फंदी पठालो-लोगमन ले बाचुन राहा
11
तुमी मोचो खिंडिक असन भकवा होतोके सहलोने नंगत होती, हव सहतास बले।
2 कसनबलले मय तुमचो बारे ने महापरभु चो लय ने रयंसे, एईकाजे मय, गोटकी मनुक किरिस्त के, तुमके पवितर कुंआरी असन सोपुन देतो चो गोट-बात छिड़ालेसे।
3 मानतर मोके डर आसे, जसन हुन साप, आदम चो बायले हव्वा के धोका ने फुसियाली†, उसनेचे तुमचो मन के बले जोन किरिस्त ने सत आउर पवितर होतोर आय, कोनी भूलकान नी देओत।
4 तुमके आमी जीसु चो बचन सुनालु, तुमी पवितर आत्मा पावलास आउर नंगत खबर चो गोट के मानलास। मानतर तुमी एदांय दुसर जीसु चो बारे ने सांगलोके मानसास, दुसर आत्मा पावतो काजे तियार आसास आउर दुसर चो गोटमन के धरसास। तुमी काय काजे असन होयसास?
5 आउर मय काई गोट ने, आपने के बड़े ले बड़े पठालो-लोग समजतोमन ले नानी नोआंय।
6 मय गोटेयातो ने भकवा होले बले, बुद ले नोआंय। आमी एके सपाय गोट ने सपाय बरन ले तुमके दखालुसे।
7 मय, महापरभु चो नंगत खबर फोकाहा ने सुनाले, आउर आपने के हिनस्ता करुन तुमके बड़ाले जाले, काय, मय पाप करले?
8 तुमचो सेवा करतो काजे मय दुसर मंडलीमन ले झीका-टाना करलो असन, हुनमन चो मसागत चो भूती के धरले।
9 आउर जेबे मय तुमचो संगे रले आउर मोके चिपा होली, तेबले बले मय कोचई उपरे बोजा नी तेंगड़ले, कसनबलले मकिदुनिया ले ईलो भाईमन मोचो कमी के पुरा करला। एईकाजे मय काई गोट ने तुमचो उपरे बोजा बनुक नी दिले आउर बोजा बनुक नी देयें।†
10 अखाया परघन चो कोनी बले मोचो ए गुमान के टारुक नी सकोत कि किरिस्त चो सत मोचो ने आसे।
11 काय काजे? एईकाजे कि मय तुमके मया नी करे? महापरभु जानेसे मय तुमके मया करुआंय।
12 मानतर जसन आगे ले मय, तुमके बोजा नी होउन सेवा-बुता करेंसे उसनेची करते रयंदे, एईकाजे कि जोन लोगमन बुता करतोने आमचेई असन आंव बलुन गुमान करसोत, हुनमन के दांव पाउक ची नी देयें।
13 कसनबलले असन लोगमन फंदी पठालो-लोग, घतवार आउर किरिस्त चो पठालो-लोग होतोर भेस धरतो लोग आत।
14 ए भक्यातो गोट नोआय, कसनबलले सयतान खुद बले बरतो सरगदूत चो भेस धरेसे।
15 एईकाजे सयतान चो सेवक बले धरम चो सेवकमन चो भेस धरले काई बड़े गोट नोआय, मानतर हुनमन चो बुता हिसाब ने ची सरासरी ने हुनमन के डंड मिरेदे।
तकलीस पाउन बले पउलुस चो गुमान
16 मय फेर बलेंसे, कोनी मोके भकवा नी समजा; नोहले भकवा ची समजुआहास जाले उसनेची समजा। एईकाजे मय बले खिंडिक गुमान करुक सकेंदे
17 जोन बले मय गुमान करुन बलेंसे, हुन परभु चो हुकुम ले नाई, मानतर भकवा-माने असन होउन बलेंसे।
18 जेबे खुबे लोग संवसारिक हिसाब ने गुमान करेसोत, तेबे मय बले गुमान करेंदे।
19 तुमी तो समज बीता होउन भकवा चो गोट के हरिक ले सहसाहास।
20 कसनबलले जेबे तुमके कोनी कमेया बनायसे, नोहले तुमचो के झीकुन खायसे, नोहले गुपायसे, नोहले तुमके हिनस्ता करेसे, नोहले तुमके थपड़ायसे; तेबे बले तुमी हुन सपाय के सहसास।
21 मय लाज होउन बलेंसे, आमी हुन सपाय करतोने खुबे निमल आसुं।
मानतर कोनी बले काई गोट ने गुमान करुक ढाढ़ुस करेसे जाले, मय बले गुमान करतो ढाढ़ुस करेंसे। ए गोट मय भकवा होउन बलेंसे।
22 काय, हुनीमन ची इबरानीमन आत? मय बले आंय। काय, हुनीमन ची इसराएलिमन आत? मय बले आंय। काय, हुनीमन ची अबराहम चो थर आत? मय बले आंय।
23 काय, हुनीमन ची किरिस्त चो सेवक आत? मय बोया असन बलेंसे, मसागत ने, घन-घन जयल जातो ने, कोड़ा ने मार खातोने आउर घन-घन मोरना चो गराहांमन ने, ए सपाय ने मय हुनमन ले आगर सहलेसे।
24 पांच हार मय जहूदीमन चो हाथ ले एक कम दुय कोड़ी (उनचालीस) कोड़ा मार खादलेसे,
25 तीन हार मोके बेत-बड़गी ने रोमीमन मारला। एक हार मोके पकना ची पकना मारला, तीन हार पानी जाहाज टुटतोके मय गराहां ने पड़ले आउर गोटोक राती-मंजन मय समदूर ने रले।
26 मय कहांय बले जातो बेरा घन-घन नंदीमन चो गराहांमन ने, खंगारमन चो गराहांमन ने, आपलो जात लोग चो गराहांमन ने, बिजातीमन चो गराहांमन ने, सहरमन चो गराहांमन ने, रान चो गराहांमन ने, समदूर चो गराहांमन ने, फंदी भाईमन चो मंजारे गराहांमन ने रले।
27 मसागत आउर डंड ने, रात-रात भर चेता रउन-रउन, भूक-पियास ने, भात-पेज नोहलोर, सीतकार ने ठडरुन-ठडरुन आउर फटई नोहलोर;
28 आउर ए सपाय गोटमन के छांडुन बले, सपाय मंडलीमन चो फिकिर मोके रोजे दिना पड़ेसे।
29 कोचो निमल ने मय निमल नी होयंसे? कोचो धोका खाउन पाप करलोने मोचो जीव नी दुखेसे?
30 गुमान करतोर ची आय जाले, मय आपलो निमल गोटमन ने गुमान करेंदे।
31 परभु जीसु चो महापरभु आउर बुआ जोन जुग-जुग ले धन-धन आय हुन जाने, मय फंद नी गोटेयायें।
32 दमिसक ने रलो बेरा अरितास राजा चो राजपाल मोके धरतो काजे दमिसक सहर ने घत ने टाकाउन रये।
33 मानतर मोके परला ने राजबाड़ा चो खिड़की बाटले खाले उतराला आउर मय धरा पड़तो ले बाचले।