पउलुस चो हक
10
मय पउलुस, तुमके किरिस्त चो सुसार आउर सोज चो किरता समजायंसे। कोनी-कोनी बलसोत कि जेबे मय तुमचो संगे आंसे, धीर ले गोटेयायंसे, मानतर तुमचो पाटसुना ढाढ़ुस करेंसे।
2 मय तुमके गुहारेंसे, जेबे मय तुमचो पुरे एयंदे, मोके रीस होउक नी पड़ो, जसन मय हुन लोगमन के रीस दखातोर बिचार करेंसे, जोन आमके देहें चो हिसाब ने चलतो लोग बललोने संवसारिक जीवना जीवतो लोग समजसोत,
3 कसनबलले आमी संवसार ने रलोने बले संवसारी लोगमन असन लड़ई-झगड़ा ने नी रउं।
4 कसनबलले आमचो लड़ई-हतियार संवसारी नोआय, मानतर ए हतियार ने सयतान चो भाड़ामन के भोसड़ातो महापरभु चो सकत आसे।
5 एईकाजे आमी महापरभु चो गियान चो बिरुद करतो सपाय घड़लो गोटमन के काटुन आमचो बिचार के किरिस्त चो हुकुम मानतो लाईक बनाउंसे,
6 जेबे तुमी हुकुम के पक्का मानासे, तेबे आमी सपाय बरन चो हुकुम नी मानतो लोग के डंड देतो काजे तियार रहुंसे।
7 तुमी हुनके ची दखा, जोन तुमचो पुरे आसे। कोनी आपने के किरिस्तचेई आंय बलेसे जाले, हुन पक्का जानो कि जसन हुन किरिस्त चो आय उसनेची आमी बले किरिस्त चो आंव।
8 कसनबलले आमचो हक चो बारे ने मय गुमान करेंसे जाले, जेके परभु तुमके नसातो काजे नाई मानतर बनातो काजे दिलोसे, तेबे मय लाज नी पड़ें।
9 मोके तुमी चिटीमन ले डरातो बीता नी समजा।
10 कोनी-कोनी बलुआत, “हुनचो चिटीमन खुबे नंगत आउर असर बिती आय; मानतर जिदलदांय हुन पुरे रयसे, हुन देहें ले निमल आउर सांगतो ने हेला जान पड़ेसे”।
11 हुनमन ए गोट पक्का ले समजोत कि तुमचो पाटसुना लिखलो चिटीमन चो गोट असने ची, तुमचो संगे रतो बेरा बले चलुंसे।
12 आपने के बड़ाई करुमन संगे आमी कटारी नी होउं, मानतर जोनमन दुसर संगे कटारी होयसोत, हुनमन के काई बुद नीआय।
13 हक ले आगर गुमान आमी केबई नी करुं, मानतर महापरभु दिलो हक हिसाब ले ची गुमान करुं, एई हक ने तुमी बले आसास।
14 मानतर किरिस्त चो नंगत खबर सुनाते, तुमचो लगे सबुले पईल हार ईलो बेरा बले, आमचो हक के नी बाहारलु; कसनबलले आमी हक ले आगर करुक मने नी करुं।
15 आमचो हक ले आगर दुसर चो मसागत चो हक ने गुमान नी करुं। मानतर आमके आसा आसे जसन तुमचो बिसवास बाड़ते जायदे, उसने आमी आपलो हक हिसाब ने तुमचो किरता बाड़ते जाउंदे।
16 तेबे आमी तुमचो संद के नाहकुन नंगत खबर सुनाउंदे, आउर कोनी दुसर चो करलो बुता ने गुमान नी करुं।