उबजास
संवसार चो मूर
1
मूर ने महापरभु, उपरपुर आउर मंजपुर के बनालो। 2 मंजपुर घड़न नोहलो रली, आउर हुता काई ची नी रये। गड़िया पानी उपरे अंधार ढाकु रये आउर महापरभु चो आत्मा पानी उपरे बुलते रये। 3 तेबे महापरभु बललो, “उजर होओ,” आउर उजर होली। 4 महापरभु, उजर के दखलो कि हुन नंगत आय; आउर उजर के अंधार ले अलगालो। 5 महापरभु उजर चो नाव मंजन आउर अंधार चो नाव राती संगालो। तेबे सांज होली आउर बियान पावली, ए पईल दिन होली।6 महापरभु बललो, “पानी के दुय भाग करतो काजे हुनचो मंजी गोटोक बड़े संद होओ।” 7 तेबे महापरभु संद बनाउन खाले चो पानी के आउर उपर चो पानी के भाग-भाग करलो; आउर असनेची होली। 8 महापरभु, उपर चो संद के बादरी नाव दिलो। तेबे सांज होली आउर बियान पावली, ए दुसर दिन होली।
9 फेर महापरभु बललो, “बादरी खाले चो पानी गोटोक थाने जुहा होओ, जेचोले सुकलो भुंय दखा देओ,” आउर असनेची होली। 10 महापरभु, सुकलो भुंय के मंजपुर आउर जुहलो पानी के समदूर नाव संगालो। महापरभु दखलो कि ए नंगत आय। 11 तेबे महापरभु बललो, “मंजपुर ने रोंडामन आउर बीच बीती बुटामन उबजो। पाक-फर धरतो रूकमन उबजो, जेचो पाक भीतरे बीचा रओत कि बरन-बरन बीचामन ले बरन-बरन चो रूकमन उबजो,” आउर असनेची होली। 12 असने, बरन-बरन चो बुटामन, जोन थाने बीचामन रयसे आउर पाक धरतो रूकमन जोन थाने आपलेई बरन चो बीच रयसे, मंजपुर ने अखरली; आउर महापरभु दखलो कि ए नंगत आय। 13 तेबे सांज होली आउर बियान पावली, ए तीसर दिन होली।
14 फेर महापरभु बललो, “मंजन के राती ले अलगे करतो काजे बादरी ने उजरमन होओ; आउर हुन उजरमन बाटले चीनामन, जेट, चमास, सीतकार; दिनमन आउर बरकमन होओ; 15 आउर ए उजरमन, मंजपुर ने उजर देतो काजे बादरी उपरे रओ।” आउर असनेची होली। 16 फेर महापरभु, दुयठन बड़े छकालनाय बरतो उजरमन बनालो; हुनमन ले बड़े उजर, ‘बेर’ के मंजन उपरे राज करतो काजे आउर नानी उजर, ‘जोन’ के रात उपरे राज करतो काजे बनालो; आउर तारामन के बले बनालो। 17 मंजपुर ने उजर देतो काजे महापरभु ए उजरमन के बादरी उपरे संगालो 18 कि रात आउर मंजन उपरे राज करोत, आउर उजर के अंधार ले अलगे करोत। महापरभु दखलो कि ए नंगत आय। 19 तेबे सांज होली आउर बियान पावली, ए चवथा दिन होली।
20 फेर महापरभु बललो, “पानी भीतरे बरन-बरन चो जल-जनतुरमन भोरुन जाओत, आउर मंजपुर उपरे बादरी ने चड़ईमन उड़ोत।” 21 एईकाजे महापरभु समदूर ने बड़े-बड़े जल-जनतुरमन* आउर बरन-बरन चो पोंहरतो-बुलतो सपाय जीव-जनतुरमन के बले बनालो, आउर बरन-बरन चो उड़तो चड़ईमन के बले बनालो; आउर महापरभु दखलो कि ए नंगत आय। 22 महापरभु, हुनमन के असन बलुन बर दिलो, “जाहा, पोहलार होउन लेउर बाड़ा, आउर समदूर चो पानी ने भोरुन जाहा; आउर चड़ईमन बले मंजपुर ने खुबे होओत।” 23 तेबे सांज होली आउर बियान पावली, ए पांचवां दिन होली।
24 फेर महापरभु बललो, “मंजपुर ने बरन-बरन चो जीव-जनतुरमन बललोने, पोसतो जनावरमन, रेंगतो जनतुरमन आउर रान-जियादमन जात-जात हिसाब ने उबजोत,” आउर असनेची होली। 25 असने महापरभु मंजपुर ने बरन-बरन चो रान-जियादमन, बरन-बरन चो पोसतो जनावरमन आउर बरन-बरन चो भुंये रेंगतो जनतुरमन के बनालो; आउर दखलो कि ए नंगत आय।
26 तेबे महापरभु बललो, “एदांय आमी, मनुक के आमचेई रूप आउर आमचेई असन बनाउं; हुनमन समदूर चो मछरीमन, बादरी चो चड़ईमन, पोसतो जनावरमन आउर भुंये रेंगतो सपाय जनतुरमन उपरे राज करोत जोन गुलाय मंजपुर ने आसोत।” 27 असन बरन ले महापरभु, मनुक* के आपलेई रूप ने बनालो, आपलेई असन महापरभु हुनमन के बनालो। नर आउर नारी करुन हुनमन के बनालो। 28 महापरभु, हुनमन के बर देउन बललो, “तुमी खुबे पोहलार होउन लेउर बाड़ा! मंजपुर ने भोरुन जाहा आउर मंजपुर के आपलो हक ने करा आउर समदूर चो मछरीमन, बादरी चो चड़ईमन आउर भुंये रेंगतो सपाय जीव-जनतुरमन उपरे राज करा।” 29 महापरभु फेर बललो, “दखा, जितरो बले बीच बीती बुटामन आउर पाक धरतो रूकमन मंजपुर ने आसे, हुन सपाय तुमके दिलेसे; ए सपाय तुमचो खादी-पीदी आय। 30 आउर मंजपुर चो पसुमन, बादरी ने उड़तो चड़ईमन आउर सपाय रेंगतो जनतुरमन, जोनमन निनास धरसोत, हुन सपाय चो खादी-पीदी काजे मय काचा रोंडा आउर लाटा-बुटामन दिलेसे;” आउर असने चे होली। 31 महापरभु आपलो बनालो सपाय के दखलो कि सपाय खुबे नंगत आसे। तेबे सांज होली आउर बियान पावली, ए छटवां दिन होली।