसे कि परभु चो मयमा आउर आमचो नंगत मन-इछा दखा देओ।
20 आमी ए गोट ने चेत ने रउआंव कि ए दान अमरातो सेवा किरता कोनी आमके बदी देउक नी सको।
21 कसनबलले आमी हुन गोटमन चो फिकिर करुंसे जोन गोटमन परभु लगे नंगत आय आउर लोगमन लगे बले नंगत आय।
22 एईकाजे आमी हुनचो संगे आमचो गोटोक आउर भाई के बले पठालुसे, जेके आमी खुबे गोटमन ने परखुन लय ने बुता करु बीता पावलु; एदांय तुमचो उपरे हुनके खुबे भोरसा आसे, एई किरता हुन आउर खुबे लय ने आसे।
23 कोनी तीतुस चो बारे ने पूछला जाले, हुन मोचो संगवारी आउर तुमचो काजे मोचो संगे बुता करु बीता आय; आमचो भाईमन चो बारे ने पूछला जाले, हुनमन मंडलीमन बाटले पठालो-लोगमन आउर किरिस्त चो मयमा करु बीतामन आत।
24 एईकाजे तुमचो मया हुनमन के सिद करुन दखाहा, तेबे किरिस्त मंडलीमन चो पुरे तुमचो बारे ने आमी करतो गुमान सत होयदे।