निकरुन जातोर
आगे एके पढ़ा
ए किताप ने मोसा, इसराएलिमन चो मिसर देस् ले निकरुन कनान देस् अमरतले, हुनमन संगे घटलो गोटमन चो बारे ने लिखलोसे। जुगे करुन हुनमन, अमालेकीमन संगे करलो जुद आउर महापरभु बाटले मिरलो नियम-कानुन चो बारे ने लिखलोसे।
मोसा, 1571 ई.पू* ने जनमलो, हुन लेवी कुटुम चो रये। मानतर मिसर देस् चो राजा फिरोन चो बेटी, मोसा के पोसली आउर हुन, राजमाहाल ने रते रये। हुन हुता रउन हुन देस् चो सपाय गियान पावलो।
मोसा गोटोक मिसरी मनुक के मोरते मारलो गुने, राजा हुनके मारतो उआट करलो। एईकाजे मोसा मिद्यान देस् बाटे परालो आउर चालीस बरक धोरई बुता करते रये। हुदलदांय इसराएलिमन, मिसर देस् ने कमेया होउन खुबे दुख-तकलीस ने रला, एईकाजे हुनमन के हुता ले निकराउन आनतो काजे महापरभु मोसा के बाछलो। महापरभु, मोसा बाटले इसराएलिमन के कमेया बुता ले छंडाउन अस्तिर करलो।
सिनाई डोंगरी ने महापरभु, इसराएलिमन संगे बायदा करलो आउर हुनमन के नंगत जीवना जीवतो नीती-नियम दिलो। ए किताप ने खास करुन, महापरभु इसराएलिमन के मिसर देस् चो कमेया बुता ले छंडातो आउर हुनमन के गोटोक बड़े जात बनातो बायदा चो बारे ने लिखलोसे।