उबजास
संवसार चो मूर
आगे एके पढ़ा
उबजास चो अरथ “मूर” आय। लोग अंताजुआत कि मोसा ए किताप के 1450-1410 ई. पू. ने लिखलोसे। एथा महापरभु, संवसार के कसन ने बनालो__ जीव-जनतुरमन चो उबजास, नर-मंजा के बनातोर, कुटुम चो मूर, संवसार ने पाप आउर डंड चो मूर, आराधना, मुक्ति आउर नर-मंजा संगे महापरभु चो बेबार चो बारे ने लिखलोर आसे।
ए किताप के दुय भाग ने बाटलासे। पईल, अध्या 1-11 ने, संवसार चो मूर आउर नर-मंजा चो मूर गोटमन बललोने, आदम आउर हव्वा, कईन आउर हाबिल, नूह आउर पुर-पानी आउर बाबेल ने बनालो खुबे बड़े गुमट चो बारे ने लिखलोर आसे। दुसर, अध्या 12-50 ने, बिसवास ने चमकट रलो अबराहम चो थर-लर बललोने, इसहाक, जाकूब आउर जूसुफ चो जीवना चो बारे ने लिखलोर आसे। एईमन ले इसराएली बंस उबजली। एमन चो थर ने आमचो मुक्तिदेउ परभु जीसु किरिस्त जनमलो।
किताप चो मूर ले धरुन सरासरी होओत ले महापरभुचेई बारे ने लिखलोर आसे, जोन अडरा बुता करतो लोग के बदी आउर डंड देउआय आउर हुनके मानतो लोगमन के बाट दखाउआय आउर साहरा करुआय। मोसा ए किताप के ए गोट जानुन भाति लिखेसे, महापरभु संवसार के बनालो आउर हुन अमदेया आपलो लोगमन चो धियान करते रयसे।