2
असन बरन ले उपरपुर, मंजपुर आउर हुता चो सपाय के बनातोर सरली। 2 महापरभु आपलो बुता के सारलो आउर आपलो सपाय बुतामन के सारुन सातवां दिने बिसालो। 3 महापरभु सातवां दिन के बर देउन हुनके पवितर बनालो; कसनबलले महापरभु संवसार के बनातो सपाय बुता सारुन सातवां दिने बिसालो।नर-मंजा चो उबजास
4 उपरपुर आउर मंजपुर चो मूर असन होली, जिदलदांय जहोवा महापरभु, बादरी आउर मंजपुर के बनालो: 5 हुदलदांय मंजपुर ने काई लाटा-बुटा नी रये: आउर भुंये काई बुटा बले नी अखरु रये। कसनबलले जहोवा महापरभु हुदलदांय ले मंजपुर ने पानी नी घसराउ रये आउर भुंय कमातो काजे कोनी लोग नी रला; 6 तेबले बले मंजपुर ने धुंआरी उठुन सपाय भुंय के भीजाते रये। 7 जहोवा महापरभु, भुंय चो माटी ले मनुक के घड़लो* आउर हुनचो नाक ने जीव चो निनास फूकलो, तेबे हुन जीवत मनुक होलो। 8 जहोवा महापरभु, बेर उदिया बाटे अदन नाव चो ठाने गोटोक पदर बनालो; आउर हुन थाने आपलो बनालो मनुक के संगालो। 9 जहोवा महापरभु, सबु बरन चो सुंदर रूकमन आउर मीठ बिती पाक धरतो रूकमन के हुन पदर ने उबजालो। पदर चो मंजिगते महापरभु ‘जीव चो रूक’ आउर ‘नंगत-अडरा गियान देतो रूक’ के बले उबजालो।
10 हुन पदर ने पानी झपातो काजे गोटोक बड़े नंदी अदन ले निकरली। हुन नंदी खिंडिक पुरे जाउन चार भाग होली। 11 पईल भाग चो नाव पीसोन नंदी आय; ए हुनी नंदी आय जोन गुलाय हवीला देस् चो भोंवरक बोहेसे जोन थाने सोन मिरुआय; 12 हुन देस् चो सोन निरवा आय; हुता खुबे महांग बिती बास-तेल, मनी-मोती आउर गोमेदक पकना बले मिरुआय। 13 दुसर भाग चो नाव गीहोन नंदी आय; ए नंदी कूस देस् चो भोंवरक बोहेसे। 14 तीसर भाग चो नाव हिदेकेल नंदी आय, ए नंदी अस्सूर देस् चो बेर उदिया बाटे बोहेसे आउर चवथा भाग चो नाव फरात नंदी आय।
15 जहोवा महापरभु, आदम* के अदन चो पदर ने संगालो कि हुन थाने बुता करो आउर हुनचो दखा-राखा करो। 16 तेबे जहोवा महापरभु, आदम के हुकुम दिलो, तुय पदर चो कोनी बले रूक चो पाक के खाउक सकीस। 17 मानतर तुय ‘नंगत-अडरा गियान देतो रूक’ चो पाक के केबई नी खा; कसनबलले जोन दिने तुय हुन रूक चो पाक के खासे, हुनी दिने तुय मोरसे।
18 तेबे जहोवा महापरभु बललो: “मनुक चो एकलाय रतोर नंगत नोआय; मय हुनचो साहरा काजे गोटोक नंगत जोड़ी बनायंदे।” 19 आउर जहोवा महापरभु, मंजपुर ने बनालो सपाय रान-जियादमन आउर बादरी चो सपाय चड़ईमन के आदम लगे एई जानतो काजे आनलो कि आदम हुनमन चो काय-काय नाव संगायदे; आउर आदम, जीव-जनतुरमन आउर चड़ईमन चो जोन बले नाव संगालो, हुनमन चो नाव हुनी होली। 20 असने आदम, सपाय बरन चो जीव-जनतुरमन, बादरी चो चड़ईमन आउर सपाय बरन चो पोसतो जनावरमन चो नाव संगालो; मानतर आदम के साहरा होतो लाईक गोटोक बले फोबतो जोड़ी नी मिरली। 21 तेबे जहोवा महापरभु, आदम के भारी झूमा ढकालो आउर हुन सोवलो बेरा हुनचो गोटोक पंजरा हाड़ा निकराउन हुता मास भोरुन दिलो। 22 आउर आदम ले निकरालो पंजरा हाड़ा ले जहोवा महापरभु, गोटोक बायले बनालो; आउर हुनके आदम लगे आनलो। 23 तेबे आदम बललो, “एके तो मोचो हाड़ा ले आउर मोचो मास ले बनालोसे। एईकाजे एचो नाव नारी रयदे, कसनबलले एके नर ले निकरालोर आसे।” 24 एईकाजे मनुक आपलो आया-बुआ के छांडुन आपलो बायले संगे मिसुन रयदे आउर हुनमन दुनो गोटकी देहें होदे। 25 आदम आउर हुनचो बायले पदर ने नांगड़ा-नांगड़ी रला, मानतर लाज नी होते रओत।