बायदा चो चीना, खतना
17
अबराम, निन्यानबे* बरक चो होलो, तेबे जहोवा हुनके दखा देउन बललो, “मय सबुले सकत महापरभु आंय; मोचो पुरे दोख नोहलो रा। 2 मय तुचो संगे बायदा करुन तुचो थर के खुबे बड़ायंदे।” 3 हुदलदांय अबराम हुनके डंडासरन करलो; आउर महापरभु हुनके ए सपाय गोटमन बललो, 4 “दख, मोचो बायदा तुचो संगे आसे; एईकाजे तुय जात-जात चो लोगमन चो मूर बुआ होसे। 5 एदांय ले तुचो नाव अबराम* नाई, मानतर अबराहम* रयदे; कसनबलले मय तुके खुबे जात-जात चो लोगमन चो मूर बुआ बनालेसे। 6 मय तुके खुबे बड़ायंदे; तुचो ले जात-जात चो लोगमन जनमदे आउर तुचो थर ने राजामन बले जनमदे। 7 मय तुचो संगे आउर तुचो पाछे, तुचो थर-लर संगे जुग-जुग चो बायदा करेंसे कि मय तुचो आउर तुचो थर-लर चो बले महापरभु होयंदे। 8 ए कनान देस् के, जोन थाने तुय परदेसिया होउन आसीस, मय तुके आउर तुचो पाछे तुचो थर-लर के जुग-जुग काजे तुमचो निंज-भुंय होतो काजे देयंदे; आउर मय तुमचो महापरभु होयंदे।”9 फेर महापरभु, अबराहम के बललो, “तुय बले मोचो करलो बायदा के मान, आउर तुचो पाछे तुचो थर-लर बले आपलो-आपलो पीड़ीमन ने मोचो बायदा के मानोत। 10 तुय आउर तुचो पाछे तुचो थर-लर मानतो मोचो बायदा ए आय कि तुमी सपाय मनुकमन खतना करातोर आय। 11 तुमी आपलो-आपलो टेपा के खतना करातोर आय, एई मोचो आउर तुचो मंजी करलो बायदा चो चीना आय। 12 तुचेई ची थर-लर चो नाई, मानतर तुय सोन-रूप देउन घेनलो परदेसियामन आउर जोन बले तुचो घरे जनमेसोत, हुन सपाय लेका पिलामन के आठ दिन होलोने खतना करातोर आय। 13 तुचो घरे जनमलो होओत नोहले सोन-रूप देउन घेनलो होओत, सपाय के खतना करातोर ची आय। असन बरन ले मोचो बायदा चो चीना तुमचो देहें ने जुग-जुग काजे रयदे। 14 जोन मनुक खतना नी करायदे बललोने, जेचो टेपा चो खतना नी कराये, हुन मोचो करलो बायदा के नी मानेसे, एईकाजे हुन मोचो लोग होउक नी सके।”
15 महापरभु, अबराहम के फेर बललो, “तुचो बायले सारे के एदांय तुय सारे नी बल हुनचो नाव सारा होयदे। 16 मय सारा के बर देयंदे आउर हुनके तुचो बाटले गोटोक बेटा होयदे, मय हुनके असन बर देयंदे कि हुन जात-जात चो लोग चो मूर आया होयदे; आउर हुनचो थर-लर ने जात-जात चो लोगमन चो राजामन जनमदे।” 17 हुदलदांय अबराहम डंडासरन करलो आउर हांसुन मने-मन बिचारलो, “काय, सव बरक चो मनुक, पिला पाउक सके आउर काय, नबे बरक चो सारा पिला पाउक सके?” 18 आउर अबराहम, महापरभु के बललो, “इसमाएल उपरे तुचो दया बनुन रओ, एई मोचो काजे खुबे आय!” 19 तेबे महापरभु बललो, “सते तुचो बायले सारा के तुचो बाटले गोटोक बेटा होयदे, तुय हुनचो नाव इसहाक* संगाव। मय हुनचो संगे गोटोक बायदा करेंदे जोन पाछे हुनचो थर-लर काजे बले जुग-जुग चो बायदा होयदे। 20 इसमाएल काजे बले मय तुचो गुहार सुनलेसे; मय हुनके बर देयंदे, हुनचो लेउर बड़ाउन खुबे जन करेंदे, हुनचो ले बारा झन मुखियामन जनमदे, आउर मय हुनचो ले गोटोक बड़े जात बनायंदे। 21 मानतर मय, इसहाक ले ची बायदा करेंदे जोन एदांय बरक बललोने, कबूल धरालो समया ने सारा ले जनमेदे।” 22 अबराहम ले गोटेयाउन सारलोके महापरभु हुताले उपरे गेलो।
23 तेबे अबराहम, आपलो बेटा इसमाएल, आपलो घरे जनमलो सपाय कमेयामन आउर सोन-रूप देउन घेनलो सपाय कमेयामन बललोने, हुनचो घरे रलो सपाय मनुकमन के धरुन हुनी दिने महापरभु चो बचन हिसाब ले हुनमन चो टेपा चो खतना करालो। 24 अबराहम चो खतना करालो बेरा हुन निन्यानबे बरक चो रये। 25 आउर हुनचो बेटा इसमाएल चो खतना करालो बेरा हुन तेरा बरक चो रये। 26 अबराहम आउर हुनचो बेटा इसमाएल दुनो चो खतना गोटकी दिने होली; 27 हुनचो घरे जनमलो आउर परदेसियामन ले सोन-रूप देउन घेनलो जितरो मनुकमन हुनचो घरे रला, सपाय चो खतना अबराहम संगे ची होली।