किरिस्ती भाईमन काजे दान देतोर
9
एदांय हुन पवितर लोगमन के सेवा काजे दान देतो चो बारे ने, मोके तुमचो काजे लिखुक नी पड़े।
2 कसनबलले तुमी दान देतो के तियार आसास बलुन जाने, मय तुमचो बारे ने मकिदुनिया* चो लोगमन पुरे गुमान करले कि तुमी, अखाया चो लोग बरककार ले तियार आसास। एदांय तुमचो दान देतो हलवाल के दखुन खुबे लोगमन दान देउक पुरे एयसोत।
3 मय तीतुस आउर हुन भाईमन के एईकाजे पठालेसे कि जोन गुमान आमी तुमचो बारे ने करलु, हुन फोकाहा नी होओ। मानतर जसन मय हुनमन के सांगुन रले, उसनेची तुमी दान देतो काजे तियार राहा।
4 कोनी मकिदुनिया चो लोग मोचो संगे ईलो जाले, तुमी तियार नी रलोने, तुमचो उपरे गुमान करलो किरता आमी ची नाई मानतर आमचो ले आगर तुमी लाज पड़ासे।
5 एईकाजे मोके भाईमन के गुहारुक पड़ली कि हुनमन आमचो ले आगे तुमचो लगे जाओत, आउर जोन दान देतो काजे तुमी बचन देउ रलास, हुनके बड़े हरिक मन ले रूंडाउ राहा, कोचई बेरपेला ले नाई।
दान देतो गोट
6 मानतर गोट ए आय; जोन खिंडिक बुनुआय, हुन खिंडिक काटुआय आउर जोन खुबे बुनुआय, हुन खुबे काटुआय।
7 जसन तुमीमन ले सबु बिचार करलासाहास, उसनेची दान करा। मन कुट-कुट आउर बेरपेला नाई, कसनबलले महापरभु हरिक ले देतो लोग के मया करुआय।
8 महापरभु सबु बरन ले तुमके खुबे दया करुक सके, जेचोले तुमचो लगे अमदेया सपाय तीज भरपुर रयदे आउर दुसर के भलई करतो काजे बले तुमचो लगे खुबे रयदे।
9 जसन धरमसास्तर ने लिखलीसे,
“धरमकारी बिखरेसे, हुन गरीबमन के दान देयसे:
हुनचो धरम बुता जुग-जुग रयदे।”†
10 महापरभु बुनतो बीता के बीच आउर खातो काजे भात (रोटी) देयसे, हुन तुमके बीच देयदे आउर उबजायदे, आउर एचोले तुमचो धरम बुता चो बाड़ती होयदे।†
11 तुमके सबु बरन ले सवकार बनायदे, जेचोले तुमी जुगे ले जुगे दान देउक सकासे, तेबे तुमचो दिलो दान किरता हुनमन महापरभु चो धन-धन करदे।
12 कसनबलले ए सेवा के पुरा करलोने, पवितर लोगमन चो उना ची पुरा नी होयसे, मानतर लोगमन बाटले महापरभु चो खुबे धन-धन बले होयसे।
13 कसनबलले तुमचो दिलो दान हुनमन काजे गोटोक चीना आय कि तुमी किरिस्त चो नंगत खबर के मानसास; जेचोले हुनमन, महापरभु चो जय-जय करसोत कि तुमी गोटोक-मन ले, हुनमन के आउर दुसरमन के खुबे दान देयसास।
14 एके चीना मानुन, हुन पवितर लोगमन तुमचो काजे पारथना करसोत आउर तुमके भेटुक मन करसोत, कसनबलले तुमचो उपरे महापरभु चो खुबे दया आसे।
15 महापरभु चो धन-धन होओ, हुनचो दिलो दान (जीसु) चो बारे ने सांगुन-पुरुक नी होए।